سيريانىڭ ۇلتتىق وپپوزيتسيالىق جانە رەۆوليۋتسيالىق كۇشتەرىنىڭ كواليتسياسى 5 قاڭتار كۇنى وزدەرىنىڭ پرەزيدەنتىن قايتا سايلادى. مۇنى ۇيىمنىڭ ءباسپاسوز حابارلاماسىنا سىلتەمە جاساي وتىرىپ, «فرانس-پرەسس» اگەنتتىگى جاريا ەتتى. ءسويتىپ, وپپوزيتسيالىق قۇرىلىمعا العاش رەت 2013 جىلدىڭ شىلدەسىندە پرەزيدەنت بولىپ سايلانعان احماد جاربا باسشىلىق جاسايتىن بولدى.
ەندى ا.جاربا ۇلتتىق كواليتسياعا تاعى التى اي جەتەكشىلىك ەتەتىن بولادى. وعان تۇركيانىڭ ىستامبۇل قالاسىندا ءوتىپ جاتقان باس اسسامبلەيانىڭ 65 مۇشەسى ءوز داۋىستارىن بەردى. ا.جاربانىڭ قارسىلاسى, سيريانىڭ بۇرىنعى پرەمەر-ءمينيسترى, ەلدى 2012 جىلعى تامىزدا تاستاپ شىققان رياد حيدجاب 13 داۋىس از العان. 44 جاستاعى ا.جاربا ساۋد ارابياسىنا جاقىن ساياساتكەر بولىپ سانالادى. وسى ارالىقتا سيريانىڭ وپپوزيتسيالىق كواليتسياسىنىڭ ءوزى تەرەڭ داعدارىستى باستان كەشىرۋدە. ونىڭ كوپتەگەن قاتىسۋشىلارى ۇيىم قازىرگى كەزدە وزدەرىنىڭ مۇددەسىن قورعامايدى دەپ ەسەپتەيدى.
شاراينا
سيريانىڭ ۇلتتىق وپپوزيتسيالىق جانە رەۆوليۋتسيالىق كۇشتەرىنىڭ كواليتسياسى 5 قاڭتار كۇنى وزدەرىنىڭ پرەزيدەنتىن قايتا سايلادى. مۇنى ۇيىمنىڭ ءباسپاسوز حابارلاماسىنا سىلتەمە جاساي وتىرىپ, «فرانس-پرەسس» اگەنتتىگى جاريا ەتتى. ءسويتىپ, وپپوزيتسيالىق قۇرىلىمعا العاش رەت 2013 جىلدىڭ شىلدەسىندە پرەزيدەنت بولىپ سايلانعان احماد جاربا باسشىلىق جاسايتىن بولدى.
ەندى ا.جاربا ۇلتتىق كواليتسياعا تاعى التى اي جەتەكشىلىك ەتەتىن بولادى. وعان تۇركيانىڭ ىستامبۇل قالاسىندا ءوتىپ جاتقان باس اسسامبلەيانىڭ 65 مۇشەسى ءوز داۋىستارىن بەردى. ا.جاربانىڭ قارسىلاسى, سيريانىڭ بۇرىنعى پرەمەر-ءمينيسترى, ەلدى 2012 جىلعى تامىزدا تاستاپ شىققان رياد حيدجاب 13 داۋىس از العان. 44 جاستاعى ا.جاربا ساۋد ارابياسىنا جاقىن ساياساتكەر بولىپ سانالادى. وسى ارالىقتا سيريانىڭ وپپوزيتسيالىق كواليتسياسىنىڭ ءوزى تەرەڭ داعدارىستى باستان كەشىرۋدە. ونىڭ كوپتەگەن قاتىسۋشىلارى ۇيىم قازىرگى كەزدە وزدەرىنىڭ مۇددەسىن قورعامايدى دەپ ەسەپتەيدى.
ءبىر-ءبىرىن گازەت ارقىلى ايىپتادى
جاپونيا مەن قىتاي ەلشىلەرى لوندوندا «دەيلي تەلەگراف» گازەتىنە ماقالالار جازىپ, وندا ءبىر-ءبىرىنىڭ ەلدەرى جۇرگىزىپ وتىرعان ساياساتتارىن سىناعان ەدى. قىتاي ديپلوماتى ليۋ ءسياوميننىڭ ماقالاسى 1 قاڭتار كۇنى جاريالانسا, جاپوندىق ديپلومات كەيچي ءحاياشيدىڭ جاۋاپ ماقالاسى 5 قاڭتار كۇنى شىققان بولاتىن.
حاياشي دە سياومين سياقتى قاراما-قارسى تاراپتىڭ ساياساتىن سىن تەزىنە العان. ديپلوماتيالىق ميسسيالاردىڭ باسشىلارى ءبىر-ءبىرىنىڭ ەلدەرىن قارۋلى قاقتىعىسقا الىپ كەلۋى ىقتيمال ميليتاريستىك ساياسات جۇرگىزىپ وتىر دەپ ايىپتاعان. اتاپ ايتقاندا, جاپونيا ەلشىسى وتكەن جىلدىڭ قاراشا ايىندا قىتايدىڭ بىرجاقتى نەگىزدە شىعىس-قىتاي تەڭىزىندە جاڭا اۋە شابۋىلىنان قورعانىس ايماعىن ەنگىزگەنىن ەسكە سالعان. ەلشىنىڭ پىكىرىنشە, بۇل قىتاي تاراپىنان كەزەكتى ارانداتۋ ارەكەتى بولىپ تابىلادى. ال قىتاي ەلشىسى بولسا, جاپونيا پرەمەر-ءمينيسترى سيندزو ابەنىڭ بىلتىرعى جەلتوقساندا جاپوندىق اسكەري قىلمىسكەرلەر جەرلەنگەن ياسۋكۋني حرامىنا بارعانىن جازعىرا جاماندايدى.
قىسقا قايىرىپ ايتقاندا:
*اقش-تىڭ شىعىسىندا قاتتى اياز بولىپ تۇر. ماسەلەن, ەل استاناسى – ۆاشينگتون قالاسىندا سىناپ باعاناسى مينۋس 30 گرادۋستى كورسەتكەن. ءۇسىپ ولگەندەر جەتىپ-ارتىلادى. مۇنىمەن قوسا, بۇرشاق جاۋىپ, جۇرتشىلىقتى ابىگەرگە تۇسىرگەن. سۋىق اۋا رايى ەلدىڭ اتالعان ايماعىندا ءالى دە جالعاسادى دەپ كۇتىلۋدە.
*وتكەن جەكسەنبى كۇنى قىتايدىڭ نەگىزىنەن مۇسىلماندار تۇراتىن نينسيا-حۋەي اۆتونوميالىق اۋدانىنداعى گۋيۋان قالالىق وكرۋگىندەگى مەشىتتە بولعان ءدىني ءراسىم كەزىندە 14 ادام قازا تاپقان. «سينحۋا» اگەنتتىگىنىڭ حابارلاۋىنشا, وقيعاعا ادامداردىڭ قىسپاعى سەبەپ بولعان. تاعى 10 ادام زارداپ شەكسە, تورتەۋىنىڭ جاعدايى وتە اۋىر كورىنەدى.
*موزامبيكتىڭ تۋماسى, اتاقتى پورتۋگاليالىق فۋتبولشى ەيسەبيو 72 جاسقا قاراعان شاعىندا كوز جۇمدى. ول ءوزىنىڭ ءۇيىندە قايتىس بولعان. ەيسەبيو 1966 جىلى لوندوندا وتكەن الەم چەمپيوناتىنىڭ قولا جۇلدەگەرى. جەرگىلىكتى «بەنفيكا» فۋتبول كلۋبىنىڭ ساپىندا ەلدىڭ 11 دۇركىن چەمپيونى اتانعان.
وزىنە-ءوزى قول سالعان سەكىلدى
سولتۇستىك كورەيا كوسەمى كيم چەن ىننىڭ تاتەسى وزىنە ءوزى قول سالعان. بۇل تۋرالى ۇكىمەتتەگى دەرەك كوزىنە سىلتەمە جاساعان وڭتۇستىككورەيالىق «چوسون يلبو» باسىلىمى حابارلادى. مۇنداي مالىمدەمە جاساۋعا كيم گەن ءحيدىڭ ۇزاق ۋاقىت كوپشىلىك الدىنا شىقپاعانى سەبەپ بولىپ وتىرعان سەكىلدى.
رەسمي پحەنيان بۇل تۋرالى ەشقانداي رەسمي اقپارات تاراتقان جوق. ماسەلەن, وتكەن جىلدىڭ جەلتوقسان ايىندا كيم گەن حي ءوزىنىڭ اعاسى كيم چەن ءيردىڭ قايتىس بولۋىنىڭ ەكى جىلدىعىنا ارنالعان شارالار بارىسىندا كوپشىلىك كوزىنە تۇسپەگەن. بۇل ونىڭ دەنساۋلىعىنىڭ ىقتيمال ناشارلاۋى نەمەسە سولتۇستىك كورەيانىڭ كوپشىلىك ومىرىنە قاتىسۋدان باس تارتۋعا ءماجبۇر بولۋى تۋرالى اڭگىمەلەر تۋىنداتقان ەدى. كيم چەن ىننىڭ تاتەسى سوڭعى رەت جۇرتشىلىق الدىنا وتكەن جىلدىڭ قىركۇيەگىندە, ياعني كحدر-ءدىڭ قۇرىلۋىن مەرەكەلەۋ كەزىندە شىقسا كەرەك. ال كورەيا كوسەمى جەزدەسى چان سون تحەكتى بىلتىرعى 12 جەلتوقساندا اتىپ ولتىرتكىزگەن بولاتىن.
ءولىم سەبەبى ازىرشە بەلگىسىز
«قىتاي تەمىرجولى كومپانياسىنىڭ» پرەزيدەنتى باي چجۋنجەن ءوزىن ءوزى ولتىرگەن. بۇعان دەيىن بيزنەسمەن وقىس وقيعا سالدارىنان قازا تاپتى دەلىنگەن بولاتىن. ناقتىلانعان اقپاراتقا سايكەس, باي چجۋنجەن تەرەزەدەن سەكىرىپ كەتكەن. ونىڭ تۋىسقاندارىنىڭ ايتۋلارىنشا, 53 جاستاعى بيزنەسمەن سوڭعى جىلدارى دەپرەسسيادان زارداپ شەگىپ كەلىپتى.
بۇقارالىق اقپارات قۇرالدارىنىڭ دەرەكتەرى بويىنشا, پرەزيدەنتتىڭ كۇيزەلىستىك جاعدايىنىڭ سەبەپتەرىنىڭ ءبىرى «قىتاي تەمىرجولى كومپانياسى» دۋشار بولعان جانە ودان قۇتىلۋعا ەش مۇمكىندىك تاپپاعان ۇلكەن قارىز بولۋى ىقتيمال. مىسالى, فيرمانىڭ كەيبىر بولىمشەلەرى ءوز قىزمەتكەرلەرى مەن جۇمىسشىلارىنا 2013 جىلدىڭ سوڭعى ايلارىنان بەرى ءجوندى ەڭبەكاقى تولەي الماپتى. ال «قىتاي تەمىرجولى كومپانياسىن» ۇكىمەت باقىلاۋىندا ۇستايدى. فيرما باسشىلىعىنىڭ قاندايدا ءبىر جەمقورلىققا قاتىستىلىعى تۋرالى ەشتەڭە ايتىلمايدى.
شۆەيتسارياعا قونىس اۋداردى
«يۋكوس-تىڭ» بۇرىنعى باسشىسى ميحايل حودوركوۆسكي تۇرمەدەن بوساعان ساتىنەن باستاپ باسپانا رەتىندە پايدالانىپ كەلگەن بەرليندەگى وتەلدەن زايىبى مەن كىشى بالالارى تۇرىپ جاتقان شۆەيتسارياعا قونىس اۋداردى. حودوركوۆسكيدىڭ ءباسپاسوز حاتشىسى ونىڭ قازىر شۆەيتساريانىڭ ناقتى قاي قالاسىندا ەكەنىن ناقتىلاعان جوق.
30 جەلتوقساندا بەرليندەگى شۆەيتساريا ەلشىلىگىندە حودوركوۆسكيگە 3 ايعا شەنگەن ۆيزاسى بەرىلگەن ەدى. قۇجاتتاردى راسىمدەۋ ءۇشىن ءبىر اپتا ۋاقىت كەتكەن. كەيبىر دەرەك كوزدەرى «يۋكوس-تىڭ» بۇرىنعى باسشىسى شۆەيتسارياعا تۇراقتى قونىستانۋ مۇمكىندىگىن قاراستىرىپ جاتقانىن كولدەنەڭ تارتادى. حودوركوۆسكيدىڭ 10 جىل تۇرمەگە وتىرىپ شىققانى, وتكەن جىلدىڭ قاراشا ايىندا وتباسىلىق جاعدايىنا بايلانىستى رەسەي پرەزيدەنتى ۆلاديمير پۋتينگە وتىنىشپەن شىعىپ, ونىڭ راقىمشىلىعىن العانى بەلگىلى. ءوزىنىڭ ەكونوميكالىق قىلمىس جاساعانىن مويىنداماعان حودوركوۆسكي بۇگىندە «كورمەگەنىم رەسەي بولسىن» دەپ وتىرعان سىڭايلى.
ينتەرنەت ماتەريالدارى نەگىزىندە ازىرلەندى.
