الەمدەگى ەڭ بەلدى پروموۋشەندە كۇش سىناسىپ جۇرگەن جارتىلاي ورتا سالماقتاعى (77.1 كيلو) قانداسىمىز ەكىنشى كەزدەسۋىن برازيليالىق ميشەل پرازەريسكە قارسى وتكىزدى. وڭتۇستىك امەريكا قۇرلىعىنىڭ وعلانى وسى سپورت ءتۇرىن سەرىك ەتكەن 20 جىل ۋاقىت ارالىعىندا 29 كەزدەسۋ وتكىزىپ, 26 رەت جەڭىسكە جەتتى. 13 قارسىلاسىن ەسىنەن تاندىردى. پرازەريس تەك پاۋلۋ تياگۋ, كەۆين لي جانە يسمايل ناۋرديەۆ سىندى ساڭلاقتاردان ۇتىلدى. سونىڭ وزىندە ايانباي ايقاسىپ, ولارعا تەك ۇپاي سانىمەن ەسە جىبەردى.
دەسەك تە شاۆقات راحمونوۆقا قارسى ايقاستا برازيليالىق سپورتشى ەش قايرات كورسەتە العان جوق. باسەكە باستالعان بەتتەن تىزگىندى مىقتاپ قولىنا العان قازاقتىڭ ۇلى سوققىلارىن ءدال دارىتىپ قانا قويماي, تورتتاعاندا دا باسىمدىعىن بايقاتتى.
ەكىنشى راۋندتا راحمونوۆتىڭ اۋىر سوققىسىنان كەيىن پرازەريس ءبىراز ەسەڭگىرەپ قالدى. شاۆقات ونى جىعىپ الدى دا, شابۋىلىن ۇدەتە ءتۇستى. ارقا تۇستان جاسالعان سوققىلاردىڭ بارلىعى دا وڭباي ءتيدى. ءبىر مەزەتتە ول تاكتيكاسىن دەرەۋ وزگەرتىپ, «قىلقىندىرۋ» ءتاسىلىن قولداندى. «تەمىر قۇرساۋدان» ميشەل قۇتىلا المادى.
وسىلايشا, 26 جاستاعى شاۆقات راحمونوۆ ءوزىنىڭ 14-ءشى كەزدەسۋىندە جەڭىس تويىن تويلادى. ءبىر كەرەمەتى, وسى باسەكەلەردىڭ بارلىعىندا ول ايقىن باسىمدىققا يە بولدى.
