تاراز قالاسىنداعى «قۇرىلىس-پوليمەر» سياقتى ءوندىرىس ورنى تەك چەحيا مەن وڭتۇستىك كورەيادا عانا بار
«قۇرىلىس-پوليمەر» كاسىپورنى مەملەكەتتىك ۇدەمەلى يندۋستريالىق-يننوۆاتسيالىق دامۋ باعدارلاماسى شەڭبەرىندە جۇزەگە اسىرىلدى. بۇگىندە كاسىپورىندا 160-تان استام ادام جۇمىس ىستەيتىن بولسا, جاقىن بولاشاقتا ولاردىڭ سانى 250 ادامعا دەيىن جەتۋى مۇمكىن.
تاراز قالاسىنداعى «قۇرىلىس-پوليمەر» سياقتى ءوندىرىس ورنى تەك چەحيا مەن وڭتۇستىك كورەيادا عانا بار
«قۇرىلىس-پوليمەر» كاسىپورنى مەملەكەتتىك ۇدەمەلى يندۋستريالىق-يننوۆاتسيالىق دامۋ باعدارلاماسى شەڭبەرىندە جۇزەگە اسىرىلدى. بۇگىندە كاسىپورىندا 160-تان استام ادام جۇمىس ىستەيتىن بولسا, جاقىن بولاشاقتا ولاردىڭ سانى 250 ادامعا دەيىن جەتۋى مۇمكىن.
بۇگىندە پوليمەردەن جاسالعان ونىمدەر قۇرىلىس يندۋسترياسىندا كەڭىنەن قولدانىلادى. ونىڭ وندىرىستىك تەحنولوگياسى مەن تەحنيكالىق مىنەزدەمەسى دە «جاقسى» دەگەن باعاعا يە بولعان. مىسالى, ارميرلەنگەن پلەنكالار (ۇلدىرلەر) بۇعان دەيىن تەك قانا وڭتۇستىك كورەيا مەن چەحيادا جاسالىپ كەلگەن بولسا, ونى ەندى قازاقستاندا دا وندىرە باستاماق. ال جول قۇرىلىسىنا قولدانىلاتىن تايقى دانەكەرلەنگەن گەوسەتكالاردى جاسايتىن ەل, ءتىپتى, جوق دەسە دە بولعانداي. سونداي-اق, تورلاردى قۇرىلىس سالاسى ءۇشىن, مىسالى, قاسبەتكە تۇتۋعا, قورعانىستىق-دەكوراتيۆتىك جاعدايدا پايدالانۋعا, جامىلعى مەن قورشاۋ رەتىندە ۇستاۋعا جانە سىلاق الدىندا دا قولدانا بەرۋگە بولادى. كاسىپورىن جالپى 24 ءتۇرلى ءونىم شىعارادى.
پوليمەر ونىمدەرى تەمىر, اعاش, تەمىر-بەتون, قيىرشىق تاس سياقتى تاعى باسقا دا قىمبات قۇرىلىس ماتەريالدارىن پايدالانۋدىڭ كولەمىن قىسقارتىپ, ءتىپتى, ەلەكتر قۋاتىن ۇنەمدەۋگە دە مۇمكىندىك بەرەدى, دەيدى ماماندار. مىسالى, جاڭادان جول توسەپ, ونى مەرزىمىندە پايدالانۋعا بەرۋدە وسى تەحنولوگيانىڭ ارقاسىندا شىعىندى 20 پايىزعا دەيىن ازايتۋعا بولادى ەكەن. سونداي-اق, جولدى جاڭالاپ قايتا جوندەۋ مەرزىمىن 4-5 جىلعا ۇزارتا تۇسەتىن قاسيەتى دە بار. ارميرلەنگەن توسەنىش ۇستىنە بەتون نەمەسە تسەمەنت قۇيىپ, ونى 6-7 سانتيمەتر قالىڭدىقتا جايۋ كەزىندە ءار شارشى مەترگە 2500 تەڭگە ۇنەمدەلمەك. اتاپ ايتساق, اتالعان ونىمدەردى قولدانۋ بەس قاباتتى ءۇيدىڭ قۇرىلىسىن جۇرگىزۋ كەزىندە وزىندىك قۇنىن 10-12% تومەندەتۋگە, I كاتەگوريالى جولدىڭ 1 شاقىرىمىنىڭ قۇرىلىسىن جۇرگىزۋ كەزىندە وزىندىك قۇنىن 9-10% ارزانداتۋعا مۇمكىندىك بەرەدى. بۇل وراسان زور پايدا. كاسىپورىننىڭ ونىمدەرى قازىردىڭ وزىندە سۇرانىسقا يە. مىسالى, ونىمدەردى «باتىس ەۋروپا – باتىس قىتاي» حالىقارالىق كولىك ءدالىزىن سالۋدا شەتەلدىك جانە جەرگىلىكتى مەردىگەرلەر كوپ پايدالانۋدا.
بۇدان بولەك, جاڭا ءونىمدى قولدانۋ, قۇرىلىس ساپاسىن جاقسارتىپ, ونى ەۋروپالىق دەڭگەيگە كوتەرە تۇسەدى. جوبانى جۇزەگە اسىرۋ ءۇشىن, ياعني قاجەتتى قۇرال-جابدىقتاردى الۋعا «بيزنەستىڭ جول كارتاسى-2020» باعدارلاماسى شەڭبەرىندەگى نەسيە دە ايتارلىقتاي كومەكتەسكەن.
زاۋىتتىڭ وندىرىستىك كەشەنىنە پوليمەرلىك ءونىم وندىرەتىن 16 يننوۆاتسيالىق جەلى كىرەدى. ەندى تمد ەلدەرىندە بالاماسى جوق جاڭا ءوندىرىستىڭ وبلىستاعى الەۋمەتتىك-ەكونوميكالىق جاعدايدى بۇرىنعىدان دا جاقسارتا تۇسەتىنى انىق. جوبانىڭ قۇنى 1,8 ميلليارد تەڭگەگە باعالانىپتى. مۇندا ءبىر جىلدا 32 ميلليون شارشى مەتر پلەنكالىق ء(ۇلدىر) جانە سەتكالىق (تور) ونىمدەر شىعارىلادى. سونداي-اق, 30 مىڭ تەكشە مەتر يزولياتسيالىق پليتكالار جاسالاتىن بولادى.
كوسەمالى ساتتىباي ۇلى,
«ەگەمەن قازاقستان».
جامبىل وبلىسى.
