كوز الدىمىزدا – سۋرەتشى ءھام كەسكىندەمەشى قانافيا تەلجانوۆتىڭ «كوكپار» اتتى تۋىندىسى. الىستان بارلاعان ادام جالپى كوكپارعا جاراقتانعان جىگىتتەردىڭ جانتالاسىن, تەبىسىنەن تەڭسەلە جازداپ توپقا كىرگەن قازاناتتىڭ قارقىنىن كورگەندەي, قۇددى جەر ءۇشىن ايقاسىپ جاتقان ساربازدار ەكەن دەر. وسىنداي رۋح پەن كۇشتى قاجەت ەتەتىن ات سپورتىن بابالاردىڭ قالاي ويلاپ تاپقانىنا تاڭداناسىڭ.
قىلقالام شەبەرى ءوز شىعارماشىلىعىندا تاريحي تاقىرىپتارعا, پەيزاج جانرىنا ۇڭىلەدى. سونداي-اق قازاق حالقىنىڭ مادەنيەتى مەن كونە داستۇرلەرىن دارىپتەۋدى ويعا العان.
جالپى, كوكپار – قازاقتىڭ كونەكوز ويىنى. ءۇي ىرگەسىنەن دۇبىرلەتىپ اتتار وتسە قانى تۋلاپ, كەرمەدەگى تۇلپارىنا تۇرمان سالاتىن جۇرتپىز. بۇل ۇلتتىق ات سپورتىنا جاتقانىمەن, ويىننىڭ استارى تەرەڭدە. جاۋگەرشىلىك زاماندا باتىرلىق پەن ەپتىلىككە بەيىمدەۋ, سارباز جولداسى ىسقىرىپ جەتكەن وقتان وپات بولعان جاعدايدا, ات ۇستىنە وڭگەرىپ الىپ, جات جەرگە, جاۋ تابانىندا قالدىرماۋعا ماشىقتانۋدىڭ ەڭ ىڭعايلى ءادىسى دەسەك تە بولادى. ويتكەنى شايقاستا شەيىت كەتكەن اقسۇيەك نەمەسە قولباسىنىڭ سۇيەگىن جاۋ قولىنا بەرۋ – جالاۋىنىڭ جىعىلعانىمەن تەڭ. سوندىقتان دا كوكپار تارتىپ, مايدان دالاسىندا ورىن العان توسىن وقيعادا توسىلىپ قالماۋ ءۇشىن ماشىقتانعان سەكىلدى. بۇل ءبىز بىلەتىن ءبىر عانا سيپاتى مەن سىرى.
سۋرەتشى ءوزىنىڭ «كوكپار» كارتيناسىندا بارىنشا شاۋىپ كەلە جاتقان اتتاعى شيرىققان شاباندوزداردىڭ ءبىر-بىرىمەن جارىسىپ, كوكپاردى تارتىپ الۋعا تىرىسقان ويىننىڭ ەڭ شيەلەنىسكەن ءساتىن بەينەلەگەن. كوكپاردى ۇستاعان جىگىتتىڭ استىنداعى اتى باسىن جوعارى كوتەرىپ, ارتقى اياعىمەن تۇر. ال ويىنشى بولسا, ەردەن قۇلاپ قالماس ءۇشىن اتتىڭ موينىنا جابىسىپ, جۇگەندى مىقتاپ ۇستاپ العان. الدىڭعى پلانداعى ويىنشى ۇزەڭگىگە تۇرىپ الىپ كوكپارعا قولىن سوزۋدا. اۆتور ويىنشىلاردىڭ جەل جەلبىرەتكەن شاشتارى مەن جەيدەلەرىن جانە ءشوپتى بوياۋدى ەركىن, جالپاق ەتىپ جاعۋ ارقىلى كورسەتكەن.
سۋرەتشى جازىقتىڭ تومەنگى سىزىعىن پايدالانعان. كەنەپتىڭ ۇشتەن ەكىسىنە اسپان بەينەلەنگەن. مىنە, سودان بارىپ ەركىندىك سەزىلەدى. بۇل ءتاسىل نازاردى ويىنشىلارعا اۋدارتادى. اسپاننىڭ اشىق ءتۇستى بيىك فونىنداعى قارا ءتۇستى اتتاردىڭ ايىرماشىلىعى كوزگە ۇرىپ تۇر. اتتاردىڭ قيعاش ورنالاسۋى دا قوزعالىس جاسايدى. تۇلپارلار ءبىر ساتتە اسپانعا قالىقتاپ, جۇيىتكىپ بارا جاتقانداي اسەر بەرەدى.
سۋرەتشى ويىننىڭ ەرەكشە سەرپىنىن, جەڭىسكە دەگەن قۇشتارلىقتى, قىزبالىقتى كورسەتكەن. ول كومپوزيتسيانى كورەرمەن ءوزىن وسى ويىنعا قاتىسىپ تۇرعانداي سەزىنەتىندەي ەتىپ جازعان.
