الماتى قالالىق پوليتسيا دەپارتامەنتى مالىمەتىنشە, پاترۋلدىك پوليتسيانىڭ ەكى ەكيپاجى دابىلدى قوڭىراۋعا دەرەۋ جاۋاپ بەردى. بۇل 30 ماۋسىم كەشكى ساعات سەگىز دە بولدى.
«كەزەكشى جەدەل ۋاكىلدەن قوڭىراۋ تۇسكەننەن كەيىن بىرنەشە مينۋتتان سوڭ ءبىز وقيعا ورنىندا بولدىق. سىرتتاعى دارەتحاناعا بىرنەشە ادامنىڭ قۇلاپ كەتكەنى تۋرالى اقپارات الدىق. دارەتحانانىڭ سىرتىن الىپ تاستاپ, شۇڭقىرعا باسپالداق تۇسىردىك. ءبىرىنشى بولىپ تومەنگە پوليتسيا كاپيتانى مۇرات كاكىبەكوۆ ءتۇستى. ءبىز باسپالداق پەن ونىڭ قولىنان قاتتى ۇستادىق. تەرەڭدىگى شامامەن 3 مەتر. مۇرات ەر ادامنىڭ قولىنان ۇستاپ ۇلگەردى. ونى شىعارىپ الدىق. كاپيتان كاكىبەكوۆتى بىردەن پوليتسيا اعا لەيتەنانتى ماديار تولەمباەۆ اۋىستىردى. ول ءبىر جاسار قىزدى تاۋىپ, سىرتقا شىعاردى. وكىنىشكە وراي, بالا قايتىس بولدى. وسى كەزدە قۇتقارۋشىلار كەلدى. ولار 56 جاستاعى ايەل مەن 12 جاسار بالانىڭ دەنەسىن شىعارۋ ءۇشىن ارنايى قۇرالداردى قولداندى. وتباسى ءۇشىن اۋىر, ورنى تولماس قايعى», دەدى, پاترۋلدىك پوليتسيا پولكىنىڭ ۆزۆود كومانديرى اسىل رازبەك.
قۇتقارىلعان ەر ادام, جەدەل جاردەمگە تاپسىرىلىپ, شۇعىل اۋرۋحاناعا جەتكىزىلدى.
«قايعىلى جاعدايدى انىقتاۋ بارىسىندا, كەشكە ءۇيدىڭ اۋلاسىندا ويناپ جۇرگەن ءبىر جاسار قىزدىڭ بايقاۋسىزدا كوشەدەگى دارەتحاناعا ءتۇسىپ كەتكەنى انىقتالدى. مۇنى كورگەن ونىڭ 1955 جىلى تۋعان اجەسى مەن 12 جاسار اعاسى كومەككە جۇگىرىپ كەلدى, ولار ءسابيدى شىعارعىسى كەلدى, بىراق ولار دا شۇڭقىرعا ءتۇسىپ كەتتى. سودان كەيىن بالالاردىڭ اكەسى كومەككە كەلدى - 1980 جىلى تۋعان ك.ەسىمدى ازامات. دارەتحانا شۇڭقىرىنا ءتۇسىپ كەتكەن بالالارى مەن اناسىن سول جەردەن شىعارۋعا تىرىسقان. الايدا, ول دا ەسىنەن تانىپ قالدى», دەدى ناۋرىزباي اۋداندىق پوليتسيا باسقارماسىنىڭ باستىعى, پوليتسيا پودپولكوۆنيگى ديدار احانوۆ.
