ەڭ كوپ ءوتىنىش قوستاناي وبلىسىنان كەلگەن – 118. ودان كەيىن الماتى قالاسى (83) مەن قاراعاندى وبلىسى (65) وندىرۋشىلەرىنىڭ بەلسەندى ەكەنى بايقالادى. ەڭ از ءوتىنىم ماڭعىستاۋ وبلىسىنان (5) كەلىپ ءتۇسىپتى. شىعىندى وتەۋ جايلى ۇسىنىستاردىڭ 21 پايىزى ءىرى كاسىپكەرلىك سۋبەكتىلەرىنە, 22 پايىزى ورتا جانە 57 پايىزى شاعىن كاسىپكەرلىككە تيەسىلى.
«وتىنىشتەردىڭ باسىم بولىگى – تاۋارلاردى جەتكىزۋ شىعىندارىمەن بايلانىستى. سونىمەن قوسا تاۋارلار اينالىمى بويىنشا دا وتىنىشتەر كوپ. ياعني قازاقستاندىق تاۋارلاردى شەتەلدە جارنامالاۋ مەن جىلجىتۋعا, تاۋارلاردى قويمادا ساقتاۋعا, نارىقتاردا تاۋار بەلگىلەرىن تىركەۋگە جانە تەحرەگلامەنتتەرگە سايكەستىك راسىمدەرىنىڭ وتۋىنە قاتىستى شىعىندار. ۆەدومستۆوارالىق كوميسسيا 11 وتىرىسىنىڭ قورىتىندىسى بويىنشا 307 كومپانيادان 2 356 ملن تەڭگە سوماسىنا 132 ءوتىنىم شىعىنداردى وتەۋگە ماقۇلداندى» دەلىنگەن كومپانيا حابارلاماسىندا.
2019 جىلى مەملەكەتتىك قولداۋ العان كومپانيالار ءوندىرىس كولەمىن 9 پايىزعا, ەكسپورتتىق ءتۇسىم كولەمىن 3 پايىزعا ارتتىرىپتى, ناتيجەسىندە سالىق اۋدارىمدارى كولەمى 45 پايىزعا وسكەن. بۇل جاڭا 755 جۇمىس ورنىنىڭ اشىلۋىنا ىقپال ەتكەن.
ال ءبىزدىڭ تاۋارلار الەمنىڭ 29 ەلىنە تىكەلەي ەكسپورتتالىپتى. ونىڭ اراسىندا قازاق تاۋارلارىن جاڭادان يمپورتتاي باستاعان وڭتۇستىك كورەيا, اقش, ساۋد ارابياسى, ومان, كۋۆەيت سياقتى ەلدەر بار. بىلتىر مەملەكەت قولداۋىن العان كومپانيالاردا ەكسپورت دەڭگەيى 90 پايىزعا دەيىن ءوسىم كورسەتكەن. سالىق اۋدارىمدارىنىڭ كولەمى 83 پايىزعا ۇلعايعان.
«شيكىزاتتىق ەمەس ەكسپورت شىعىندارىنىڭ ءبىر بولىگىن وتەۋ بويىنشا مەملەكەتتىك قولداۋ العان ەكسپورتتاۋشىلار 3 034 جاڭا جۇمىس ورىنىن قۇردى. اقش, مەكسيكا, تايۆان, يزرايل, فرانتسيا, ەستونيا, كانادا سياقتى جاڭا ەكسپورتتىق ەلدەر پايدا بولدى» دەلىنگەن QazTrade مالىمدەمەسىندە.
