ايماقتار • 18 ماۋسىم، 2021

ەلوردادا سۋداعى قاۋىپسىزدىك قالاي قامتاماسىز ەتىلەدى؟

13 رەت كورسەتىلدى

بۇگىنگى تاڭدا ەلوردادا 23 شومىلۋ ورنى انىقتالدى، الايدا ولاردىڭ تەك 3-ەۋىنە عانا رۇقسات ەتىلگەن. قالعانى رۇقسات ەتىلمەگەن جانە قاۋىپتى بولىپ ەسەپتەلەدى، دەپ حابارلايدى ەلوردا اكىمدىگىنىڭ رەسمي سايتى.

شومىلۋ ماۋسىمىندا سۋداعى قاۋىپسىزدىك قالاي قامتاماسىز ەتىلەتىنى جانە سۋ ايدىندارىنداعى جازاتايىم وقيعالاردىڭ نەگىزگى سەبەپتەرى تۋرالى ونلاين-بريفينگتە نۇر-سۇلتان قالاسى تجد باستىعىنىڭ مىندەتىن اتقارۋشى ەسەن بايىروۆ ايتىپ بەردى.

سپيكەردىڭ ايتۋىنشا، نۇر-سۇلتان قالاسى تج دەپارتامەنتى قايعىلى جاعدايلارعا جانە سۋدا جاراقاتتانۋعا جول بەرمەس ءۇشىن قاجەتتى ءىس-شارالاردى قارقىندى جۇرگىزۋدە.

«قازىرگى ۋاقىتتا نۇر-سۇلتان قالاسىندا تجد كۇشتەرى مەن قۇرالدارى، 29 قۇتقارۋشى-سۇڭگۋىر، سۇڭگۋىرلىك جاراقتارى بار 2 بىرلىك جەدەل-قۇتقارۋ تەحنيكاسى، 6 بىرلىك ءجۇزۋ قۇرالى (2 كاتەر، 4 قايىق) جانە باسقا دا قۇتقارۋ جابدىقتارى پايدالانۋعا دايىن. كۇن سايىن رەيدتىك ءىس-شارالارعا 80-نەن استام ادام جۇمىلدىرىلادى. ال دەمالىس جانە مەرەكە كۇندەرى قىزمەتكەرلەر سانى ارتادى»، دەدى ەسەن بايىروۆ.

رەيدتىك ءىس-شارالار كەزىندە ەلوردا تۇرعىندارىمەن جانە قوناقتارىنا ۇگىت-ناسيحات جۇمىستارى جۇرگىزىلەدى.

سونىمەن قاتار قاۋىپسىزدىكتى قامتاماسىز ەتۋ جانە ازاماتتاردى اقپاراتتاندىرۋ ماقساتىندا تجد اكىمدىكپەن بىرلەسىپ، 140 تىيىم سالۋ بەلگىسى، 20 اقپاراتتىق ستەند جانە 20 ءجۇزۋ بەلگىسى شومىلۋعا تىيىم سالىنعان ورىنداردا ورناتىلدى.

«نۇر-سۇلتان قالاسىنىڭ سۋ ايدىندارىندا 2020 جىلدىڭ شومىلۋ كەزەڭىندە 5 ادام قازا تاپتى. بيىل شومىلۋ كەزەڭى باستالعانعا دەيىن ەلوردانىڭ سۋ ايدىندارىندا قايعىلى وقيعالار بولىپ، 3 ادام (ونىڭ ىشىندە 1 بالا) قازا تاپتى. سۋداعى جازاتايىم وقيعالاردىڭ نەگىزگى سەبەپتەرى – تىيىم سالىنعان جانە جابدىقتالماعان ورىنداردا ماس كۇيىندە شومىلۋ، سونداي-اق بالالاردى ەرەسەكتەردىڭ قاراۋىنسىز قالدىرۋ»، دەپ قوستى سپيكەر.

ەسكە سالا كەتەيىك، ەلوردادا 23 شومىلۋ ورنى انىقتالدى، ونىڭ 3-ەۋى عانا نۇر-سۇلتان قالاسى اكىمىنىڭ قاۋلىسىنا سايكەس رۇقسات ەتىلگەن: ورتالىق جاعاجاي، «تري پەسكاريا» جانە «استانالىق اۋلا» دەمالىس ايماقتارى.

سوڭعى جاڭالىقتار

ۇقساس جاڭالىقتار