قارشادايىنان قارا ءسوزدى ءپىر تۇتىپ وسكەن ۇشقىر قالام يەسىنىڭ العاشقى دۇنيەلەرى اۋداندىق گازەتتە جارىق كوردى. الايدا ول كىسىنىڭ ەڭبەك جولى ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن بىتىرگەننەن كەيىن جەتكىنشەكتەردىڭ سۇيىكتى باسىلىمىنا اينالعان, قازىرگى «ۇلان» گازەتىنەن باستالدى. وسى باسىلىمدا ءجۇرىپ, جۋرناليستيكانىڭ قازانىندا قايناپ, مارتەبەلى ماماندىقتىڭ قىر-سىرىن ۇيرەندى. سودان سوڭ تالاي تالانت تۇلەپ ۇشقان «جاس الاشتا» ەڭبەك ەتىپ, تانىمدىق ماقالالارىمەن ەلگە تانىلدى.
بەلگىلى قالامگەر باۋىرجان ومار ۇلى «جۇرت جادىنداعى جولداسبەك» اتتى ەستەلىگىندە: «جولداسبەكپەن بىرگە «جاس الاشتا» ەكى-ءۇش جىل قىزمەت ىستەگەن سوڭ ءبىز باسقا جۇمىسقا اۋىستىق. ول سول باسىلىمدا قالىپ, ونشاقتى جىل تەر توكتى. گازەتتىڭ جىرتىعىن جامادى. كۇندەلىكتى اقپاراتتى اجداھاداي جۇتىپ جاتاتىن باسىلىمنىڭ ءومىرى تىعىندالمايتىن وڭەشىن تولتىرۋمەن اينالىستى. ول بارلىق دەرلىك جانردى يگەردى. حابار-وشار ازىرلەيتىن بولىمدە ماشىقتانىپ, قالامىنان ءتۇرلى زامەتكا تۋىنداتتى...
قاتارىنان وزعان زامانداس كەلبەتىن ايشىقتاپ, پورترەتتىك وچەرك جازدى. قاي باسىلىمدا قىزمەت ىستەسە دە, ول اسقان ۇقىپتىلىعىمەن كوزگە ءتۇستى» دەپ جازادى.
كەيىنىرەك جولداسبەك رەسپۋبليكالىق «ايقىن» گازەتىنىڭ ىرگەتاسىن قالاسىپ, سونىڭ دامۋىنا ايتارلىقتاي ۇلەس قوستى. «جاس قازاق» باسىلىمى باس رەداكتورىنىڭ ورىنباسارى بولعاندا دا جەمىستى جۇمىس ىستەپ, ەلىمىزدىڭ وزەكتى ماسەلەلەرىن قالامىنا ارقاۋ ەتتى. ءبىراز جىل ول كىسىمەن ارىپتەس بولعان پارلامەنت سەناتىنىڭ دەپۋتاتى, قالامگەر نۇرتورە ءجۇسىپ: «جولداسبەك دۋاناباي ۇنەمى ىزدەنىس ۇستىندە جۇرەتىن. قاشان دا تىڭنان تاقىرىپ تاپقانعا شەبەر ەدى. ەلدىڭ كوكەيىنەن شىعاتىن ماسەلەلەردى دەرەۋ ازىرلەيتىن. مۇنىڭ بارلىعى كوپ وقۋدان شىعاتىن قاسيەت. الەمدىك جۋرناليستيكا جاڭالىقتارىنا ءجيى قۇلاق ءتۇرىپ ءجۇرۋشى ەدى. ونىڭ ارحيۆىندە نەشە ءتۇرلى تانىمدىق ماقالا جيناۋلى تۇراتىن. ول كىسى قالجىڭعا شەبەر بولاتىن. تاۋىپ ايتقىشتىعى دا بار. بالاشا اقكوڭىل ەدى» دەپ ايتادى.
سانالى عۇمىرىن قازاق جۋرناليستيكاسىنا ارناعان اسىل ازاماتتىڭ وقىرماندارى باردا ەسىمى ۇمىتىلمايدى دەپ سەنەمىز.
