حالقىنا قورعان, ۇلتىنا ۇران بولعان تاما ەسەت باتىر كوكى ۇلىنىڭ قازاق ەلىنىڭ تاۋەلسىزدىگى جولىنداعى ەرلىك ىستەرى ۇرپاقتار جادىندا ماڭگى ساقتالادى. جوڭعار شاپقىنشىلىعى كەزىندە كىشى ءجۇزدىڭ قالىڭ قولىن باسقارىپ, قولباسشىلىعىمەن تانىلعان باتىر بابامىزدىڭ 325 جىلدىعى مەرەكەلەنگەندە باسىنا ساۋلەتى كەلىستى كەسەنە تۇرعىزىلىپ, تۇنەمەلىك ءۇي سالىنعان-دى.
حالقىنا قورعان, ۇلتىنا ۇران بولعان تاما ەسەت باتىر كوكى ۇلىنىڭ قازاق ەلىنىڭ تاۋەلسىزدىگى جولىنداعى ەرلىك ىستەرى ۇرپاقتار جادىندا ماڭگى ساقتالادى. جوڭعار شاپقىنشىلىعى كەزىندە كىشى ءجۇزدىڭ قالىڭ قولىن باسقارىپ, قولباسشىلىعىمەن تانىلعان باتىر بابامىزدىڭ 325 جىلدىعى مەرەكەلەنگەندە باسىنا ساۋلەتى كەلىستى كەسەنە تۇرعىزىلىپ, تۇنەمەلىك ءۇي سالىنعان-دى.سودان بەرى باتىرلىعىمەن قوسا, اۋليەلىلىگىنە ءيىسى قازاق باس يگەن ەسەت باتىردىڭ زيراتىنا ءتاۋ ەتۋشىلەر, دەرتىنە شيپا ىزدەپ كەلۋشىلەردىڭ لەگى استە دە ۇزىلگەن ەمەس. وسىنى ەسكەرگەن وبلىس اكىمى ارحيمەد مۇحامبەتوۆتىڭ باستاماسىمەن وسى جەردى تاريحي, رۋحاني-مادەني ورىنعا اينالدىرۋ قولعا الىندى. جاقىندا تاما ەسەت باتىردىڭ مەموريالدىق كەشەنى اشىلدى. كەشەننىڭ اشىلۋىنا كەزىندە ءوڭىردىڭ ەكونوميكالىق-الەۋمەتتىك جانە مادەني-رۋحاني سالالارىنىڭ دامۋىنا ۇلەس قوسقان سوعىس جانە ەڭبەك ارداگەرلەرى قاتىستى.
باتىردىڭ مەموريالدىق كەشەنىنىڭ سالتاناتتى اشىلۋىندا ءسوز العان ءوڭىر باسشىسى ارحيمەد مۇحامبەتوۆ ەلباسى نۇرسۇلتان نازارباەۆتىڭ ۇلتتىق تاريحىمىزدى تۇگەندەۋ جانە مادەني مۇرالارىمىزدى ۇلىقتاۋدى باستى نازاردا ۇستاپ كەلە جاتقانىنا توقتالا كەلىپ, جينالعانداردى باتىر بابامىزعا ارنالعان مەموريالدىق كەشەننىڭ پايدالانۋعا بەرىلۋىمەن قۇتتىقتادى.
شىعىس ۇلگىسىندە كۇمبەزدەلىپ سالىنعان مەموريالدىق كەشەن زاماناۋي جابدىقتالعان, الىس-جاقىننان كەلەتىن قوناقتار ءۇشىن بارلىق جاعداي جاسالعان. كەشەندە 250 ورىندىق اسحانا, نامازحانا, قوناقتار ءۇشىن جاتاقحانا بار. وسىندا ەسەت باتىردىڭ مۇراجايى دا ورنالاسقان. قازىر وسى مۇراجايدى باتىرعا قاتىستى ءجادىگەرلەرمەن, ول ءومىر سۇرگەن كەزەڭنىڭ بىرەگەي ەكسپوناتتارىمەن تولىقتىرۋ جۇمىستارى جۇرگىزىلۋدە. مۇراجايعا باتىر بابامىزدىڭ بەس قارۋىن قويۋ دا ويلاستىرىلۋدا. كەشەن قۇرىلىسىنا 144 ميلليون تەڭگە قارجى جۇمسالعان. ونىڭ باسىم بولىگى وبلىستىق بيۋدجەتتەن بولىنگەنىمەن, دەمەۋشىلەر دە قارجىلاي قولداۋ كورسەتكەن. بولاشاقتا كۇرە جولدان وسىندا كەلەتىن جولدى جوندەۋ, ەسەت باتىر كەسەنەسىنە كوتەرىلەتىن باسپالداقتاردى كەڭەيتىپ, قالپىنا كەلتىرۋ قولعا الىناتىن بولدى. مەموريالدىق كەشەننىڭ اشىلۋ راسىمىندە ەسەت باتىر بابامىزعا ارنالىپ اس بەرىلىپ, قۇران باعىشتالدى. شاراعا شاقىرىلعان ەڭبەك جانە سوعىس ارداگەرلەرىنە وبلىس اكىمىنىڭ باعالى سىيلىقتارى تاپسىرىلدى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.
