كەشە عانا حالىقارالىق جەڭىل اتلەتيكا فەدەراتسياسىنىڭ شتاب-پاتەرى ورنالاسقان موناكودان «قازاقستان قۇراماسىنىڭ قورجىنى تاعى ءتورت جولدامامەن تولىقتى» دەگەن قۋانىشتى حابار جەتتى. تارقاتىپ ايتساق, ولگا سافرونوۆا 100 جانە 200 مەترگە جۇگىرەتىندەردىڭ قاتارىنا قوسىلسا, ميحايل ليتۆين 400 مەترلىك قاشىقتىقتا باق سىنايدى. ال يرينا ەكتوۆا ءۇش قارعىپ سەكىرۋشىلەر سايىسىندا ونەر كورسەتەدى.
ءسويتىپ, وتاندىق «سپورت پاديشاسى» وكىلدەرىنىڭ جەڭىپ العان ليتسەنزيالار سانى 11-گە جەتتى. وسىنىڭ الدىنداعى جارىستاردا ولگا رىپاكوۆا مەن ماريا وۆچيننيكوۆا ء(ۇش قارعىپ سەكىرۋ), گريگوري شەيكو مەن ايمان راتوۆا (سپورتتىق ءجۇرىس), جاننا ماماجانوۆا (مارافون) جانە نادەجدا دۋبوۆيتسكايا مەن كريستينا وۆچيننيكوۆا (بيىكتىككە سەكىرۋ) جولى بولىپ, توكيوعا باراتىنداردىڭ تىزىمىنە قوسىلعان ەدى.
