گ.ا.اتكنين – كەستە تىگۋ شەبەرى. ول ءۇشىن شابىتتىڭ نەگىزگى كوزى حاكاس حالقىنىڭ قولونەرى بولعان. كوركەم كەستەلەردەن باسقا سۋرەتشى كەسكىندەمە, گرافيكا جانە ءمۇسىن سالاسىندا دا جەمىستى ەڭبەك ەتكەن. گريگوري الەكسەەۆيچ 1906 جىلى 14 قاراشادا ۋست-اباكاندا دۇنيەگە كەلگەن. 1926 جىلى ومبىداعى ۆرۋبەل اتىنداعى كوركەمسۋرەت تەحنيكۋمىنا, كەسكىندەمە جانە دەكوراتسيا فاكۋلتەتىنە وقۋعا تۇسەدى. ماسكەۋدە, اباكاندا, تاشكەنتتە وقيدى, قىزمەت ىستەيدى. 1962 جىلى الماتى قالاسىنا, وتباسىمەن كوشىپ كەلگەن جانە ءدال وسى شەبەرلەردىڭ قولىنان اقىن-جازۋشىلارىمىز ج.جاباەۆ, م.اۋەزوۆ, س.سەيفۋللين, س.مۇقانوۆتىڭ پورترەتتەرى كەستەلەنگەن ەكەن. قولونەر شەبەرى, سۋرەتشى گ.اتكنيننىڭ ەڭ ۇلكەن ەڭبەگى – كەستەمەن توقىلعان پورترەت جاساۋدى ۇزدىك ونەر دارەجەسىنە كوتەرۋى.
مۋزەيدە تۇرعان سابەڭنىڭ جەكە پورترەتى كەستە (مۋلينە) جىپپەن شەبەر ورىندالعان. 1970 جىلى قازاقستان جازۋشىلار وداعىنىڭ ارنايى تاپسىرىسىمەن جاسالىپ, جازۋشىنىڭ 70 جىلدىق مەرەيتويىنا تارتۋ ەتىلگەن. بۇل تۋرالى: «ورنىمنان تۇرىپ, قابىرعادا ءىلۋلى تۇرعان سۋرەتتەرگە قاراي باستادىم. «مىناۋ اكۆارەل, اناۋ مايلى بوياۋمەن سالىنعان.. بۇرىشتاعى شە؟ كەستە عوي. مىناۋ... بۇل قانداي شەبەردىڭ قولىنان شىقتى ەكەن؟ قاعازعا سالعان سۋرەت تە مۇنداي ادەمى بولماس... سابەڭنىڭ ءدال ءوزى: ۇستىندە قازاقى تۇيە ءجۇن شەكپەنى, باسىندا سۋسار بورىك, كوزىن ءسال قىسىڭقىراپ, قۋلانا ك ۇلىپ تۇر. كىمنىڭ ونەرى بولسا دا, كوز تيمەسىن!» – دەپ تامسانا جازعان ەكەن وزبەك جازۋشىسى ناسىر فازىلوۆ («كادىمگى ءسابيت مۇقانوۆ», ەستەلىكتەر. 1984).
پورترەتتى مۋزەيگە سابەڭنىڭ 47 جىل وتاسقان سۇيىكتى جارى ءماريام قوجاحمەتقىزى 1978 جىلى تابىستاعان. ءساتى ءتۇسىپ مۋزەيگە كەلۋشىلەر سۇيسىنە قاراپ, تاماشالايتىن قۇندى جادىگەر.
جانار تاەۆا,
«الماتى قالاسىنىڭ مۋزەيلەر بىرلەستىگىنە» قاراستى س.مۇقانوۆ پەن
ع.مۇسىرەپوۆتىڭ ادەبي-مەموريالدىق مۋزەي كەشەنىنىڭ عىلىمي قىزمەتكەرى
