تارقاتىپ ايتساق, ەرلەر مەن ايەلدەر اراسىندا 128 ويىنشىدان سايىسقا تۇسەدى. ودان بولەك, جۇپتىق جانە ارالاس جۇپتار اراسىنداعى باسەكەلەر تاعى بار. ەكى اپتاعا سوزىلاتىن تالاي جىلعى تاريحى بار وسى ءداستۇرلى جارىستىڭ بيىل دا قىزىققا تولى بولاتىنىنا ەش كۇمانىمىز جوق.
«ۇلكەن دۋلىعا» ساناتىنا كىرگەن تۋرنيرلەردىڭ بارلىعىنىڭ دا جۇلدە قورى قوماقتى بولاتىنىن جانكۇيەرلەر جاقسى بىلەدى. بىراق وتكەن جىلدارعا قاراعاندا «ۋيمبلدوننىڭ» بيۋدجەتى بيىل ءبىراز قىسقارعان ەكەن. ماسەلەن, جارىستىڭ جەكەلەگەن سايىستارداعى جەڭىمپازدارىنىڭ ەسەپ-شوتىنا بىلتىر 2 350 000 فۋنت ستەرلينگ اۋدارىلسا, وسى جولى چەمپيوندار 1 700 000 الادى. 2019 جىلمەن سالىستىرعاندا بۇل 27,7 پايىزعا كەم. اقتىق سايىستا ۇتىلعاندارعا 900 000-دى قاناعات تۇتۋىنا تۋرا كەلەدى. جارتىلاي فينالعا شىققاندار 465 000-دى ولجالايدى. وسىعان دەيىنگى تۋرنيرلەردە وسى مەجەگە جەتكەن ويىنشىلار بۇدان الدەقايدا كوپ اقشا الاتىن. ال ودان ناشار ونەر كورسەتكەندەردىڭ قارجىسى, كەرسىنشە, ءبىرشاما ارتقان. اتاپ ايتساق, شيرەك فينالعا شىققاندار 300 000 السا, 1/8 فينالعا دەيىن جەتكەندەر 181 000-عا بايدى. جالپى, وسى جارىسقا قاتىسۋدىڭ ءوزى تەننيسشىلەر ءۇشىن ۇلكەن ابىروي جانە ماتەريالدىق جاعدايلارىن تۇزەۋ ءۇشىن تاماشا مۇمكىندىك ەكەنى داۋسىز. ولاي دەۋگە نەگىز, ەگەر ءۇشىنشى كەزەڭدە ۇتىلسا 115 000-دى يەمدەنەدى, ەكىنشى اينالىمعا شىققاندار 75 000-دى ەنشىلەيدى. تىپتەن, تۇساۋكەسەر كەزدەسۋدە ساتسىزدىككە ۇشىراعانداردىڭ وزدەرى لوندوننان قۇر قول قايتپايدى. ولار 48 000 فۋنت ستەرلينگتى قالتاعا باسادى. ارينە, بۇل دا از اقشا ەمەس.
«ۋيمبلدوننىڭ» 144 جىلدىق تاريحى بار. بۇل ءتۋرنيردىڭ تۇساۋى سوناۋ 1877 جىلى كەسىلدى. سول كەزدەن بەرى تالاي جاقسىلار مەن جايساڭدار تۇماندى البيون ەلىندە ونەر كورسەتىپ, تولاعاي تابىستارعا قول جەتكىزدى. ەرلەر اراسىندا ەڭ مول ولجاعا كەنەلگەن لوۋرەنس دوحەرتي. انگليانىڭ مەيدستون ءوڭىرىنىڭ تۋماسى ءحىح بەن حح عاسىرلار توعىسىندا جەكەلەگەن باسەكەدە بەس رەت توپ جارسا, ءوزىنىڭ تۋعان اعاسى رەدجينالدپەن بىرگە جۇپتىق سايىستا سەگىز مارتە جەڭىس تويىن تويلادى. بارلىعى – 13 جۇلدە! ودان بولەك, ولار وليمپيا ويىندارىندا ءبىر ەمەس, بىرنەشە مارتە دارا شىقتى. وكىنىشكە قاراي, اعايىندىلاردىڭ ءومىرى كەلتە بولدى. رەدجينالد نەبارى 38 جىل عۇمىر كەشسە, لوۋرەنس 43 جاسىندا كوز جۇمدى.
جەكەلەگەن سايىستا رودجەر فەدەرەردىڭ الدىنا تۇسەتىن ەشكىم جوق. شۆەيتساريانىڭ بازەل قالاسىندا دۇنيەگە كەلگەن سپورتشى 2004-2018 جىلدار ارالىعىندا 8 رەت تەڭدەسسىز دەپ تانىلدى. بيىل تامىز ايىندا 40 جاسقا تولاتىن داڭقتى تەننيسشى تاياۋ كۇندەرى شىمىلدىعى تۇرىلەتىن جارىستا دا جەڭىسكە جەتۋدى كوزدەۋدە.
ايەلدەر اراسىندا مارتينا ناۆراتيلوۆانىڭ شوقتىعى بيىك. كەلمەسكە كەتكەن چەحوسلوۆاكيادا تۋىپ-ءوسىپ, كەيىننەن اقش-قا قونىس اۋدارعان ايگىلى ويىنشى 1976-2003 جىلدار ارالىعىندا 20 رەت باس جۇلدەنى ولجالادى. سونىڭ توعىزى جەكەلەگەن سايىستارداعى جەڭىسى. قالعاندارى جۇپتىق جانە ارالاس جۇپتار اراسىنداعى تابىستارى. راسىندا دا شيرەك عاسىردان اسا كورتتا اتوي سالىپ, اسا بيىك بەلەستەردى باعىندىرعان ناۆراتيلوۆانىڭ تولاعاي تابىستارىنا تاڭدانباۋ مۇمكىن ەمەس. سول سەكىلدى بيللي دجين كينگ تە 20 مارتە جەڭىس تۇعىرىنىڭ ەڭ بيىك ساتىسىنا كوتەرىلدى. اقش-تىڭ كاليفورنيا شتاتىنداعى لونگ-بيچ قالاسىنىڭ تۋماسى 1961-1979 جىلدار ارالىعىندا جاسىنداي جارقىرادى. سول جۇلدەلەردىڭ التاۋىن ول جەكەلەگەن سايىستا جەڭىپ الدى.
سپورتتىق شەجىرەنىڭ سارعايعان بەتتەرىن پاراقتاساق, مىناداي قىزىقتى جايتتارعا قانىق بولامىز: ۋيمبلدوننىڭ ەڭ جاس چەمپيوندارى – شۆەيتساريالىق مارتينا حينگيس (15 جاس 282 كۇن) پەن گەرمانيالىق بوريس بەككەر (17 جاس 227 كۇن). لوندونداعى ءتۋرنيردىڭ ەڭ قارت جەڭىمپازدارى – مارتينا ناۆراتيلوۆا مەن گاردنار ماللوي. ولاردىڭ ەكەۋى دە اقش-تىڭ نامىسىن قورعادى. مارتينا ارالاس جۇپ باسەكەسىندە 46 جاستان اسقان شاعىندا (2003 جىل) شاشاسىنا شاڭ جۇقتىرماسا, گاردنار 43 جاسىندا (1957) جۇپتىق دودادا دارا شىقتى.
2007 جىلى امەريكالىق دجون يزنەر مەن فرانتسيالىق نيكوليا مايۋ 11 ساعات 05 مينۋت بويى ايقاستى. بۇل – ەڭ ۇزاققا سوزىلعان باسەكە. ەكى سپورتشىنىڭ تارتىسى 6:4, 3:6, 6:7, 7:6, 7:6 ەسەبىمەن اقش وكىلىنىڭ پايداسىنا شەشىلدى. 2019 جىلدىڭ فينالدىق سايىسىندا سەربيالىق نوۆاك دجوكوۆيچ پەن شۆەيتساريالىق رودجەر فەدەرەر 4 ساعات 57 مينۋت كۇش سىناستى. اسا شەيەلەنىستى وتكەن ماتچ 7:6, 2:6, 7:6, 4:6, 7:6 ەسەبىمەن العاشقىسىنىڭ جەڭىسىمەن اياقتالدى. 1922 جىلى فرانتسيالىق سيۋزانن لەنگلەن مەن امەريكالىق موللا ماللوري اقتىق سىننىڭ «تاعدىرىن» نەبارى 23 مينۋتتا شەشتى. بۇل ويىندا 6:2, 6:0 ەسەبى تىركەلدى. ال 2010 جىلى اقش-تىڭ ورەنى تەيلور دەنتتىڭ باعىتتاعان دوبى ساعاتىنا 238 شاقىرىمدىق جىلدامدىقپەن جۇيتكىدى.
قازاقستاننىڭ تەننيسشىلەرى دە ۋيمبلدونعا ۇزدىكسىز قاتىسىپ كەلەدى. الايدا «الىسقا شاپقان» ويىنشىلارىمىز سيرەك. ماسەلەن, 2016 جىلعى جارىستىڭ جەكەلەگەن سايىسىندا ياروسلاۆا شۆەدوۆا شيرەك فينالعا دەيىن جەتتى. بۇل مەجەدە ونى ايگىلى امەريكالىق ۆينۋس ۋيليامس توقتاتتى. ەسەسىنە شۆەدوۆا 2010 جىلى ءدال وسى ءتۋرنيردىڭ جۇپتىق باسەكەسىندە باس جۇلدەنى ولجالادى.
زارينا دياس پەن ميحايل كۋكۋشكين تۇماندى البيون ەلىندەگى ءتۋرنيردىڭ ءتورتىنشى كەزەڭىندە ونەر كورسەتتى. بۇل مەجەگە دياس 2014 جانە 2015 جىلدارى جەتسە, كۋكۋشكين 2019 جىلى ءتاۋىر ناتيجە كورسەتتى. مىنە, «ۋيمبلدونداعى» جەرلەستەرىمىزدىڭ ەڭ ۇزدىك ناتيجەسى وسىنداي.
بىلتىر كوروناۆيرۋستىڭ كەسىرىنەن ايتۋلى جارىس وتپەدى. ول ونىڭ الدىنداعى دودادا نوۆاك دجوكوۆيچ دارا شىقتى. سەربيانىڭ ساڭلاعى فينالدا شۆەيتساريانىڭ ماقتانىشى رودجەر فەدەرەردەن باسىم ءتۇستى – 7:6, 1:6, 7:6, 4:6, 13:12. ايەلدەر باسەكەسىندە رۋمىنيالىق سيمونا حالەپ امەريكالىق سەرەنا ءۋيليامستى جەڭدى – 6:2, 6:2.
