ءىس-شارانى كىرىسپە سوزبەن اشقان اكادەميا پرەزيدەنت-رەكتورى, قازاقستان ۇلتتىق جاراتىلىستانۋ عىلىمدارى اكادەمياسىنىڭ اكادەميگى, پروفەسسور ەرەنعايىپ وماروۆ قازاقستان تاۋەلسىزدىگىمەن بىرگە تۇلەگەن تۇڭعىش قاينار اكادەمياسىنا دا 30 جىل تولىپ وتىرعانىن ايتىپ, جوعارى وقۋ ورنىنىڭ اتقارىپ جاتقان قىزمەتىنە قىسقاشا توقتالىپ ءوتتى.
«قاينار اكادەمياسى ءوزىنىڭ قۇرىلۋى مەن دامۋى بارىسىندا جوعارى ءبىلىمدى بىلىكتى كادرلارمەن قامتاماسىز ەتۋدە ەلەۋلى ۇلەس قوسىپ كەلەدى. اشىلعالى بەرى وقۋ ورداسىنىڭ قابىرعاسىنان 30 مىڭعا جۋىق تۇلەك تۇلەپ ۇشتى. ولار مادەنيەت, ءبىلىم مەن عىلىم, ەكونوميكا سالالارىندا جانە باسقارۋ ۇيىمدارىندا جەمىستى ەڭبەك ەتىپ جاتىر. مەكتەپتەن اكادەمياعا دەيىنگى ۇزدىكسىز ءبىلىم بەرۋ دەڭگەيىن قالىپتاستىرۋ ماقساتىندا اكادەميا جانىندا «باكالاۆريات» ورتا مەكتەبى مەن «قاينار» كوللەدجى جۇمىس ىستەيدى. بولون ۇدەرىسىنە ءۇن قوسىپ, الەمدىك ءبىلىم مەن عىلىم تالاپتارىنا ساي بولۋ ءۇشىن ءبىلىم ورداسى الەمنىڭ ايتۋلى 60-تان استام ۋنيۆەرسيتەتىمەن كەلىسىمشارت جاساسىپ, حالىقارالىق ىنتىماقتاستىقتى دامىتۋ اياسىنداعى بىرلەسكەن جوبالاردى ىسكە اسىرىپ كەلەدى. اكادەميا عالىمدارى 30 جىل ىشىندە ەكونوميكا, زاڭ, ءتىل ءبىلىمى, پەداگوگيكا پەن پسيحولوگيا, شەت تىلدەرى, جۋرناليستيكا مەن ينفورماتيكا سالالارى بويىنشا 1 مىڭعا جۋىق مونوگرافيالىق ەڭبەكتەر, وقۋلىقتار, وقۋ-ادىستەمەلىك قۇرالدار مەن ەلەكتروندى وقۋ باسىلىمدارىن جازدى. مۇنىڭ ءوزى جوعارى وقۋ ورنىنىڭ پروفەسسور-وقىتۋشىلىق قۇرامىنىڭ الەۋەتى جوعارى ەكەنىن اڭعارتسا كەرەك. ال بۇگىن تانىستىرىلىمى وتكەلى تۇرعان جاڭا كىتاپتار دا ۋنيۆەرسيتەتتىك ءبىلىم بەرۋ تالاپتار ۇدەسىنەن شىعاتىن قۇندى ەڭبەكتەر دەپ سەنىمدى تۇردە ايتۋعا بولادى», دەدى رەكتور.
اكادەميانىڭ عىلىمي جۇمىستارى بويىنشا پرورەكتورى, ۇعا-نىڭ قۇرمەتتى اكادەميگى, ەكونوميكا عىلىمدارىنىڭ دوكتورى, پروفەسسور ءابدىجاپار ساپارباەۆ رەكتور تىلگە تيەك ەتكەن اكادەميا عالىمدارىنىڭ 30 جىل ىشىندە دايىنداعان ەڭبەكتەرىنە قىسقاشا شولۋ جاساپ, ءبىلىم بەرۋدىڭ ءارتۇرلى باعىتتارىنا ارنالعان جاڭا كىتاپتاردىڭ مازمۇنىنا ەرەكشە توقتالدى.
«قاينار اكادەمياسىنىڭ ىرگەتاسى قالانعالى بەرى مۇندا ەلىمىزدىڭ ايگىلى عالىمدارى مەن پەداگوگتەرى ەڭبەك ەتىپ, وزدەرىنىڭ عىلىمي مۇرالارىن كوپشىلىككە ۇسىندى. اتاپ ايتقاندا, فيلولوگتەر ش.سارىباەۆ, ءو.ايتباەۆ, ن.ورالباەۆا, ك.قۇرماناليەۆ; زاڭگەرلەر ە.قايىرجانوۆ, م.بايماحانوۆ, ز.اشيتوۆ; ەكونوميستەر يا.اۋباكىروۆ, ا.قوشانوۆ, ءا.ساپارباەۆ; تاريحشىلار ج.يبراشەۆ, ك.حافيزوۆا, ت.تىلەۋوۆ; فيلوسوفتار ج.ءابدىلدين, ا.نىسانباەۆ, ا.قاسىمجانوۆ; پەداگوگتەر مەن پسيحولوگتەر ا.احمەتوۆ, س.جاقىپوۆ, ح.شەريازدانوۆا, س.ۇزاقباەۆا, ز.ماداليەۆا, م.پەرلەنبەتوۆ جانە وزگە دە كوپتەگەن عىلىم مەن ءبىلىمنىڭ وكىلىن اتاپ وتۋگە بولادى. عىلىمي-زەرتتەۋ جۇمىستارىن جۇرگىزۋدە, عىلىمي مونوگرافيالار مەن وقۋلىقتار جازىپ, ولاردى شىعارۋدا اكادەميانىڭ زياتكەرلىك جانە كادرلىق الەۋەتى زور. ۇجىمىمىزدا جۇمىس ىستەيتىن قازاقستاندىق بەلگىلى عالىمدار سوڭعى جىلدارى كوپتەگەن عىلىمي مونوگرافيا مەن وقۋلىقتى جارىققا شىعارۋ ىسىندە بەلسەندىلىك تانىتىپ ءجۇر. ولار: تاريح جانە وركەنيەت تەورياسى مەن ۇلتتىق تاريح سالاسىندا ە.وماروۆ, گ.قادىرقۇلوۆا, ت.تىلەۋوۆ; ەكونوميكا, قارجى جانە مەنەدجمەنت بويىنشا ءا.ساپارباەۆ, س.ابدىبەكوۆ, ك.سىزدىقوۆا, گ.قالياكپاروۆا, ە.گريدنەۆا; قۇقىق سالاسىندا ب.قالاعانوۆ, ن.اپاحاەۆ; تىلدەر جانە قازاق فيلولوگياسىندا گ.مۇحامەتقاليەۆا, ا.قۇرماناليەۆا, ف.سامەتوۆا, گ.بالتاباەۆا, ا.مۇحتاروۆا; پەداگوگيكا مەن پسيحولوگيادا س.وماروۆا, م.پەرلەنبەتوۆ, ل.كومەكباەۆا, و.فەدوروۆيچ, م.ەركىنبەكوۆا جانە باسقالار. كەلەشەكتە دە اكادەميانىڭ پروفەسسور-وقىتۋشىلارى عىلىمي مونوگرافيالار مەن وقۋلىقتار جازۋدان قول ۇزبەي, قالىپتاسقان يگى ءداستۇردى ءارى قاراي جالعاستىراتىنىنا سەنىمىمىز مول» دەي كەلە, اكادەميك ءابدىجاپار جۇمان ۇلى جاڭا وقۋ جىلىندا جارىق كورەتىن عىلىمي مونوگرافيالىق ەڭبەكتەردىڭ جوسپارىمەن دە تانىستىرا كەتتى.
ءىس-شاراعا نۇر-سۇلتان قالاسىنان ارنايى كەلىپ قاتىسقان قازاقستان ۇلتتىق جاراتىلىستانۋ عىلىمدارى اكادەمياسىن ۆيتسە-پرەزيدەنتى (قازۇجعا), ۇعا اكادەميگى, فيلولوگيا عىلىمدارىنىڭ دوكتورى, پروفەسسور كارىمبەك قۇرماناليەۆ قاينار اكادەمياسىنىڭ عالىمدارى قازۇجعا اكادەمياسىنىڭ بەلسەندى مۇشەلەرى ەكەنىن ايتا كەلىپ, قوس اكادەميا عالىمدارىنىڭ بىرلەسىپ ورىنداعان عىلىمي جوبالارى, زەرتتەۋلەرى جانە مونوگرافيالىق ەڭبەكتەرى قازاقستاندىق عىلىمدى ودان ءارى دامىتۋعا قوسقان سۇبەلى ۇلەسى دەپ باعالادى.
كىتاپتار تۇساۋكەسەرىندە ءسوز العان «قازاق پسيحولوگيالىق قوعامى» رەسپۋبليكالىق قوعامدىق بىرلەستىگىنىڭ پرەزيدەنتى, پسيحولوگيا عىلىمدارىنىڭ دوكتورى, پروفەسسور مۇقان پەرلەنبەتوۆ پەن پروفەسسورلار سالتانات وماروۆا جانە باقىتبەك قالاعانوۆ عالىمداردىڭ جاڭا تۋىندىلارىن جوعارى باعالاپ, ءبىلىم الۋشىلاردىڭ كادەسىنە جارار قۇندى كىتاپتار ەكەنىن ايتتى.
تۇساۋكەسەر ءراسىمىن قورىتىندىلاعان قاينار اكادەمياسىنىڭ پرەزيدەنت-رەكتورى ەرەنعايىپ وماروۆ قازاقستان تاۋەلسىزدىگىنىڭ 30 جىلدىعىنا وراي اكادەميا عالىمدارى شىعارعان 1000 كىتاپ ۇلتتىق كىتاپحاناسىنا تارتۋ ەتىلەتىنىن ءمالىم ەتتى.
ءىس-شارا اكادەميا ۇيىمداستىرعان ء«بىلىم ساپاسىن قامتاماسىز ەتۋدەگى زاماناۋي ترەندتەر» اتتى حالىقارالىق عىلىمي-تاجىريبەلىك كونفەرەنتسياعا ۇلاستى.
فاۋزيا سامەتوۆا,
فيلولوگيا عىلىمدارىنىڭ
كانديداتى, پروفەسسور
