مەملەكەتتىك اتتەستاتسيا پروفيلاكتيكالىق باقىلاۋ ۇلگىسىندە وتكىزىلەدى. نەگىزگى ماقسات – جالپىعا مىندەتتى مەملەكەتتىك ءبىلىم بەرۋ ستاندارتىنىڭ تالاپتارىن ورىنداۋ شارالارىن قاداعالاۋ. سونداي-اق ءبىلىم بەرۋ ۇيىمدارىنا ادىستەمەلىك كومەك بەرىلەدى. بۇل تۋرالى ءبىلىم سالاسىنداعى ساپانى قامتاماسىز ەتۋ دەپارتامەنتىنىڭ باسشىسى گۇلنار ەرمەكباەۆا ارنايى بريفينگتە ايتتى.
تەكسەرۋ جۇمىستارى قاشىقتان وتەدى. ءبىلىم بەرۋ ۇيىمدارى قۇجاتتاردىڭ ەلەكتروندى نۇسقاسىن ساراپشىلارعا جىبەرەدى.
اتتەستاتسيا اياسىندا وقۋشىلاردىڭ ءبىلىم دەڭگەيى باعالانادى, كەشەندى تەستىلەۋ وتكىزىلەدى. باستاۋىش سىنىپتاردا – ەكى ءپان, نەگىزگى ورتاشا ءبىلىم ءۇشىن – ءۇش ءپان, ال جالپى ورتا ءبىلىم الۋشىلار ءتورت ءپان بويىنشا تەست تاپسىرادى.
كاسىبي-تەحنيكالىق ءبىلىم بەرۋ ۇيىمدارىندا ەكى سالالىق ءپان بويىنشا تەستىلەۋ ۇيىمداستىرىلادى.
ال مەكتەپكە دەيىنگى ءبىلىم بەرۋ جانە تاربيەلەۋ اياسىندا اتا-انالار اراسىندا ساۋالناما جۇرگىزىلەدى.
گ.ەرمەكباەۆانىڭ ايتۋىنشا, بۇل حالىقارالىق تاجىريبە.
ايتا كەتەيىك, مەملەكەتتىك اتتەستاتسيا بەس جىلدا ءبىر رەت ۇيىمداستىرىلادى. سونىڭ اياسىندا مەنشىك فورماسىنا قاراماستان, بارلىق ءبىلىم بەرۋ ۇيىمى تولىعىمەن تەكسەرىلەدى.
