مەديتسينالىق تەكسەرىستەن مەملەكەتتىك وبلىستىق اۋرۋحانالار مەن ونكولوگيالىق ديسپانسەرلەردە وتۋگە بولادى.
وتكەن جىلى 3 117 قازاقستاندىق توق ىشەك وبىرىنا دۋشار بولىپ, وسى ىندەتتەن 1 504 ناۋقاس كوز جۇمعان. باسقا اۋرۋلار ىشىندە توق ىشەك وبىرى تارالۋى بويىنشا قازاقستاندا ءۇشىنشى ورىندا تۇر.
وسى ورايدا, «ۇلتتىق عىلىمي ونكولوگيالىق ورتالىعى» ينتەرۆەنتسيالىق راديولوگيا مەن ەكسپەرتتىك ەندوسكوپيا ورتالىعىنىڭ جەتەكشىسى قانات باتىربەكوۆ 50 جاستان اسقان ازاماتتاردى تەزىرەك سكرينينگتەن وتۋگە شاقىردى.
سكرينينگ 4 كەزەڭنەن تۇرادى:
- يممۋندىق حيميالىق اناليز – iFOBT وتكىزىلەدى, گەموكۋلت تەست تاپسىرىلادى;
- iFOBT اناليز وڭ ناتيجە بەرسە, ناۋقاس ەندوسكوپيالىق تەكسەرۋگە جىبەرىلەدى. ەندوسكوپيالىق تەكسەرۋدىڭ الدىندا توق ىشەك ارنايى دايىندىقتان وتكىزىلەدى. بۇل ءۇشىن ماماندا جوعارى ساپالى ۆيدەوەندوسكوپ پەن ناتيجە ساقتالاتىن فوتو-ۆيدەو مۇراعاتتىڭ بولۋى شارت;
- توق ىشەكتىڭ دايىندىعى بوستون شكالاسى ارقىلى انىقتالادى. ەگەر دايىندىق 6 ۇپايدان تومەن باعالانسا, ناۋقاس ەندوسكوپيالىق تەكسەرۋگە قايتا دايىندالادى. ال 6-دان جوعارى ۇپاي بەرىلىپ, تەكسەرىس وڭ ناتيجە كورسەتسە, ناۋقاستى ونكولوگقا باعىتتايدى;
- ونكولوگ ناۋقاستى ەندوسكوپيا نەمەسە حيرۋرگيا جولىمەن ەمدەيتىنىن انىقتايدى.
«كولورەكتالدى سكرينينگ قازاقستاندا 2011 جىلى ەنگىزىلدى. ول – ەلدە وتكىزىلەتىن 6 كەڭ تارالعان سكرينينگتىڭ ءبىرى. وكىنىشكە وراي, توق ىشەك وبىرىنا شالدىققان ناۋقاستاردا باستاپقىدا ەشقانداي بەلگى بولماۋى مۇمكىن. سوندىقتان ولار ءوزىنىڭ اۋرۋعا شالدىققانىن سەزبەيدى. بۇل ىندەتكە كوبىنەسە 50-70 جاس ارالىعىنداعى ازاماتتار شالدىعىپ جاتىر», دەپ ءتۇسىندىردى «قازاق ەندوسكوپيا قوعامى» بق توراعاسى قانات باتىربەكوۆ.
قانات باتىربەكوۆ بۇل ىندەتتى تۋدىراتىن ەكى زياندى ادەتتىڭ اسەر ەتەتىنىن دە ايتتى. ولار – ىشىمدىك ءىشۋ مەن شىلىم شەگۋ. سونداي-اق, بۇعان كانتسەروگەن دە ەلەۋلى اسەر ەتۋى مۇمكىن.
