قازاقستاننىڭ اتىنان حالىقارالىق دەڭگەيدەگى بايقاۋعا نۇر-سۇلتان, الماتى جانە ورال قالالارىنان ماقسوتوۆ جامبىل, مۇقىمبەكوۆ مانسۇر, اشۋروۆ ءالتايىر, ساحمولدين مۋحامماداريف ەسىمدى ءتورت وقۋشى قاتىستى. ولار وليمپيادانىڭ ەكى كەزەڭىندە التى الگوريتمدىك تاپسىرمانى ورىنداپ, ناتيجەسىندە تورتەۋى دە قولا مەدال يەلەندى.
«قازاقستاندىق وقۋشىلاردىڭ حالىقارالىق زياتكەرلىك جارىستارداعى جەتىستىكتەرى ءبىلىم ساپاسى مەن وتاندىق جاتتىقتىرۋشىلاردىڭ جوعارى قابىلەتىن, اتا-انالاردىڭ قولداۋى مەن وقۋشىلاردىڭ ەرىك-جىگەرىن كورسەتەدى. جەڭىمپازداردى لايىقتى جەڭىستەرىمەن قۇتتىقتايمىز! قر ءبىلىم جانە عىلىم مينيسترلىگى وقۋشىلاردىڭ ءوزىن-ءوزى دامىتۋى ءۇشىن قولايلى جاعداي جاساۋدى جالعاستىراتىنىن اتاپ وتكىمىز كەلەدى», دەدى قر بعم مەكتەپكە دەيىنگى جانە ورتا ءبىلىم كوميتەتىنىڭ ءتورايىمى مايرا مەلدەبەكوۆا.
ايتا كەتەيىك, ءتورت وقۋشى دا – ينفورماتيكا ءپانى بويىنشا رەسپۋبليكالىق پاندىك وليمپيادانىڭ جۇلدەگەرلەرى مەن جەڭىمپازدارى. وقۋشىلاردى ەلىمىزدىڭ جەتەكشى IT ۋنيۆەرسيتەتتەرىنىڭ جاتتىقتىرۋشىلارى دايىندادى.
