ۇقك مالىمەت بويىنشا, قازاقستان رەسپۋبليكاسى ءۇشىن نەگىزگى ەسىرتكى قاۋپىنىڭ ءبىرى - اۋعان فاكتورى. اۋعانستانداعى تۇراقسىز احۋال ورتالىق ازيا ەلدەرى ارقىلى رەسەي مەن ەۋروپاعا ەسىرتكى اعىنىنىڭ جاندانۋىنا ىقپال ەتەدى.
قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى 2021 جىلدىڭ ماۋسىمىندا شەتەل سەرىكتەستەرىمەن ءوزارا ءىس-قيمىلدا قىرعىزستان مەن وزبەكستاننان قازاقستانعا اپيىن ەسىرتكىسىنىڭ كونترابانداسىن انىقتاۋ بويىنشا 2 حالىقارالىق وپەراتسيا جۇرگىزدى.
«ارنايى وپەراتسيا ناتيجەسىندە 12,3 كەلى ەسىرتكى قۇرالىن قازاقستانعا اكەلۋگە جول بەرىلمەدى. وزبەكستان مەن قازاقستان اۋماعىندا ترانسۇلتتىق قۇرىلىمداردىڭ 4 قاتىسۋشىسى قىلمىس ۇستىندە ۇستالدى», دەلىنگەن حابارلامادا.
قىرعىز رەسپۋبليكاسىنان جەتكىزىلگەن ەسىرتكىنى جاسىرىن ورىننان الۋ كەزىندە تاراز قالاسىنىڭ ەسىرتكى كۋرەرى – بۇرىن وسىعان ۇقساس ەسىرتكى قىلمىسىن جاساعانى ءۇشىن سوتتالعان قازاقستان رەسپۋبليكاسىنىڭ ازاماتى ۇستالدى.
«ايىپتالۋشىلار كىناسىن مويىنداپ, تەرگەۋمەن ىنتىماقتاسۋعا كەلىسىم بەردى. ەسىرتكى قىلمىسى ءۇشىن جوعارعى مەرزىم 20 جىل نە مۇلكىن تاركىلەۋمەن ءومىر بويىنا باس بوستاندىعىنان ايىرۋ. ەسىرتكى ترافيگىنە قاتىسى بار وزگە دە ادامداردى انىقتاۋ بويىنشا تەرگەۋ شارالارى جالعاسىپ جاتىر», دەلىنگەن ۇقك حابارلاماسىندا.
