ۆەدومستۆو ءباسپاسوز قىزمەتىنىڭ مالىمەتىنشە, اۋىستىرۋ سوڭعى ەكى ايدا جۇزەگە اسىرىلدى. ەندى تۇلەكتەر وقۋىن جالعاستىرىپ, جوعارى ءبىلىم تۋرالى ديپلوم الادى. ەستەرىڭىزگە سالا كەتەيىك, وسى جىلدىڭ ءساۋىر ايىندا قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتىن باس ليتسەنزياسىنان ايىرۋ تۋرالى سوت شەشىمى زاڭدى كۇشىنە ەنگەن.
«قازمۇببۋ-دا 3 500-گە جۋىق ادام ءبىلىم الدى. ستۋدەنتتەردىڭ باسىم بولىگى الماتى قالاسىنىڭ مەديتسينالىق جوعارى وقۋ ورىندارىنا اۋىستى. كەيبىر ستۋدەنتتەر وقۋىن نۇر-سۇلتان, قاراعاندى, سەمەي, اقتوبە, شىمكەنت جانە تۇركىستان قالالارىنداعى مەديتسينالىق جوو-لاردا جالعاستىردى. اۋىسۋ بارىسىندا قابىلداۋشى جوعارى وقۋ ورىندارىنا ستۋدەنتتەردى قابىلداۋ جانە وقۋ ناتيجەلەرىن باعالاۋ كەزىندە قازمۇببۋ تاراپىنان جىبەرىلگەن بۇزۋشىلىقتاردى جويۋعا تۋرا كەلدى. اۋىستىرىلعان 111 ستۋدەنتتىڭ جەكە قۇجاتتارىندا تالاپ ەتىلەتىن اتتەستاتتار مەن ولارعا قوسىمشالار بولمادى. كەيبىر ستۋدەنتتەردىڭ ۇبت-داعى سەرتيفيكاتتارى دا بولعان جوق», دەدى قر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى توراعاسىنىڭ ورىنباسارى گۇلجان جاراسوۆا.
سونداي-اق ستۋدەنتتەردى باسقا جوعارى وقۋ ورىندارىنا اۋىستىرۋ كەزىندە كەيبىر ماگيسترانتتاردىڭ پرەرەكۆيزيتتەردەن وتپەي وقىعانى انىقتالدى. سونىمەن قاتار ستۋدەنتتەر قابىلداۋ كەزىندە مىندەتتى تەستىلەۋدىڭ كەيبىر ەلەمەنتتەرىن تاپسىرماعان.
قازمۇببۋ ءبىتىرۋشى كۋرس ستۋدەنتتەرى مەملەكەتتىك ستاندارتتىڭ مىندەتتى پاندەرىن تولىق كولەمدە وقىماعان. بىرقاتار نەگىزگى پاندەر مۇلدەم يگەرىلمەگەن. ماسەلەن, «فارماتسيا» قىسقارتىلعان باعدارلاماسى بويىنشا وقىعان ستۋدەنتتەر ءتيىستى 120 كرەديتتىڭ ورنىنا تەك 78-ءىن عانا وقىعان. «قازمۇببۋ جىبەرگەن وسى جانە باسقا دا بۇزۋشىلىقتار ستۋدەنتتەردى باسقا مەديتسينالىق جوعارى وقۋ ورىندارىنا اۋىستىرۋ پروتسەسىن تەجەدى. بۇگىنگى تاڭدا بۇل ماسەلەلەر شەشىلىپ, ءبىلىم الۋشىلار باسقا ۋنيۆەرسيتەتتەردە وقۋىن جالعاستىردى. قابىلداۋشى جوعارى وقۋ ورىندارى ءبىلىم الۋشىلارعا اكادەميالىق ايىرماشىلىقتى يگەرۋگە مۇمكىندىك بەردى. سونداي-اق ولار ستۋدەنتتەرگە جەتىسپەيتىن قۇجاتتاردى قالپىنا كەلتىرۋگە, وقۋداعى ولقىلىقتاردىڭ ورنىن تولتىرۋعا جانە بيىلعى وقۋ جىلىن ۋاقىتىلى اياقتاۋعا كومەكتەسەدى», دەدى گۇلجان جاراسوۆا.
