قازاقستان اۆتوبيزنەس قاۋىمداستىعىنىڭ دەرەگى بويىنشا وتاندىق ديللەرلەر مامىر ايىندا 9 402 جەڭىل اۆتوكولىك پەن جەڭىل كوممەرتسيالىق تەحنيكا ساتقان. سونىمەن قاتار 695 جۇك كولىگى, ارنايى تەحنيكالار جانە اۆتوبۋستار ساتىلعان. بۇل 2020 جىلدىڭ مامىر ايىمەن سالىستىرعاندا 39,2 پايىزعا كوپ ەكەن.
جالپى, جىل باسىنان بەرى ەل تۇرعىندارى 44 369 جاڭا اۆتوكولىك, اۆتوبۋس جانە جۇك كولىكتەرىن تاقىمعا باسقان. بۇلاردىڭ جيىنتىق ءوسىمى بىلتىرمەن سالىستىرار بولساق 68,8 پايىزعا جوعارى. قاۋىمداستىق ساراپشىلارىنىڭ ايتۋىنشا, قاتاڭ لوكداۋن مەن كارانتين شەكتەۋلەرىنىڭ بولماۋى اۆتوكولىك ساتىلىمىنا سەرپىن بەرىپ وتىر. الايدا جازدىڭ سوڭعى ايلارىندا جاعداي باسقاشا, ياعني ساتىلىم دەڭگەيى تومەندەۋى دە ىقتيمال.
وتكەن ايدا ەڭ كوپ ساتىلعان كولىكتەردىڭ وندىعىنا قانداي ماركالار كىرەدى؟ ءبىرىنشى ورىندا – Chevrolet. مامىر ايىندا بۇل ماركانىڭ 2 791 بىرلىك ساتىلسا, Hyundai-دىڭ 1 644 بىرلىگى تۇتىنۋشىلار قولىنا جەتكەن. ۇشتىكتى 1 398 دانا ساتىلىممەن Toyota تۇيىندەيدى. ودان كەيىنگى ورىندا Kia (1030 دانا) مەن Lada (702 دانا) تۇر. سونىمەن بىرگە Volkswagen (465), Renault (310), Nissan (274) جانە Lexus (149) ماركالارىنا قىزىعۋشىلىق تانىتۋشىلار دا ارتىپ كەلەدى. وندىقتى 135 دانا ساتىلىممەن قىتايلىق JAC ماركاسى قورىتىندىلاپ تۇر.
قاۋىمداستىق مامىر ايىندا قازاقستاندىقتاردىڭ ىقىلاسىنا ەرەكشە بولەنگەن كولىك مودەلدەرى تۋرالى دا اقپاراتتاردى جاريا ەتكەن. وعان سۇيەنسەك, العاشقى ۇشتىكتە Chevrolet Nexia (1522), Chevrolet Cobalt (1015) جانە Hyundai Accent (747) بار. بۇل كولىكتەردىڭ جەڭىلدەتىلگەن جانە قاراپايىم نەسيەلەۋ باعدارلامالارى ارقىلى بەرىلۋى دە كولىك ساتىلىمىن ارتتىرا تۇسۋگە سەپتىگىن تيگىزگەنى انىق. ەڭ كوپ ساۋداعا شىعارىلعان مودەلدەر وندىعىندا Kia Rio (617), Toyota Camry (584), Toyota RAV4 (425), Volkswagen Polo (362), Hyundai Santa Fe (304), Hyundai Creta (295), Lada Largus تا (285) بار.
جاقىن ۋاقىتتا ەلىمىزدە تاعى ءبىر مودەل تانىمالدىلىققا يە بولۋى مۇمكىن. بيىل 25 مامىردان باستاپ ەلىمىزدە جاڭا Chevrolet Equinox كروسسوۆەرىنىڭ ساتىلىمى باستالدى. جاڭا مودەل قوستاناي قالاسىنداعى «سارىارقااۆتوپرومدا» قۇراستىرىلماق. Chevrolet Equinox وتاندىق نارىقتا ءۇش تۇسپەن – اق, قارا جانە سۇر تۇستە ۇسىنىلماق. باعاسى – 13 ملن 490 مىڭ تەڭگە. جوعارىداعى رەيتينگتىڭ ءوزى ايتىپ تۇرعانداي سوڭعى جىلدارى ەل اراسىندا Chevrolet ماركاسىنىڭ تانىمالدىلىعى ەسەلەپ ارتتى. وسى كۇنگە دەيىن Chevrolet پەن Ravon-نىڭ 19 045 داناسى قۇراستىرىلعان.
سوڭعى بەس جىلدا جالپى سوماسى 140 ملرد تەڭگەگە 27 مىڭ اۆتوكولىك جەڭىلدەتىلگەن نەسيە ارقىلى ساتىلىپتى.
