ايماقتار • 17 ماۋسىم، 2021

دەنساۋلىعىڭ قالاي، دارىگەر؟

165 رەت كورسەتىلدى

جەكسەنبىدە كوۆيدستاتسيونارعا شۇعىل جەتكەن سالتانات ساتىبالدىقىزى وتە اۋىر حالدەگى جۇكتى ايەلدى امان الىپ قالۋدىڭ بارلىق جولىن قاراستىردى. كەرەكتى ماماندار شاقىرىلدى، كونسيليۋم وتكىزىلدى. وتا جاسالىپ، جەتى ايلىق نارەستە جارىق دۇنيەگە كەلدى، انا دا امان.

ءيا، بۇل – ماۋسىم ايىندا ورشىگەن ىندەتپەن ارپالىستىڭ ءبىر عانا ءساتى. سول كۇننەن كەيىن دەمالىسسىز جۇمىس ىستەگەن، اۋىر حالدەگى ناۋقاستاردىڭ ءومىرى ءۇشىن كۇرەسكەن كەنتاۋ قالاسى ورتالىق اۋرۋحاناسىنىڭ بوسانۋ ءبولىمىنىڭ مەڭگەرۋشىسى، اكۋشەر-گينەكولوگ سالتانات قۇدايبەرگەنوۆا وتباسىمەن تەك تەلەفون ارقىلى بايلانىسىپ وتىردى. وتاعاسى اۋىرعاندا دا تەلەفون ارقىلى كەڭەس بەرىپ، ءدارى-دارمەك بەلگىلەگەن. الايدا...

«جولداسىمنان ايىرىلدىم... وتە اۋىر كۇندەردى باستان وتكەردىم. مۇنداي قايعىنى ەشكىمگە تىلەمەيمىن، ىندەتتەن اللا ساقتاسىن! قانشاما دارىگەر پنەۆمونيامەن اۋىردى. مەن ءوزىم ءبىر جارىم اي اۋىرىپ جاتتىم. ارىپتەستەرىمە، اقحالاتتى ابزال جاندارعا باسىمدى يەمىن. ەرەن ەڭبەگىن، باتىرلىعىن كورسەتتى. باس دارىگەرىمىز گۇلبانۋ جۇماعاليقىزى بىزگە رۋح بەرىپ، جىگەرلەندىرىپ، مورالدىق كومەك كورسەتىپ، قولداپ وتىردى»، دەيدى كوزىنە جاس الا سول كۇندەردى ەسىنە تۇسىرگەن جوعارى ساناتتى دارىگەر، مەديتسينا عىلىمدارىنىڭ كانديداتى سالتانات قۇدايبەرگەنوۆا.

جانىڭدى جاناپ وتكەن ءار ادام تاعدىر كىتابىڭدا ءىزىن قالدىرادى. ءيا، بىلتىرعى ماۋسىمدا ورشىگەن ىندەتپەن كۇرەس دارىگەرلەردىڭ دە جۇرەگىنە سىزات ءتۇسىردى. اۋىر حالدەگى ناۋقاستار، اۋا جەتىسپەي الاسۇرىپ جاتقاندار، قاتارى ەسەلەپ ارتقان قايتىس بولعاندار دارىگەرلەردىڭ، جالپى اقحالاتتى ابزال جانداردىڭ جۇرەگىن اۋىرتتى. ءاربىر ناۋقاستى امان قالىپ قالۋ ءۇشىن قولداعى بار امالدى جاساپ، جانتالاسقان دارىگەرلەر جۇرەگىنە تۇسكەن سىزات، جۇيكەنى جۇقارتقان سالماق دەنساۋلىعىنا دا كەرى اسەر ەتكەنى انىق.

«سول كۇندەرى ءۇيدى ۇمىتىپ، جۇمىس ىستەدىك. 21 ماۋسىمدا 50 ادامعا دەيىن قابىلداۋ بولىمىنە كەلىپ قارالدى. باس دارىگەر بارلىعىمىزدى شاقىرىپ، پروۆيزورلىق بولىمدە ناۋقاستارعا كومەك كورسەتۋگە ۇندەدى. ارينە ءاربىر دارىگەر، مەدبيكە ەرىكتى تۇردە كەلىسىم بەرىپ جۇمىسقا كىرىستىك. قورقىنىشتىڭ بولعانىن دا جاسىرمايمىز. اسىرەسە ءوز ارىپتەستەرىمىزدىڭ ىندەتكە شالدىققانى، ولاردى امان الىپ قالۋ مۇمكىن بولماعانى كوپشىلىگىمىزگە وي سالدى. بىراق ءبىز انتقا ادالدىق تانىتىپ، بار ويىمىز ناۋقاستاردى امان الىپ قالۋ بولىپ، سول ماقساتتا ايانباي ەڭبەك ەتتىك. قولىمىزدان كەلگەن بار مۇمكىندىكتى جاسادىق. ءوزىمىز تانيتىن، كاسىبيلىگىن جوعارى باعالاعان جانساقتاۋ ءبولىمىنىڭ مەڭگەرۋشىسى باقىتبەك اعاي، قۇركەلەس ەمحاناسىنىڭ گينەكولوگ-دارىگەرى ءجۇمادىللا يبادۋللاەۆ اۋىرىپ، ەكەۋى ءبىر كۇندە كوز جۇمدى»، دەيدى سارىاعاش اۋداندىق ورتالىق اۋرۋحاناسى، ىشكى اۋرۋلار ءبولىمىنىڭ مەڭگەرۋشىسى قۇرالاي ءابىلماجىنوۆا. سول كۇندەرى قانشاما دارىگەر، مەيىربيكە وزدەرىن جايسىز سەزىنگەنىمەن، ءوز دەنساۋلىعىنا ءمان بەرمەي جۇمىسىن جالعاستىردى.

وبلىستىق №3 پەريناتالدىق ورتالىعىندا پاندەميا كەزىندە 8 مەديتسينا قىزمەتكەرى دەرتكە شالدىققان. قازىرگى كۇنى ولار ءوز جۇمىستارىن جالعاستىرۋدا، دەنساۋلىقتارى جاقسى. ورتالىق باسشىلىعىنىڭ حابارلاۋىنشا، ولار مەملەكەت تاراپىنان ارقايسىسى 2 ملن تەڭگە جاردەماقى العان. وكىنىشكە قاراي، ومىردەن وزعاندار دا بار.

«جاس بولسا دا ءبىلىمدى، بىلىكتى، جاۋاپكەرشىلىگى مول، ۇجىمدا بەدەلدى بولعان جاس مامان، قوعامدىق دەنساۋلىق ساقتاۋ دارىگەرى-ستاتيست جانار باۋىرجانقىزى قايتىس بولدى. ق.ا.ياساۋي اتىنداعى حقتۋ-دىڭ مەديتسينا فاكۋلتەتىن بىتىرگەن ماماننىڭ ارتىندا ەكى بالاسى قالدى. وبلىستىق پەريناتالدىق ورتالىق تۇركىستان، كەنتاۋ قالالارى، سوزاق، وتىرار اۋداندارىنا قىزمەت كورسەتەدى. ورتالىقتا 73 دارىگەر، 337 ورتا بۋىندى، 150 كىشى مەديتسينا جانە باسقا دا قىزمەتكەرلەر ەڭبەك ەتۋدە. دارىگەرلەردىڭ ورتا جالاقىسى 420 مىڭ تەڭگە، نەگىزىنەن باسپانامەن قامتىلعان. «تۇرعىن ءۇي» باعدارلاماسى ارقىلى 14 دارىگەر كەزەكتە تۇر»، دەيدى قىزمەتكەرلەرىنىڭ بۇگىنگى الەۋمەتتىك جاعدايىنان حاباردار ەتكەن ورتالىقتىڭ باس دارىگەرى نۇرجان ماحمۋتوۆ.

قاتەردىڭ ورتاسىندا ءجۇرىپ اجال قۇشقاندار، وكىنىشكە قاراي، ءۇشىنشى مەگاپوليس – شىمكەنتتە دە از ەمەس. ىندەتپەن كۇرەستە كاسىبي مىندەتىن اتقارۋ كەزىندە 21 مەديتسينا قىزمەتكەرى كوروناۆيرۋستان باقيلىق بولدى.

«مارقۇم بولعان مەديتسينا ماماندارىنىڭ تۋىستارىنا 10 ملن تەڭگەدەن وتەماقى تولەندى. قيىن كەزەڭدە حالىقتىڭ اماندىعىن ويلاپ، ايانباي ەڭبەك ەتىپ، قايتىس بولعان دارىگەرلەردىڭ ارتىندا قالعان ۇرپاقتارىنا «بارىس»، «پاراسات»، «قۇرمەت» وردەندەرى تابىستالدى. مەملەكەتتىك ناگرادانى قالا اكىمى مۇرات ايتەنوۆ مارقۇمداردىڭ وتباسىنا ارنايى بارىپ تابىس ەتتى. بۇعان قوسا ءار وتباسىنا ماتەريالدىق كومەك رەتىندە «قايىرىمدى قالا» قورىنان بولىنگەن 1 ملن تەڭگە كولەمىندە قارجىلاي كومەك بەرىلدى»، دەيدى شىمكەنت قالالىق دەنساۋلىق ساقتاۋ باسقارماسىنىڭ باسشىسى باقىتجان پوزيلوۆ.

سوڭعى جىلدارى الەۋمەتتىك جاعدايلارى جاقسارىپ، ەڭبەكاقىلارى ارتقانى دا ايتىلدى. مەديتسينا قىزمەتكەرلەرىن باسپانامەن قامتۋ ماسەلەسى دە وڭ شەشىمىن تاۋىپ جاتىر ەكەن. مىسالى، شاردارا قالاسىندا سىرتتان كوشىپ كەلگەن دارىگەرلەر قىزمەتتىك ءۇي-جايمەن قامتىلادى. جاس مامانداردى جاڭا سالىنىپ جاتقان ۇيلەرگە ورنالاستىرۋ جولى قاراستىرىلادى. ياعني دارىگەرلەردىڭ ءوز قىزمەتىن الاڭسىز اتقارۋىنا بارلىق جاعداي جاسالۋدا. ال اقحالاتتىلاردىڭ اماندىعىن تىلەيتىن تۇرعىنداردىڭ جالعىز تالابى – ادال دا ءمىنسىز قىزمەت. دەنساۋلىعىڭ مىقتى بولسىن، دارىگەر!

 

تۇركىستان وبلىسى

سوڭعى جاڭالىقتار

اقپاراتتىق حابارلاما

ەگەمەن قازاقستان • كەشە

دوللار تاعى دا ارزاندادى

ەكونوميكا • كەشە

ۇقساس جاڭالىقتار