ءداستۇرلى تۋرنير بيىل ەل تاۋەلسىزدىگىنىڭ 30 جىلدىعى, قاجىمۇقان مۇڭايتپاس ۇلىنىڭ 150 جىلدىعىن مەرەكەلەۋ جانە ۇلتتىق سپورت تۇرلەرىن دامىتۋ ارقىلى سالاماتتى ءومىر سالتىن قالىپتاستىرۋ, جاستاردى ۇلتتىق سپورت تۇرلەرىمەن شۇعىلدانۋعا تارتۋ ارقىلى ولاردىڭ بويىندا وتانسۇيگىشتىك سەزىمدى قالىپتاستىرۋ ماقساتىندا وتكىزىلدى.
ءتۋرنيردىڭ اشىلۋ سالتاناتىنا قاتىسقان پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ مەملەكەت باسشىسى قاسىم-جومارت توقاەۆتىڭ Qazaqstan Barysy ءتۋرنيرىنىڭ قاتىسۋشىلارىنا ارنالعان قۇتتىقتاۋ ءسوزىن وقىپ بەردى.
– قادىرلى سپورت سۇيەر قاۋىم, قۇرمەتتى بالۋاندار! بارشاڭىزدى Qazaqstan Barysy ءتۋرنيرىنىڭ باستالۋىمەن قۇتتىقتايمىن. قاستەرلى تاۋەلسىزدىگىمىزدىڭ مەرەيلى جىلىندا, ەلوردا كۇنىنىڭ قارساڭىندا, كۇش اتاسى قاجىمۇقاننىڭ 150 جىلدىعىنا وراي وتكىزىلىپ جاتقان بۇل سايىستىڭ سيمۆولدىق ءمانى زور. Qazaqstan Barysy ءتۋرنيرى حالقىمىزدىڭ ەجەلدەن كەلە جاتقان ءتول ونەرى – قازاق كۇرەسىن ەگەمەندىك كەزەڭىندە قايتا جاڭعىرتتى. بۇل سايىس بابالاردىڭ باتىرلىق رۋحى مەن جاۋىنگەرلىك شەبەرلىگى, ۇرپاقتان-ۇرپاققا جالعاسىپ كەلە جاتقانىن اڭعارتادى. سوڭعى جىلدارى كەڭ قانات جايىپ, جان-جاقتى دارىپتەلە باستاعان قازاق كۇرەسى قارقىندى دامۋدا. وعان تۇڭعىش پرەزيدەنت – ەلباسى نۇرسۇلتان نازارباەۆتىڭ جۇدەسى ءۇشىن وتەتىن Qazaqstan Barysy رەسپۋبليكالىق تۋرنير زور ۇلەسىن قوسىپ كەلەدى», دەلىنگەن پرەزيدەنتتىڭ قۇتتىقتاۋ سوزىندە.
مەملەكەت باسشىسىنىڭ قۇتتىقتاۋىندا قازاق كۇرەسىن جان-جاقتى ناسيحاتتاۋدىڭ ارقاسىندا ءتول ونەرىمىز يۋنەسكو ۇيىمىنىڭ ماتەريالدىق ەمەس مادەني مۇرالاردىڭ تىزىمىنە ەنگەنىن اتادى.
– داستۇرگە اينالعان ءدۇبىرلى دودا ءتول ونەرىمىزدى الەمگە تانىتتى. يۋنەسكو ۇيىمى قازاق كۇرەسىن ادامزاتتىڭ ماتەريالدىق ەمەس مادەني مۇراسىنىڭ تىزىمىنە قوسۋى – وسىنىڭ ايقىن كورىنىسى. بالۋانداردىڭ ونەرى جاستاردىڭ سپورتقا قىزىعۋشىلىعىن وياتىپ, وسكەلەڭ ۇرپاقتى وتانسۇيگىشتىك رۋحتا تاربيەلەۋگە جول اشادى. بۇگىنگى بايراقتى باسەكەدە بالۋاندارىمىزعا ساتتىلىك تىلەيمىن. ۇلتتىق قۇندىلىقتارىمىز ايشىقتالا بەرسىن», دەپ جازىلعان پرەزيدەنتتىڭ قۇتتىقتاۋ حاتىندا.
بيىل 10 مارتە وتكىزىلگەن بالۋاندار باسەكەسىنە نۇر-سۇلتان, الماتى, شىمكەنت قالالارى مەن وبلىستارداعى ىرىكتەۋ جارىستارىنان سۇرىنبەي وتكەن 37 بالۋان باق سىنادى. ونىڭ ىشىندە 11 بالۋان بايراقتى دوداعا العاش رەت قاتىس-
تى.
«قازاقستان بارىسى» ءتۋرنيرىنىڭ بيىلعى جۇلدە قورى دا وزگەرىسسىز قالدى. جەڭىمپاز اتانعان بالۋانعا ادەتتەگىدەي
25 000 000 تەڭگە جانە التىن بەلبەۋ مەن التىننان قۇيىلعان اۋىسپالى «تايتۇياق» تابىستالدى. ەكىنشى ورىن العان سپورتشىعا 5 500 000 تەڭگە جانە ءۇشىنشى ورىندى قاناعات تۇتقان بالۋانعا 1 800 000 تەڭگە, سايكەسىنشە كۇمىس جانە قولا بەلبەۋلەرمەن ماراپاتتالدى.
تۋرنير Nur Otan پارتياسى, مادەنيەت جانە سپورت مينيسترلىگى, نۇر-سۇلتان قالاسى اكىمدىگىنىڭ قولداۋىمەن, Qazaqstan Barysy قازاق كۇرەسىن قولداۋ جانە دامىتۋ قورى مەن Qazaq kuresi اسسوتسياتسياسى ۇيىمداستىردى.
