ەكونوميكا • 08 شىلدە، 2021

ەندىگى ءۇمىت – ەلەكتروندى ساۋدادا

109 رەت كورسەتىلدى

قازاقستان قىركۇيەكتە ەاەو-دا سىرتقى ەلەك­­­تروندى ساۋدانى­ دامىتۋعا ارنالعان «ەلە­ك­تروندى ساۋدا وپە­­­را­­­تور­­لارى ينس­تيتۋتى» جوبا­سىن قاناتقاقتى رە­­­جىم­­­دە ىسكە قوسۋدى جوسپار­لاپ وتىر.

بۇعان دەيىن ەۋرازيالىق ەكو­نوميكالىق كوميسسيا وداققا مۇشە ەلدەردىڭ اۋماعىندا بىر­ىڭعاي وپەراتور قۇرۋدى ۇسىن­­­عان بولاتىن. ونداعى ماقسات – شەتەلدىك ينتەرنەت-الاڭ­داردان تاپسىرىس ارقىلى جەتكىزىلگەن جەكە تۇتىنۋعا ار­نالعان تاۋارلاردى باقىلاۋ. جوبا قاناتقاقتى رەجىمدە 2021 جىلدىڭ 1 شىل­دەسىندە ىس­كە قوسىلۋى كە­رەك-ءتىن. الايدا بۇ­دان ازىرشە ەشقانداي حابار جوق.

جالپى، قازاقستان ترانس­شەكارالىق ەلەكتروندى ساۋدانى ەكى باعىتتا دامىتۋعا مۇددەلى. ءبىرىنشىسى – ەاەو شەڭ­بەرىندە ەلەكتروندى ساۋ­­دانى رەتتەۋ، ەكىنشىسى – وتان­دىق تاۋار وندىرۋشىلەردى حا­لىق­ارالىق ەلەكتروندى ساۋدا الاڭدارىنا شىعارۋ. ساۋدا جانە ينتەگراتسيا ۆيتسە-ءمينيسترى اسەل جاناسوۆانىڭ ايتۋىنشا، وداققا مۇشە ەلدەردەگى سىرت­قى ە-commerce ءىس جۇزىندە رەتتەلمەيدى. مۇنداي جاعداي الەمنىڭ كوپتەگەن ەل­دەرىندە قالىپتاسىپ وتىر. وسى­نىڭ سالدارىنان ءار مەملەكەت قاجەتتى زاڭدى وزدەرى ازىرلەۋگە ءماجبۇر.

– ەاەو شەڭبەرىندە سىرت­قى ەلەكتروندى ساۋدا سالاسىن­دا قاناتقاقتى جوبا جۇزەگە اسى­رىلماق. جوبا الداعى قىر­كۇيەكتە قاناتقاقتى رەجىمدە جۇ­­مىسىن باستايدى. ال 2022 جىلدىڭ قاڭتارىندا تولىقتاي ىسكە قوسىلادى. دايىندىق جۇ­مىستارى جۇرگىزىلۋدە. قازىر­دىڭ وزىندە ەاەو ەلدەرى اراسىندا اينالىمدا جۇرەتىن بارلىق ترانسشەكارالىق ونلاين-تاۋارلار قاناتقاقتى جو­با شەڭبەرىندە ەلەكتروندى ساۋدانىڭ بىرىڭعاي وپەراتورى ارقىلى وتەتىنى تۋرالى ال­دىن الا ۋاعدالاستىق بار. بولا­شاقتا جوبا ادامداردىڭ كە­دەندىك الىمدارعا، باجدار­دى تولەۋگە جانە باسقا دا شى­عىن­دارىن ايتارلىقتاي ازايتۋعا مۇم­كىندىك بەرەدى، – دەدى ۆيتسە-مينيستر Astana Finance Days فورۋمىندا.

اسەل جاناسوۆانىڭ ايتۋىنشا، ەكىنشى باعىت بويىنشا 2020 جىلى Alibaba پلاتفورماسىنا 100 قازاقستاندىق كومپانيا شىعارىلدى. ونىڭ 71-ءى بۇگىندە پلاتفورمادا ساۋدامەن بەلسەندى تۇردە اينالىسۋدا. جالپى، كومپانيالار Alibaba-عا شىق­قان ساتتەن باستاپ 18،1 ملن دول­لار­عا ەكسپورتتىق كەلىسىم­شارت جا­سالعان.

–  سونداي-اق Amazon پلاتفورماسىندا وتاندىق ساتۋ­شى­لاردىڭ ءوز قىزمەتىن جۇزەگە اسىرۋعا رۇقسات الىندى. ال eBay پلاتفورماسى بويىنشا حالىقارالىق ساۋدا ورتا­لىعى (ITC) USAID-پەن بىرلە­سىپ قازاقستان، وزبەكستان، قىر­عىزستان، تاجىكستان جانە تۇر­كىمەنستان ەلدەرىندەگى شاعىن جانە ورتا بيزنەس ءۇشىن ورتالىق ازيا ساۋدا حابىن ىسكە قوستى، – دەپ ناقتىلادى ءا.جاناسوۆا.

ۆيتسە-ءمينيستردىڭ مالى­مەتىنشە، 2021 جىلدىڭ ءبىرىنشى جارتىسىندا قازاق­ستاندىق نا­رىقتاعى ونلاين-ساتىپ الۋ­شى­لاردىڭ سانى 4،6 ملن ادامدى قۇراعان. قازپوشتانىڭ دەرە­گىنشە، بىلتىر ولاردىڭ سانى 3،8 ملن ادامعا تەڭ بولدى. ساۋدا جانە ينتەگراتسيا مينيسترلىگىنىڭ بولجامىنشا، اتالعان كورسەتكىش 2025 جىلعا قاراي 7،7 ملن ادام­عا جەتۋى كەرەك. ال وعان دەيىن قازاقستاننىڭ ينتەرنەت الاڭ­دارىنداعى ساتىپ الۋ كولە­مىن 106،2 ملن داناعا دەيىن جەت­كىزۋ جوسپارلانىپ وتىر. سونداي-اق ەلەكتروندى ساۋداداعى قولما-قول اقشاسىز تولەم ۇلەسىن 90 پايىز­عا دەيىن ارتتىرۋ مىندەتى تۇر.

قازپوشتانىڭ دەرەگىنشە، بىلتىر ەلەكتروندى ساۋدانىڭ ۇلەسى 2 ەسە ءوسىپ، جالپى ساۋدا كولەمىنىڭ 9،7 پايىزىن نەمەسە 1،1 ترلن تەڭگەنى قۇرادى. كورسەتكىش 2019 جىلى 3،7 پايىز بولعان ەدى. مينيسترلىك جاڭا تەحنولوگيالاردىڭ ءوسۋ قارقىنى مەن دامۋىن ەسكەرە وتىرىپ، 2025 جىلعا قاراي ەلەكتروندى ساۋدانىڭ ۇلەسىن 15 پايىزعا جەتكىزۋدى مەجەلەپ وتىر.

– ەلەكتروندى ساۋدا­ ەكو­جۇيەسىن ءۇش قۇرالدىڭ كومەگىمەن دامىتۋ جوسپارلانعان. ءبىرىن­شىسى – ەلەكتروندى ساۋدانى ىن­تالاندىرۋ جانە شاعىن جانە ورتا بيزنەستى وقىتۋ. ەكىن­شىسى – جەتكىزۋ قىزمەتى مەن لوگيس­تيكالىق سەرۆيستەردى دا­مىتۋ. ءۇشىنشىسى – ونلاين-ترانس­شە­كارالىق ساۋدانى دامىتۋ، – دەدى اسەل جاناسوۆا.

Mastercard كومپانياسىنىڭ ورتالىق ازياداعى باس ديرەكتورى رافال ترەپكانىڭ پىكىرىنشە، 2021 جىلى پاندەمياعا بايلانىستى ساتىپ الۋشىلاردىڭ مىنەز-قۇلقى وزگەردى.

– سوندىقتان بيزنەس كليەنتتەرگە قىزمەت كورسەتۋدە ين­نو­ۆاتسيالار ۇسىنۋ ءۇشىن تسيفر­لىق جانە تەحنولوگيالىق سەر­ۆيستەردى ەنگىزۋدى جەدەلدەتەدى. كاسىپكەرلەر كەز كەلگەن جەردە جانە كەز كەلگەن ۋاقىتتا جەكە ساۋدانى قامتاماسىز ەتۋ ءۇشىن ءوزارا ارەكەتتەسۋدى فيزي­كالىق جانە تسيفرلى فورماتتا قايتا قۇرۋدا. الەۋمەتتىك حاباردارلىقتى ارتتىرۋ تۇتى­نۋ­شىلاردىڭ اشىقتىققا دەگەن سۇرانىسىن دا ارتتىردى. سونىمەن قاتار سالالار ۇستەمە شىعىنداردى ازايتۋعا جانە تيىمدىلىكتى ارتتىرۋعا تىرىسادى، – دەدى Astana Finance Days فورۋمىندا بايانداما جاساعان رافال ترەپكا.

Forex Market كومپانيا­سى­نىڭ باس ديرەكتورى دميتري كوميسساردىڭ ايتۋىنشا، بۇ­گىندە جاھاندىق نارىقتا ەكى ۇل­كەن ترەند قانات جايىپ كەلەدى. ءبىرىنشىسى – ماركەتپلەيستەردىڭ دامۋى. ويتكەنى ەلەكتروندى ساۋداداعى ساتىلىمدار وسى فور­ماتقا شوعىرلانىپ، سا­تى­لادى. ەكىنشىسى – ءبولىپ تو­لەۋ مودەلىنىڭ دامۋى. قازاق­ستان­داعى بانكتەردىڭ كوبى بۇعان اي­رىق­شا باسىمدىق بەرىپ وتىر.

سوڭعى جاڭالىقتار

ۇقساس جاڭالىقتار