قالام قاسيەتى قانعا بىتەتىنىن ءبىز كوبىنە ەسكەرە بەرمەيمىز. شاماحاي ۇلىنىڭ شىعارماشىلىعىنا ۇڭىلمەس بۇرىن ونىڭ ارعى اتا-تەگىن ايرىقشا اتاپ كەتكەن دۇرىس. ءوز جۇرتى دا, ناعاشى جۇرتى دا سۇيەكتەرىنە ءسوز سىڭگەن قاراكوك تۇقىم قۋاندىق شاماحاي ۇلى دالا دانالىعىنا جاستايىنان قانعان قالامگەر. قازاقتىڭ قايماعى بۇزىلماعان قاستەرلى ءسوزىن قالامىنا سەرىك ەتكەن ونىڭ ءار جازعان ماقالاسىندا ۇلت مۇراتى انداعايلاپ تۇرار ەدى.
قالامى جۇيرىك جۋرناليست رەتىندە قوعامنىڭ تامىرشىسىنداي وتكىر ماسەلەلەرگە وزىندىك كوزقاراسىن ارقاشان تايساقتاماي ءبىلدىرىپ, تاپ باسىپ وتىراتىن ول ۇنەمى شىندىق جاعىندا بولدى. قۋاندىق قالامى جۋرناليستىك جازبالاردان بولەك, جازۋشىلىققا دا ءونىمدى ەڭبەك ەتتى. ونىڭ ءورشىل مىنەزى, اقتى اق, قارانى قارا دەيتىن اقيقاتشىل ۇستانىمى ارقاشان دارالانىپ تۇراتىن.
مىنبەرگە ەڭ الدىمەن ءوزىنىڭ باس پايداسىن ەمەس, ۇلتتىق مۇددەنى ءبىرىنشى الىپ شىعاتىن بىرەگەي جۋرناليست رەتىندە دە قۋاندىق شاماحاي ۇلى كوپ قاتارلاستارىنان قارا ءۇزىپ تۇراتىن.
بەلسەندىلىگىن ەشقاشان باسەڭدەتپەگەن كۇيى ول بۇل ءفاني جالعاندى ءبىر-اق كۇندە تارك ەتىپ كەتە باردى...
اجالعا اراشا تۇسكەن كىم بار, شاماحاي ۇلىنىڭ شامىرقانعان قالامىنان ەندىگارى قازاقتىڭ قامىن جەيتىن قايسار ماقالالار تۋمايدى... وكىنىشتى, ورنى تولماس قايعى! الايدا ونىڭ سوڭىندا قالعان ەسەلى ەڭبەكتەرى ەل كادەسىنە ماڭگى جاراي بەرەدى.
