ەل استاناسى – نۇر-سۇلتان قالاسى ءوزىنىڭ 24 جىلدىق تاريحىندا الەمنىڭ وزىق ەلدەرى كوشباسشىلارىنىڭ باسىن قوساتىن ساياسي, مادەني ورتالىققا اينالدى. 2010 جىلى ەلوردادا وتكەن ەۋروپالىق قاۋىپسىزدىك جانە ىنتىماقتاستىق ۇيىمىنىڭ ءسامميتى – سونىڭ ايقىن دالەلى. وسى ۇيىمعا قازاق ەلىنىڭ توراعالىق ەتۋى – بۇرىنعى كەڭەستىك ەلدەر اراسىندا ەڭ العاش رەت بولعان ساياسي ماڭىزى زور وقيعا ەكەنىن ايتقان ءجون. سونداي-اق نۇر-سۇلتاندا 2003 جىلدان بەرى الەمدىك جانە ءداستۇرلى دىندەر كوشباسشىلارىنىڭ سەزى ۇيىمداستىرىلىپ, ءارتۇرلى ءدىن وكىلى باس قوسىپ وتىرادى.
ەلوردامىز حالىقارالىق ساياسي ارەنادا ءوزىنىڭ ورنىن قالىپتاستىرىپ, حالىقارالىق قوعامداستىق ساناساتىن دارەجەگە جەتتى. كەزىندە يۋنەسكو نۇر-سۇلتان قالاسىن دۇنيەجۇزىندەگى «بەيبىتشىلىك قالاسى» دەپ اتادى.
10-15 جىل بۇرىنعى استانا مەن قازىرگى ەلوردانىڭ مادەني الەۋەتىن سالىستىرساق, ايىرماشىلىق جوق ەمەس. ەلوردامىز بۇگىندە رۋحاني ورتالىققا اينالا الدى دەپ نىق سەنىممەن ايتۋعا بولادى. قازىرگى تاڭدا زيالى قاۋىم وكىلدەرى مەن ونەر ادامدارى نۇر-سۇلتان قالاسىنا كوشىپ كەلىپ, ەلوردامىزدىڭ رۋحاني-مادەني دامۋىنا ءوز ۇلەستەرىن قوسۋدا. سوڭعى جىلدارى قالادا مادەني وشاقتار كوبەيە باستادى. ماسەلەن, ۇلتتىق اكادەميالىق كىتاپحانا, «قازاقستان» ورتالىق كونتسەرت زالى, «استانا وپەرا» مەملەكەتتىك وپەرا جانە بالەت تەاترى, قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ كىتاپحاناسى, ۇلتتىق مۋزەي سياقتى كوپتەگەن مادەني ورتالىقتار پايدا بولدى.
نۇر-سۇلتان قالاسى ساياسات پەن رۋحانياتتا عانا ەمەس, سونىمەن قاتار سپورتتا دا ۇلكەن جەتىستىكتەرگە جەتتى. ماسەلەن, جىل سايىن ەلوردادا كوپتەگەن حالىقارالىق سپورت ءىس-شاراسى ۇيىمداستىرىلىپ, سونىڭ ارقاسىندا سپورتقا قىزىعۋشىلىعى مول جاستاردىڭ سانى ارتتى. نۇر-سۇلتان مەن الماتى قالالارىندا تۇڭعىش رەت ءVىى قىسقى ازيا ويىندارى ءوتىپ, سونىڭ ناتيجەسىندە كوپتەگەن جاستار قىسقى سپورت تۇرلەرىمەن اينالىسۋعا دەن قويدى. بۇل نۇر-سۇلتاننىڭ تەك مەملەكەتتىك قىزمەتشىلەردىڭ عانا ەمەس, سونىمەن قاتار زيالى قاۋىم وكىلدەرى مەن ونەر ادامدارىنىڭ قۇتتى مەكەنى دالەلدەيدى.
ءبىر سوزبەن ايتقاندا, ەلوردامىز ساياساتتا, رۋحانياتتا جانە سپورتتا ءوزىنىڭ ماڭىزدى ورنىن قالىپتاستىرىپ ۇلگەردى. مۇنىڭ ءبارى تاۋەلسىزدىگىمىزدىڭ ارقاسىندا دەپ بىلەمىن. سوندىقتان قازاقستاندىقتاردىڭ بارلىعى ءۇشىن نۇر-سۇلتان – وتانىمىزدىڭ جۇرەگى, تاۋەلسىزدىگىمىزدىڭ تىرەگى.
بارشا قازاقستاندىقتاردى نۇر-سۇلتان قالاسىنىڭ كۇنىمەن شىن جۇرەكتەن قۇتتىقتايمىن! ءار وتباسىدا بەرەكە-بىرلىك, ەلىمىزدە تىنىشتىق بولسىن!
ناتاليا دەمەنتەۆا,
پارلامەنت ءماجىلىسىنىڭ دەپۋتاتى
