قىرىقباي اعامىز قاسيەتتى باياناۋىل توپىراعىندا ومىرگە كەلگەن. جاسىنان جازبالارى اۋداندىق گازەتتە جارىق كورىپ, ەل ىشىندە ء«تىلشى بالا» اتاندى. ورتا مەكتەپتى ءبىتىرىپ, وتان الدىنداعى ازاماتتىق بورىشىن وتەپ كەلگەننەن كەيىن باياناۋىل اۋداندىق گازەتىندە ادەبي قىزمەتكەر, اۋىل شارۋاشىلىعى ءبولىمىنىڭ مەڭگەرۋشىسى جانە پاۆلودار وبلىستىق راديوسىندا قىزمەت ىستەي ءجۇرىپ, تۋعان ءوڭىرىنىڭ تاريحى مەن رۋحانياتى جايىندا تىڭ دەرەكتەر جيناپ, وقىرماندارعا تانىمدىق ءمانى زور ماقالالار ۇسىندى. 1987 جىلى ءوزى ءبىلىم العان قازاق ۇلتتىق ۋنيۆەرسيتەتىنىڭ «جۋرناليستيكا تاريحى» كافەدراسىنا وقىتۋشى بولىپ ورنالاستى. 1992 جىلى ۇعا كوررەسپوندەنت-مۇشەسى M.X.اسىلبەكوۆتىڭ عىلىمي جەتەكشىلىگىمەن ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ جانىنداعى ديسسەرتاتسيالىق كەڭەستە «وتەچەستۆەننىە زاپيسكي» جۋرنالى رەسەيدىڭ قازاقستانداعى وتارلاۋ ساياساتى تۋرالى» دەگەن تاقىرىپتاعى كانديداتتىق ديسسەرتاتسياسىن, 2001 جىلى «رەسەيدىڭ قازاقستانداعى وتارلاۋ ساياساتىنىڭ باعىتتارى مەن ناتيجەلەرى» اتتى دوكتورلىق ديسسەرتاتسياسىن ءساتتى قورعاپ شىقتى.
ارداقتى ازامات قازاق تاريحى مەن جۋرناليستيكاسىنا قاتىستى وقۋلىقتار, وقۋ قۇرالدارى مەن مونوگرافيالار, جۇزدەگەن عىلىمي ماقالا جازىپ, وتاندىق عىلىمنىڭ دامۋىنا ايتارلىقتاي ۇلەس قوستى. سونىمەن بىرگە باياناۋىلدىڭ باي تاريحى مەن تاعىلىمدى تۇلعالارى تۋرالى قۇندى ەڭبەكتەر جازدى. ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندەگى جۋرناليستيكا جانە ساياساتتانۋ فاكۋلتەتى ء«باسپاسوز جانە باسپا ءىسى» كافەدراسىنىڭ پروفەسسورى قىزمەتىن اتقارىپ, بىرنەشە ءبىلىمدى شاكىرت تاربيەلەپ, ولاردى عىلىم جولىنا باۋلىدى. حالقىمىز «جاقسىنىڭ اتى, عالىمنىڭ حاتى وشپەيدى» دەپ بەكەر ايتپاعان, كەيىنگى جاس ۇرپاققا مازمۇندى مۇرا قالدىرعان عيبراتتى عالىمنىڭ اتى ماڭگى جاسايتىنى انىق.
