بۇل جارلىق ۇلتتىق مادەنيەت پەن بىرەگەيلىكتى ساقتاۋ مەن قايتا جاڭعىرتۋ يدەياسىنىڭ توڭىرەگىندە قوعامدى ودان ءارى توپتاستىرۋ ماقساتىندا جاريالاندى. جىل سايىن اتاپ وتىلمەك بۇل مەرەكەلىك كۇننىڭ ۇلتتىق رۋحانياتىمىزعا قوسار ۇلەسى سالماقتى بولماق.
بۇگىن قازاق ەلى مونۋمەنتىنىڭ الدىنداعى الاڭ ۇلكەن ساحناعا اينالىپ, دومبىراشىلار ءبىر مەزەتتە كۇي شەرتەدى. شاراعا جاس ەرەكشەلىگىنە قاراماستان نيەت بىلدىرگەندەردىڭ بارلىعى قاتىسا الادى. ولار «سارىارقا», «اداي», «القيسسا», «كوڭىل تولقىنى», «بالبىراۋىن» جانە «كورەع ۇلى» كۇيلەرىن جاتقا بىلۋگە ءتيىس.
«بيىل ۇلتتىق دومبىرا كۇنىنە ورايلاستىرىلعان جاپپاي كونتسەرتتە ورىندالاتىن التى كۇي تاڭدالدى. ارينە, قاتىسۋشىلاردىڭ التى كۇيدى دە بىلگەنى ءجون. دەگەنمەن ۇسىنىلعان كومپوزيتسيالاردىڭ بىرەۋىن عانا بىلەتىندەر دە كونتسەرتكە ۇلەس قوسا الادى», دەلىنگەن نۇر-سۇلتان قالاسىنىڭ مادەنيەت جانە سپورت باسقارماسىنىڭ حابارلاماسىندا.
مەرەكە اياسىندا كۇمبىرلەگەن كۇيدەن باسقا, جينالعاندار نازارىنا «جاستار» تەاترىنىڭ اكتەرلەرى تاريحي قويىلىم ۇسىنادى, ەلوردالىق مۋزىكا مەكتەپتەرىنىڭ شاكىرتتەرى ءوز ونەرىن ورتاعا سالادى, اقىندار ايتىسى وتەدى. سۋىرىپ سالما ولەڭگە ىسىلعان جاندار ۇلتتىق اسپابىمىز - دومبىرانى جىرعا قوسادى.
