ەلوردانى الماتىدان اقمولاعا اۋىستىرۋ تۋرالى شەشىمدى قازاقستان رەسپۋبليكاسىنىڭ جوعارعى كەڭەسى 1994 جىلعى 6 شىلدەدە قابىلدادى. استانانى رەسمي كوشىرۋ 1997 جىلعى 10 جەلتوقساندا جۇزەگە استى. پرەزيدەنتتىڭ 1998 جىلعى 6 مامىرداعى جارلىعىمەن اقمولا استانا بولىپ وزگەرتىلدى.
بالالىق شاعى بالقارلىق, تۇرىك, چەح, نەمىس بالالارىمەن بىرگە ءبىر اۋىلدا وتكەن, العاشقى ەڭبەك جولى كارمەتكومبيناتتىڭ كوپۇلتتى جۇمىس ۇجىمىندا باستالعان ەلباسى نۇرسۇلتان ءابىش ۇلى نازارباەۆ ءۇشىن ەتنوسارالىق كەلىسىمنىڭ ماڭىزدىلىعى, ياعني باسقا ەتنوستار وكىلدەرىن ءوز ۇلتىنان ءبولىپ تاستاماۋ, ولاردىڭ بىرلىگىن قامتاماسىز ەتۋ – استانانى كوشىرۋ يدەياسىنداعى باستى فاكتورلاردىڭ ءبىرى.
ول كەزدە, توقسانىنشى جىلداردىڭ ورتاسىندا بۇل يدەيانىڭ جۇزەگە اساتىنىنا سەنەتىندەر كوپ بولعان جوق, «جاڭا قالا سالۋ جانە ونى ىلگەرىلەتۋ ءۇشىن كوپتەگەن جىلدار قاجەت بولادى» دەپ سانايتىندار دا بار ەدى. بىراق ولار جاڭىلىستى. استانا قىسقا مەرزىمدە سالىنىپ, ەل دامۋىنىڭ سيمۆولىنا اينالدى.
1998 جىلدىڭ 10 ماۋسىمىندا تاۋەلسىز قازاقستاننىڭ جاڭا استاناسىنىڭ حالىقارالىق تۇساۋكەسەرى ءوتتى. بۇل تاريحي وقيعا قازاقستاننىڭ 2030 جىلعا دەيىنگى دامۋ ستراتەگياسىن ىسكە اسىرۋدىڭ باستاۋى بولدى.
استانانى كوشىرۋ گەوساياسي, ەكولوگيالىق, لوگيستيكالىق جانە باسقا دا كوپتەگەن پارامەتر بويىنشا سالماقتى شەشىم بولدى. ەندى بۇل قالا – دوستىقتىڭ, ەتنوسارالىق جانە كونفەسسياارالىق كەلىسىمنىڭ سيمۆولى. ەلباسىنىڭ ستراتەگيالىق جوباسىن پرەزيدەنت قاسىم-جومارت كەمەل ۇلى توقاەۆ دانالىقپەن جالعاستىرۋ ۇستىندە.
ءبىز ەلوردانىڭ قالىپتاسۋ تاريحىنداعى ۇلكەن وزگەرىستەردىڭ كۋاسى بولىپ وتىرمىز. 2019 جىلدىڭ 20 ناۋرىزىندا قازاقستاننىڭ جاڭا پرەزيدەنتى قاسىم-جومارت توقاەۆ ءوزىنىڭ يناۋگۋراتسيالىق سوزىندە نۇرسۇلتان نازارباەۆتىڭ مەملەكەت ءۇشىن سىڭىرگەن ەڭبەگىن اتاپ ءوتىپ, مەملەكەتتىڭ استاناسىنا تۇڭعىش پرەزيدەنت نۇرسۇلتان نازارباەۆتىڭ ەسىمىن بەرۋدى ۇسىندى. ونىڭ باستاماسىن ەل پارلامەنتى قولدادى.
ەلوردانىڭ اتاۋىن «نۇر-سۇلتان» دەپ وزگەرتۋ كورەگەن شەشىم بولدى. بۇل تۇڭعىش پرەزيدەنتتىڭ ەڭبەگى ءۇشىن ريزاشىلىقتىڭ بەلگىسى. قازاقستان حالقى اسسامبلەياسىنىڭ مۇشەلەرى دە بۇل شەشىمدى تولىعىمەن قولدادى.
ەلوردانىڭ ەۋروپادان ازياعا اپاراتىن جولدار قيىلىسىندا ورنالاسۋى وتە ءتيىمدى. سەبەبى بۇل گەوگرافيالىق جاعداي ونىڭ ساياسي, ەكونوميكالىق, مادەني جانە رۋحاني ورتالىققا اينالۋىنىڭ باستى كەپىلى.
قازاقستاننىڭ تۇڭعىش پرەزيدەنتىنىڭ يدەياسىمەن قالانعان جاڭا ەلوردا قىسقا مەرزىم ىشىندە جالپىۇلتتىق يدەيا مارتەبەسىنە يە بولىپ, جاس مەملەكەتتىڭ تاۋەلسىزدىگىنىڭ سيمۆولىنا جانە جاhاندىق تابىسىنا اينالدى.
بۇگىندە نۇر-سۇلتان حالىقارالىق ماڭىزى بار ءتۇرلى فورۋمدار, كونگرەستەر مەن وزگە دە ءىس-شارالار وتەتىن ەۋرازيا كەڭىستىگىنىڭ ورتالىعىنا اينالدى. ەلوردادا الەمدىك جانە ءداستۇرلى دىندەر ليدەرلەرىنىڭ سەزدەرى, استانا ەكونوميكالىق فورۋمى جانە وزگە دە ماڭىزدى حالىقارالىق وقيعالار تۇراقتى تۇردە ءوتىپ كەلەدى. استانادا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ (ەقىۇ) تاريحي ءسامميتى, شانحاي ىنتىماقتاستىق ۇيىمى (شىۇ) مەن يسلام ىنتىماقتاستىعى ۇيىمىنىڭ (يىۇ) مەرەيتويلىق سامميتتەرى ءوتتى. 2011 جىلدىڭ باسىندا رەسپۋبليكانىڭ ەلورداسى VII قىسقى ازيا ويىندارىنىڭ قاتىسۋشىلارى مەن قوناقتارىن قابىلدادى, «ەكسپو-2017» حالىقارالىق كورمەسى ويداعىداي ءوتتى.
نۇر-سۇلتان قالاسىنىڭ كۇن سايىن كوركەيىپ كەلە جاتقان شاھار ەكەندىگىن ەسكەرسەك, ونىڭ ءوسىپ-وركەندەپ, از ۋاقىت ىشىندە سىرتقى كورىنىسى ىشكى مازمۇنىنا ساي بولىپ, قانات جايىپ, شەتتەن كەلگەندى دە, ەل ىشىنەن بارعاندى دا تامساندىراتىن عاجايىپ قالاعا اينالعانى – بارىمىزگە ماقتانىش.
بۇل كۇنى ءاربىر قازاقستاندىقتى نۇر-سۇلتان قالاسىنىڭ كۇنىمەن قۇتتىقتايمىن جانە بارشاڭىزعا بەيبىتشىلىك, جاقسىلىق, اماندىق جانە وتانىمىز – قازاقستان رەسپۋبليكاسىنىڭ يگىلىگى ءۇشىن جاڭا جەتىستىكتەر تىلەيمىن!
ءىلياس بۋلاروۆ,
پارلامەنت ءماجىلىسىنىڭ دەپۋتاتى
