ەلوردا • 09 شىلدە، 2021

ەلوردادا ەكى جولاۋشىلار كەمەسىن پايدالانۋعا تىيىم سالىندى

17 رەت كورسەتىلدى

ەلوردانىڭ كولىكتىك باقىلاۋ ينسپەكتسياسى نۇر-سۇلتان قالاسى اۋماعىندا ەسىل وزەنىمەن جولاۋشىلار مەن تۋريستەردى تاسىمالدايتىن 45 جولاۋشى سىياتىن استانا 0731 رس جانە 70 جولاۋشىعا ارنالعان ەسىل 0762  كەمەلەرىن پايدالانۋدى توقتاتتى. بۇل تۋرالى قر يدم ءباسپاسوز قىزمەتى حابارلادى، دەپ جازادى Egemen.kz.

2021 جىلدىڭ 3 شىلدەسىندە وتكىزىلگەن تەكسەرىس قورىتىندىسىندا كەمەلەردى پايدالانۋ ەرەجەلەرىن ورەسكەل بۇزعانى انىقتالدى. اتاپ ايتقاندا، كەمە قۇجاتتارى، ولاردىڭ كوماندالىق قۇرامىن اتتەستاتتاۋدان وتكىزۋ تۋرالى جانە كەمەنىڭ ادامداردى تاسىمالداۋعا دايىندىعى تۋرالى سانيتارلىق-ەپيدەميولوگيالىق قورىتىندىسى جوق.

كەمەلەردىڭ كوماندالىق قۇرامىن اتتەستاتتاۋ - كەمەنى باسقارۋ، جولاۋشىلاردىڭ قاۋىپسىزدىگىن قامتاماسىز ەتۋ، كەمەنى تەحنيكالىق جارامدى جاعدايدا ۇستاۋ جانە قورشاعان ورتانى قورعاۋ شارالارى ءۇشىن قاجەتتى ءبىلىم دەڭگەيىن راستايتىن ءراسىم.

انىقتالعان زاڭبۇزۋشىلىقتار جويىلعانعا دەيىن بۇل كەمەلەردى پايدالانۋعا تىيىم سالىندى.

كەمەلەردىڭ يەسى – «جاسنۇر» شق مكقك جانە «ەسىل-استانا» كەمە قاتىناسى كومپانياسى» جشس-ءنىڭ 5 لاۋازىمدى تۇلعاسى اكىمشىلىك جاۋاپكەرشىلىككە تارتىلدى جانە زاڭناماعا سايكەس 5 اەك ايىپپۇل سالىندى.

وتكەن ناۆيگاتسيادا ينسپەكتورلار ماشينا بولىمشەسىنەن وتىننىڭ اعۋى، كەمە قۇجاتتارىنىڭ دۇرىس جۇرگىزىلمەۋى، كەي قۇجاتتاردىڭ جوقتىعى، سونداي-اق ءرولدى باسقارۋ ورنىن اينالمالى شولۋمەن قامتاماسىز ەتپەگەنى ءۇشىن 11 وزەن كەمەسىن (ونىڭ ىشىندە استانا 0731 رس جانە ەسىل 0762) پايدالانۋعا تىيىم سالدى.

قر يدم كولىك كوميتەتى پايدالانۋدىڭ بەلگىلەنگەن تالاپتاردىڭ مۇلتىكسىز ورىندالۋىن تالاپ ەتەدى جانە سۋ كولىگىندەگى قاۋىپسىزدىك قاعيدالارى بۇزىلعانىن كورگەن ازاماتتاردان كولىك كوميتەتىنىڭ احۋالدىق ورتالىعىنىڭ تاۋلىك بويى جۇمىس ىستەيتىن 8(7172)98-35-35 ءنومىرلى سەنىم تەلەفونىنا حابارلاۋدى سۇرايدى. فوتو جانە بەينە ماتەريالداردى 8-708-088-08-00 نومىرىمەن what'sapp-قا جىبەرۋگە بولادى.

سوڭعى جاڭالىقتار

ۇقساس جاڭالىقتار