مەديتسينا • 19 ماۋسىم، 2021

ورتالىق ازياداعى العاشقى «گامما-پىشاق» ۇلتتىق نەيروحيرۋرگيا ورتالىعىندا ورناتىلدى

23 رەت كورسەتىلدى

قر پرەمەر-ءمينيسترى اسقار مامين ۇلتتىق نەيروحيرۋرگيا ورتالىعىندا بولىپ، وندا جاڭا راديولوگيا جانە راديوحيرۋرگيا ءبولىمىنىڭ جۇمىسىمەن تانىستى، دەپ حابارلايدى Egemen.kz primeminister.kz سايتىنا سىلتەمە جاساپ.

ۇكىمەت باسشىسىنا شۆەتسيادا شىعارىلعان زاماناۋي «گامما-پىشاق» كەشەنى تانىستىرىلدى. قازاقستان تمد اۋماعىنداعى ءۇشىنشى ەلگە جانە وسىنداي جوعارى تەحنولوگيالىق جابدىعى بار ورتالىق ازياداعى ءبىرىنشى ەلگە اينالدى. جالپى، الەمدە 400-گە جۋىق «گامما-پىشاق» قوندىرعىسى بار، ولاردىڭ جارتىسى اقش پەن جاپونيادا ورنالاسقان.

«گامما-پىشاق» — بۇل باس ميى ىسىكتەرىن، تامىرلى جانە فۋنكتسيونالدى اۋرۋلارىن ەمدەۋگە ارنالعان راديوحيرۋرگيالىق قوندىرعى. مۇندا 192 كوبالت-60 كوزدەرىنەن راديواكتيۆتى ساۋلەلەنۋ قولدانىلادى، ونىڭ ساۋلەلەرى پاتولوگيالىق وشاق ايماعىندا جينالىپ، بىرىكتىرىلەدى. ولار ىسىك جاسۋشالارىنىڭ دنق-سىن بۇزادى. بۇل رەتتە ميدىڭ ساۋ تىندەرى مەن ناۋقاستىڭ بۇكىل دەنەسى ساۋلەلەنبەيدى. وپەراتسيانىڭ ءوزى اۋىرسىندىرماي، باس سۇيەگىن ترەپاناتسيالاۋسىز جاسالادى. وپەراتسيا ءبىر رەتتىك، ياعني ساۋلەلىك تەراپيا سەكىلدى بىرنەشە ساتىدا جۇرگىزۋدىڭ قاجەتى جوق. سوندىقتان بۇگىنگى تاڭدا «گامما- پىشاق» — راديوحيرۋرگيالىق ەمدەۋدىڭ «التىن ستاندارتى».

قازاقستاندىقتار مۇنداي ەمدى كۆوتا بويىنشا تەگىن الا الادى. بۇعان دەيىن پاتسيەنتتەردى قىمبات ەمدەۋگە شەت ەلدەرگە جىبەرۋگە تۋرا كەلدى. ۇلتتىق نەيروحيرۋرگيا ورتالىعىندا ورتالىق ازيا ايماعىنداعى جالعىز «گامما-پىشاقتىڭ» بولۋى قر-دا مەديتسينالىق ءتۋريزمدى دامىتۋعا دا ىقپال ەتەدى.

«دەنساۋلىق ساقتاۋ جۇيەسىنىڭ قولجەتىمدىلىگى مەن تيىمدىلىگىن ارتتىرۋ – ەلىمىزدىڭ دامۋىنىڭ باستى باسىمدىقتارىنىڭ ءبىرى. ازىرلەنىپ جاتقان «دەنى ساۋ ۇلت» ۇلتتىق جوباسى اياسىندا دەنساۋلىق ساقتاۋ ينفراقۇرىلىمىن ودان ءارى جاڭعىرتۋ جانە مەديتسينا قىزمەتكەرلەرىن الەۋمەتتىك قولداۋ شارالارىن جەتىلدىرۋ بويىنشا شارالار كەشەنى قابىلدانادى»، دەگەن ا. مامين قازاقستاندىق دارىگەرلەردى كەلە جاتقان كاسىبي مەرەكەمەن قۇتتىقتادى.

سونىمەن قاتار ۇلتتىق نەيروحيرۋرگيا ورتالىعىنا پرەمەر-ءمينيستردىڭ ورىنباسارى ەرالى توعجانوۆ، دەنساۋلىق ساقتاۋ ءمينيسترى الەكسەي تسوي جانە نۇر-سۇلتان قالاسىنىڭ اكىمى التاي كولگىنوۆ باردى.

سوڭعى جاڭالىقتار

ۇقساس جاڭالىقتار