بيىلعى جارىستىڭ قۇرمەتتى قوناقتارى رەتىندە قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ, مادەنيەت جانە سپورت ءمينيسترى اقتوتى رايىمقۇلوۆا جانە نۇر-سۇلتان قالاسىنىڭ اكىمى التاي كولگىنوۆ قاتىسىپ, بالۋاندارعا ساتتىلىك تىلەدى.
سونداي-اق جارىس ۇيىمداستىرۋشىلارى بيىلعى باسەكەگە ازداعان وزگەرىستەر ەنگىزگەن. اتاپ ايتار بولساق, بۇعان دەيىنگى تۋرنيرلەردە بالۋاندار بەس مينۋتتان كۇرەسكەن بولسا, بيىلعى بەلدەسۋلەر
4 مينۋتتان ارىگە اسقان جوق. قويان-قولتىق بەلدەسۋلەردىڭ ۋاقىتى ەكى مينۋتتان ءبىر مينۋتقا قىسقاردى. بوز كىلەم جاڭادان توسەلۋىنە بايلانىستى بالۋاندار بيىلدان باستاپ جالاڭاياق كۇرەسەتىن بولدى. بۇل وزگەرىستەر ءتۋرنيردىڭ كورىگىن قىزدىرماسا, ەش كەمىتكەن جوق.
تۋرنيرگە ەلىمىزدىڭ ءəربىر ايماعىندا ۇيىمداستىرعان ىرىكتەۋ كەزەڭىنەن سۇرىنبەي وتكەن تاڭداۋلى بالۋاندار قاتىسقان سوڭ بوز كىلەم ءۇستى توسىن جەڭىستەرگە, جان الىسىپ, جان بەرىسكەن بەلدەسۋلەرگە دە تولى بولدى. ادەتتە «قازاقستان بارىسى» ءتۋرنيرىنىڭ بەلدەسۋلەرى شيرەك فينالدان باستاپ قىزا تۇسەتىن. ويتكەنى العاشقى اينالىمداردا بالۋاندار ءبىر-ءبىرىن اڭدىپ, تاۋەكەلگە بارماي, بايىپپەن, اسا ءبىر ساقتىقپەن كۇرەسەتىن. ال بۇل جىلى مۇلدە باسقاشا بولدى. بالۋاندار سالعان جەردەن قارسىلاستارىن الىپ تا, شالىپ تا جىعۋعا ۇمتىلدى. مىسالى, جارىستىڭ ەكىنشى اينالىمىندا بيىل «سىر بارىسى» اتانىپ, ءتۋرنيردىڭ تۇراقتى قاتىسۋشىسىنا اينالعان قىزىلوردالىق نۇرىم سالىمگەرەەۆ اراعا ەكى جىل سالىپ ۇلكەن سپورتقا ورالعان 2017 جىلعى «قازاقستان بارىسى» ەلامان ەرعاليەۆتەن (اقتوبە) جەڭىلىپ قالسا, 2014 جىلعى «قازاقستان بارىسى» مۇحيت تۇرسىنوۆ ءوزىنىڭ العاشقى بەلدەسۋىندە بيىلعى «اسكەر بارىسى», ءتۋرنيردىڭ ەكى دۇركىن ءفيناليسى ەراسىل قاجىباەۆتان ايلاسىن اسىرا المادى. 4 مينۋتقا سوزىلعان بەلدەسۋدە قاجىباەۆ قارسىلاسىنان بۇك ۇپايمەن باسىم ءتۇستى. سونداي-اق «ەۋرازيا بارىسى» حالىقارالىق ءتۋرنيرىنىڭ جەڭىمپازى (2016), «قازاقستان بارىسى» رەسپۋبليكالىق ءتۋرنيرىنىڭ قولا جۇلدەگەرى (2016) اتانعان جامبىلدىق بالۋان ايبول ايتبەك اسا تارتىستى بەلدەسۋدە ماڭعىستاۋلىق نۇرداۋلەت جارىلعاپوۆتان جەڭىلىپ, جارىستى ەرتە اياقتاۋعا ءماجبۇر بولدى.
شيرەك فينالداعى اسا قىزىقتى ھəم تارتىستى وتكەن بەلدەسۋدىڭ ءبىرى 2013 جىلعى «قازاقستان بارىسى» ايبەك نۇعىماروۆ پەن 2017 جىلعى «قازاقستان بارىسى» اتانعان ەلامان ەرعاليەۆ اراسىندا ءوتتى. بۇعان دەيىن بوز كىلەم ۇستىندە تالاي رەت بەلدەسىپ, ءبىر-ءبىرىنىڭ قىر-سىرىن ابدەن مەڭگەرىپ العان قوس بالۋان اراسىنداعى بەلدەسۋدە ەكەۋى كەزدەسۋ سوڭىنا دەيىن ءبىر-بىرىنەن ساقتانىپ, ءəدىس جاساۋعا اسىقپادى. دەگەنمەن باسەكەنىڭ اياقتالۋىنا 13 سەكۋند قالعاندا ەرعاليەۆ ءادىس جاساپ, «جارتىلاي جەڭىس» ۇپايىمەن ايبەكتى جارىس جولىنان شىعارىپ جىبەردى.
شيرەك فينالداعى تاعى ءبىر ماڭىزدى بەلدەسۋ الماتىلىق رۋسلان ابدىرازاقوۆ پەن ماڭعىستاۋلىق نۇرداۋلەت جارىلعاپوۆ اراسىندا ءوتتى. ەكى بالۋان دا شيرەك فينالعا دەيىن قارسىلاستارىن ايقىن باسىمدىقپەن جەڭىپ كەلگەن-ءدى. 2019 جىلعى تۋرنيردە قولا جۇلدە ولجالاعان ر.ابدىرازاقوۆ كەزدەسۋدىڭ اياقتالۋىنا ءبىر مينۋت قالعان بۇك ۇپايىن يلەنىپ, جارتىلاي فينالعا ءبىر تابان جاقىنداي ءتۇستى. الايدا ارادا از ۋاقىت وتكەندە جارىلعاپوۆ تا بۇك ۇپاي ولجالاپ, تارازى باسىن تەڭەستىرىپ كەتتى. ءسويتىپ كەزدەسۋ قويان-قولتىق بەلدەسۋگە ۇلاستى. 10 سەكۋندتىڭ ىشىندە ءادىس جاساپ ۇلگەرگەن ماڭعىستاۋلىق بالۋان جەڭىسكە جەتىپ, «قازاقستان بارىسى» جارىسىندا العاش رەت جارتىلاي فينالعا جولداما الدى.
سونداي-اق 1/4 فينالدىق باسەكەدە جامبىلدىق عالىمجان قىرىقباي ەراسىل قاجىباەۆتى بۇك ۇپايمەن جەڭىپ, كەلەسى كەزەڭگە جولداما السا, شىعىستىڭ شىمىر بالۋانى داۋرەن نۇرالينوۆ ەلوردالىق ولجاس شىنكەەۆتەن ايلاسىن اسىرىپ كەتتى.
سونىمەن جانكۇيەر قاۋىم اسىعا كۇتكەن جارتىلاي فينال بەلدەسۋلەرىنە دە كەزەك كەلدى. الدىمەن بوز كىلەمگە عالىمجان قىرىقباي مەن كوشپەندىلەر ويىنىنىڭ جۇلدەگەرى ەلامان ەرعاليەۆ شىقتى. بەلدەسۋدىڭ اياقتالۋىنا 30 سەكۋند قالعاندا جامبىلدىق بالۋان بۇك ۇپايىن يەلەنسە, ارادان تاعى 10 سەكۋند وتكەندە ەرعاليەۆ قارسىلاسىنا ءادىس جاسايمىن دەپ ءوزى كىلەمگە جاۋىرىنىمەن ءتۇسىپ قالدى. ءسويتىپ عالىمجان قىرىقباي تازا جەڭىسپەن فينالعا شىقتى.
ال ەكىنشى جارتىلاي فينالدا ماڭعىستاۋلىق نۇرداۋلەت جارىلعاپوۆ پەن 2019 جىلى ۇيىمداستىرىلعان «حالىق بارىسى» ءتۋرنيرىنىڭ جەڭىمپازى داۋرەن نۇرالينوۆ بەلدەستى. قارسىلاستار 3 مينۋت, 55 سەكۋند بويى ءبىر-ءبىرىنىڭ وسال تۇسىن تابا الماي, ءبىراز ابىگەرگە ءتۇستى. سوڭعى 5 سەكۋندتا داۋرەن بۇك ۇپايىن يەلەنىپ, باس جۇلدە ءۇشىن بەلدەسۋگە مۇمكىندىك الدى.
2021 جىلعى «قازاقستان بارىسىن» انىقتايتىن شەشۋشى سايىستىڭ الدىندا جۇلدە بەرىلەتىن ءۇشىنشى ورىن ءۇشىن بەلدەسۋ ءوتتى. بۇل سىندا ماڭعىستاۋلىق نۇرداۋلەت جارىلعاپوۆ پەن اقتوبەلىك ەلامان ەرعاليەۆ كۇش سىناستى. ەرعاليەۆ جارتىلاي فينالداعى باسەكە سياقتى بۇل جولى دا ءوز ادىسىنە ءوز ءتۇسىپ قالىپ, قولدا تۇرعان قولا جۇلدەسىنەن ايىرىلىپ قالدى. ايتپەسە, ەلامان 3 مينۋت, 30 سەكۋند بويى بۇك ۇپايمەن الدا كەلە جاتقان ەدى.
سونىمەن قازاق كۇرەسىنەن ەڭ مىقتى, بالۋاندى انىقتايتىن سəت تە كەلىپ جەتتى. التى ساعاتقا سوزىلعان ايتۋلى باسەكەنىڭ فينالىنا تۋرنيردە ءبىر دەممەن كۇرەسىپ, ءوزىنىڭ ناعىز سپورتتىق بابىندا ەكەندىگىن تانىتقان داۋرەن نۇرالينوۆ پەن عالىمجان قىرىقباي شىقتى. بۇعان دەيىنگى جارىستاردا بىردە-ءبىر رەت فينالعا شىقپاعان ەكى بالۋاننىڭ اراسىنداعى فينالدىق بەلدەسۋدە جامبىلدىق عالىمجان قىرىقباي بەلسەندى قيمىلداپ, ءا دەگەننەن-اق العاشقى بۇك ۇپايىن ەنشىلەپ ۇلگەردى. بىراق داۋرەن نۇرالينوۆ فينالعا تەگىننەن تەگىن شىقپاعانىن دالەلدەپ, بۇك ۇپايىمەن تارازى باسىن تەڭەستىردى. نەگىزى ۋاقىتتا ءبىر-ءبىرىن جىعا الماعان ەكى بالۋان تاعى قوسىمشا ءبىر مينۋت بەلدەستى. 8 سەكۋند ىشىندە قارسىلاسىنا قارسى ءادىس جاساپ ۇلگەرگەن داۋرەن نۇرالينوۆ «قازاقستان بارىسى» تۋرنيرىندە توپ جاردى.
2021 جىلعى «قازاقستان بارىسى» اتانعان داۋرەن نۇرالينوۆتىڭ بەلىنە «التىن بەلبەۋدى» Qazaq kuresi اسسوتسياتسياسى ءبىرىنشى ۆيتسە-پرەزيدەنتى سامات ءابىش بايلادى. سونىمەن قاتار شىعىسقازاقستاندىق بالۋانعا «التىن تايتۇياق» پەن 25 ميلليون تەڭگەنىڭ سەرتيفيكاتى تابىس ەتىلدى. بالۋاننىڭ باپكەرى دە قۇرالاقان قالعان جوق, چەمپيوننىڭ جاتتىقتىرۋشىسى 3,5 ميلليون تەڭگە سىياقىعا يە بولدى. بۇدان بولەك, تۋرنيردە كۇمىس جۇلدەگەر اتانعان عالىمجان قىرىقبايعا «كۇمىس بەلبەۋ» مەن 5,5 ميلليون تەڭگە سىيلىق تاپسىرىلدى. ال ونىڭ باپكەرى 1,8 ميلليون تەڭگە يەلەندى. ال ءۇشىنشى ورىن يەلەنگەن نۇرداۋلەت جارىلعاپوۆقا 1,8 ميلليون تەڭگە جانە «قولا بەلبەۋ», باپكەرىنە 900 مىڭ تەڭگەنىڭ سەرتيفيكاتى تاپسىرىلدى.
