نۇرسۇلتان نازارباەۆ قىتاي حالىق رەسپۋبليكاسىنىڭ ەلشىسىن قىتاي كوممۋنيستىك پارتياسىنىڭ قۇرىلعانىنا 100 جىل تولۋىمەن قۇتتىقتاپ, قىتاي كوممۋنيستىك پارتياسى ورتالىق كوميتەتىنىڭ باس حاتشىسى سي تسزينپينگە جىلى لەبىزىن جولدادى.
– بۇگىن قىتاي كوممۋنيستىك پارتياسىنىڭ 100 جىلدىعى اتالىپ وتىلۋدە. توراعا سي ءتسزينپيندى جانە بارشا قىتاي حالقىن وسى ايتۋلى كۇنمەن قۇتتىقتايمىن! وسى جىلدار ىشىندە قىتاي حالىق رەسپۋبليكاسى العا قاراي ۇلكەن قادام جاسادى. كوممۋنيستىك پارتيانىڭ جوسپارى قىتايدىڭ ءالى دە نىعايىپ, دامي بەرەتىنىن كورسەتىپ وتىر, – دەدى قازاقستاننىڭ تۇڭعىش پرەزيدەنتى.
ەلباسى قازاقستان مەن قىتاي اراسىنداعى ماڭگىلىك جان-جاقتى ستراتەگيالىق سەرىكتەستىكتىڭ دامۋىنىڭ وڭ قارقىنىن اتاپ ءوتتى.
– قىتاي حالىق رەسپۋبليكاسى الەمدىك اۋقىمداعى قۋاتتى مەملەكەتكە اينالدى. ەكونوميكاسى دۇنيە ءجۇزى بويىنشا ەكىنشى ورىندا جانە تەحنولوگيالىق دامۋ دەڭگەيى جوعارى. كەدەيلىكپەن كۇرەس ماسەلەسىندە دە قىتاي ۇلكەن قادام جاسادى. مەن ءاردايىم ءبىزدىڭ قارىم-قاتىناسىمىزدى قولداپ كەلەمىن. ماڭگىلىك جان-جاقتى ستراتەگيالىق سەرىكتەستىك ەكى حالىقتىڭ يگىلىگى ءۇشىن جۇمىس ىستەي بەرەدى. قازاقستاننىڭ قىتاي حالىق رەسپۋبليكاسىمەن ىنتىماقتاستىعى – مەملەكەتارالىق قاتىناستىڭ جارقىن ۇلگىسى, – دەدى نۇرسۇلتان نازارباەۆ.
ءوز كەزەگىندە قىتاي حالىق رەسپۋبليكاسىنىڭ ەلشىسى چجان سياو ەلباسىنا قۇتتىقتاۋى ءۇشىن العىسىن ءبىلدىرىپ, 1 شىلدە – قىتاي كوممۋنيستىك پارتياسىنىڭ مۇشەلەرى ءۇشىن ەڭ ەرەكشە ءارى ۇمىتىلماس كۇندەردىڭ ءبىرى ەكەنىن ايتتى.
– سىزگە بايىرعى ءارى جاقىن دوسىڭىز توراعا سي ءتسزينپيننىڭ ەڭ ىزگى تىلەگى مەن ىستىق سالەمىن جەتكىزگىم كەلەدى. ءسىزدىڭ 6 شىلدەدە وتەتىن الەمدىك ساياسي پارتيالار كوشباسشىلارىنىڭ سامميتىنە قاتىسۋ تۋرالى شەشىمىڭىزدى جوعارى باعالايمىز. بۇل – وتە ماڭىزدى وقيعا. وعان ءسىزدىڭ قاتىسۋىڭىز قازاقستان-قىتاي قارىم-قاتىناسىن دامىتۋعا جانە قىتاي كوممۋنيستىك پارتياسى مەن Nur Otan اراسىنداعى پارتياارالىق بايلانىستى ارتتىرۋعا سەرپىن بەرەرى ءسوزسىز, – دەدى قىتاي حالىق رەسپۋبليكاسىنىڭ توتەنشە جانە وكىلەتتى ەلشىسى.
