باسقوسۋ بارىسىندا «تەرىسكەي تولعاۋلارى» كىتابىنىڭ تانىستىرىلىمى مەن تۇساۋكەسەرى ءوتتى.
«ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ قولداۋىمەن جارىق كورگەن كىتاپتىڭ اۆتورى - قازاق ۇلتتىق ونەر ۋنيۆەرسيتەتى «دومبىرا» كافەدراسىنىڭ پروفەسسورى, كۇيشى, قازاقستاننىڭ ەڭبەك سىڭىرگەن قايراتكەرى جانعالي ءجۇزباي.
كىتاپ قورقىت بابا مۇراسىنىڭ جالعاسى ىقىلاستىڭ شاكىرتى, قاراتاۋ كۇيشىلىك مەكتەبىنىڭ نەگىزىن قالاۋشى, كۇيشى-كومپوزيتور سۇگىر ءالى ۇلىنىڭ مۇرالارىنا ارنالعان. وندا سۇگىردىڭ 60 كۇيى جانە ونىڭ ۇستازدارى مەن ونەگەسىن كورگەن شاكىرتتەرىنىڭ سيرەك ورىندالاتىن تۋىندىلارى جيناقتالعان.
«كىتاپتىڭ ىشىندە جاڭالىق وتە كوپ. باسىم بولىگى - بۇرىن جاريالانباعان كۇيلەر. كىتاپقا زامانىندا ءوزى ونەگە كورگەن جانە باتاسىن العان ۇستازدارى – تاتتىمبەت قازانعاپ ۇلى, ىقىلاس دۇكەن ۇلى, سايدالى سارى توقا, باپىش قوجامجار ۇلى, ساتىبالدى بەگايدار ۇلى سىندى حالىق كۇيشىلەرىنىڭ تۋىندىلارى مەن سۇگىر مەكتەبىنىڭ وكىلدەرى, ونىڭ ىشىندە اسقار سۇلەيمەنوۆ, مىرزاتاي جولداسبەكوۆ, كوبدىك كاربوزوۆ, جاپپاس قالامباەۆ, تولەگەن مومبەكوۆ, گەنەرال اسقاروۆ سىندى كوپتەگەن كومپوزيتورلاردىڭ كۇيلەرى كىردى. سۇگىر ءالى ۇلىنىڭ ورىندالماعان كۇيلەرى وتە كوپ.
رەۆوليۋتسياعا دەيىنگى, سوۆەت كەزەڭىندەگى, «سوزاق كوتەرىلىسى», «دالا اڭىزى» سياقتى كۇيلەرى بىرنەشە تاراۋعا بولىنەدى», دەدى اۆتور.
اۆتور كىتاپقا ەنگەن كۇيلەردى زەرتتەپ, نوتاعا ءتۇسىرۋ, ولارعا مۋزىكالىق اناليز جاساۋ سياقتى ماسەلەلەرگە 15 جىلداي ۋاقىتىن ارناعان.
ونلاين فورماتتا وتكەن جيىنعا «ازىرەت سۇلتان» مەملەكەتتىك تاريحي-مادەني قورىق-مۋزەيى ديرەكتورىنىڭ مىندەتىن اتقارۋشى ەرسىن تاجىباەۆ, مەملەكەت جانە قوعام قايراتكەرى, فيلولوگيا عىلىمدارىنىڭ دوكتورى, پروفەسسور مىرزاتاي جولداسبەكوۆ, فيلولوگيا عىلىمدارىنىڭ دوكتورى, پروفەسسور, جازۋشى قۇلبەك ەرگوبەك, قازاق ۇلتتىق ونەر ۋنيۆەرسيتەتى «دومبىرا» كافەدراسىنىڭ پروفەسسورى, كۇيشى, قازاقستاننىڭ ەڭبەك سىڭىرگەن قايراتكەرى جانعالي ءجۇزباي, ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى, سۇگىرتانۋشى ءمادي بايداۋلەتوۆ, سۇگىر ءالى ۇلىنىڭ ۇرپاعى, نەمەرەسى قالدان تۇرسىنباەۆ, قۇرمانعازى اتىنداعى ۇلتتىق كونسەرۆاتورياسىنىڭ پروفەسسورى, «حالىق اسپاپتارى» فاكۋلتەتىنىڭ دەكانى ەرجان جامەڭكەەۆ, شىمكەنت مۋزىكا كوللەدجىنىڭ اعا وقىتۋشىسى مارات اناشەۆ جانە تاريحشىلار مەن عالىمدار, جاس كۇيشىلەر, ۇلتتىق اسپاپتا ويناۋشىلار قاتىسىپ, وي-پىكىرلەرىمەن ءبولىستى.
