قاراعاندى وبلىسى تەمىرتاۋ قالاسى پروكۋرورىنىڭ كومەكشىسى قانىش مامالينوۆ كولىگىمەن ادام قاعىپ ءولتىردى. بۇل تۋرالى كتك تەلەارناسى حابارلادى.
بۇقار جىراۋ داڭعىلىمەن ءجۇرىپ كەلە جاتقان پروكۋراتۋرا قىزمەتكەرى جاياۋ جۇرگىنشىنى قاعىپ كەتىپ, ونى بىرنەشە مەترگە دەيىن ۇشىرىپ جىبەرگەن. بۇل وقيعا جاڭا جىلدىڭ باسىندا ورىن الدى.
قايتىس بولعان ازامات استاناداعى اۋرۋحانادا جاتقان كەلىنشەگى مەن ءبىر جاسار بالاسىنا بارماق بولىپ, ۆوكزالعا بەت العان ەكەن. قازىر وسى وقيعاعا بايلانىستى قىلمىستىق ءىس قوزعالىپ, تەرگەۋ امالدارى جۇرگىزىلۋدە. «ساراپتاما ناتيجەسى قانىش ءمامالينوۆتىڭ ىشىمدىك ىشپەگەنىن دالەلدەدى. ورىن العان وقيعا ابايسىزدا جاسالعان قىلمىس بولىپ ەسەپتەلەدى. جالپى, بۇعان بايلانىستى ناقتى تۇجىرىمدى تەرگەۋ امالدارى اياقتالعان سوڭ, ايتامىز», - دەيدى تەمىرتاۋ قالاسىنىڭ پروكۋرورى نۇرجان سۇگىراليەۆ.
باقىتبەك كەنەش ۇلى.
دەرەككوز: «كتك» تەلەارناسى
فوتو: Arnapress.kz.
