قازاقستان • 15 ماۋسىم، 2021

مەرزىمدى قىزمەتتەگى اسكەري قىزمەتشىلەردى زاپاسقا شىعارۋ باستالدى

21 رەت كورسەتىلدى

قورعانىس مينيسترلىگىندە وتكەن اپپارات كەڭەسىندە اپتا قورىتىندىلانىپ، الداعى كەزەڭدەرگە مىندەتتەر جۇكتەلدى، دەپ حابارلايدى Egemen.kz.

باس قولباسشىلار مەن قولباسشىلار ماماندىق بويىنشا دايارلىقتىڭ ءوتۋ بارىسىن باياندادى. قۇرلىق اسكەرلەرىندە بارلىق باعىتتارداعى ماماندارمەن ساباقتار، ونىڭ ىشىندە دەسانتشى جاۋىنگەرلەردىڭ پاراشيۋتپەن سەكىرۋلەر وتۋدە. تاۋداعى ءالپى بولىمشەلەرى اسكەري قىزمەتشىلەرىنىڭ ءىس جۇزىندەگى جيىندارى مەن جاتتىعۋلارى باستالدى.

اۋە قورعانىسى كۇشتەرىندە جوسپارلى ۇشۋ وقۋ-جاتتىعۋلارى، ۇشۋ قۇرامىنىڭ پاراشيۋتتىك دايارلىعى جانە اشقق اسكەرلەرىنىڭ اسكەري قىزمەتشىلەرىنە تەحنيكالاردى ۇيرەتۋ جۇرگىزىلەدى.

اسكەري-تەڭىز كۇشتەرىندە تەڭىزشىلەر كەمەنىڭ ماتەريالدىق بولىگىن، بەرىكتىككە كۇرەس ءىس-شارالارىنداعى جەكە ءىس-قيمىل ءتارتىبىن پىسىقتايدى. ماماندىق بويىنشا دايىندىق كەزەڭى بيىل 2 شىلدەدە باقىلاۋ ساباقتارىنىڭ وتۋىمەن اياقتالادى.

اسكەري ءبىلىم بەرۋ سۇراقتارى قارالدى. اسكەري وقۋ ورىندارىندا وقۋ جىلى اياقتالۋدا. وتكەن اپتادا ۇلتتىق قورعانىس ۋنيۆەرسيتەتىن 145 ماگيسترانت ءبىتىرىپ، «جاس ۇلان» رەسپۋبليكالىق مەكتەپتەرىنىڭ 889 تۇلەگىنە اتتەستاتتار تابىستالدى.

جۋىردا راديوەلەكترونيكا جانە بايلانىس اسكەري-ينجەنەرلىك ينستيتۋتىندا، قۇرلىق اسكەرلەرىنىڭ اسكەري ينستيتۋتىندا وفيتسەرلەر، شوقان ءۋاليحانوۆ اتىنداعى قورعانىس مينيسترلىگىنىڭ اسكەري كوللەدجىندە سەرجانتتار وقۋىن ءبىتىرىپ، ولاردى ءبولۋ جوسپارلانۋدا.

كەڭەس بارىسىندا اسكەري وقۋ ورىندارى تۇلەكتەرىنىڭ قىزمەت وتكەرۋىنە تۇراقتى مونيتورينگ جۇرگىزۋ تاپسىرىلدى. ونىڭ نەگىزىندە قاجەت بولعان جاعدايدا كادرلاردى نەعۇرلىم ءتيىمدى دايارلاۋ ءۇشىن وقۋ ۇردىسىنە تۇزەتۋلەر ەنگىزۋدى جۇكتەدى.

«تسيفرلىق وفيتسەر» وقۋ جوباسىن ىسكە اسىرۋ تۋرالى جەكە باياندالدى. بۇگىنگى تاڭدا ءومىردىڭ بارلىق سالاسى تسيفرلاندىرىلىپ جاتقاندا، ارميادا وفيتسەرلەردى دايارلاۋدا، ولاردىڭ اقپاراتتاندىرۋدىڭ بارلىق اسپەكتىلەرىن، اۆتوماتتاندىرىلعان باسقارۋ جانە جاساقتاما جۇيەلەرىن مەڭگەرۋىن ەسكەرە وتىرىپ جۇرگىزۋ كەرەك. اسكەري وقۋ ورىندارىندا بۇعان قاجەتتى وقۋ-ادىستەمەلىك بازا بار. بۇل رەتت، جاس وفيتسەرلەردىڭ العان بىلىمدەرىن ءىس جۇزىندەگى قىزمەت بارىسىندا كەڭىنەن قولدانۋىنا نۇسقاۋ بەرىلدى.

ءورت قاۋىپتى ماۋسىمنىڭ باستالۋىنا قاراي اسكەرلەردە ورتكە قارسى قورعانىس شارالارىن كۇشەيتۋ: ونىڭ ىشىندە وبەكتىلەردىڭ جابدىقتارىن تەكسەرۋ، تەحنيكالىق ءورت ءسوندىرۋ قۇرالدارى مەن كوممۋنيكاتسيالار جارامدىلىعىن قامتاماسىز ەتۋ، ورتكە قارسى شتاتتىق بولىمشەلەردى دايىندىققا كەلتىرۋ جانە شتاتتان تىس ءورت ءسوندىرۋ كوماندالارىنىڭ قۇرامىن كۇن سايىن ناقتىلاۋ. وق-دارىلەردى، ججم، قارۋ-جاراق پەن اسكەري تەحنيكانى، ماتەريالدىق قۇرالداردى ساقتاۋ نىساندارىنا ءجىتى نازار اۋدارۋ تاپسىرىلدى.

سەمەي، جاڭعىزتوبە، وسكەمەن گارنيزوندارىنا جۇمىس ساپارىنىڭ ناتيجەسىندە مينيستر اسكەري قىزمەتشىلەر مەن ولاردىڭ وتباسى مۇشەلەرىنىڭ، اسىرەسە شالعاي اسكەري بولىمدەر مەن گارنيزوندارداعىلاردىڭ ءومىر ءسۇرۋى، تۇرمىس جاعدايلارىن تالداۋدى تاپسىردى. ءومىر سۇرۋگە قولايلى جاعداي جاساۋ ءۇشىن دەمالىس ورىندارىن، كوممۋنيكاتسيا قىزمەتتەرىن جانە باسقا دا تىرشىلىككە قاجەتتى ماسەلەلەردى قامتاماسىز ەتۋدەگى كەشەندى شارالاردى قابىلداۋدى جۇكتەدى.

باس اسكەري-مەديتسينالىق باسقارماسىنىڭ باستىعى اسكەرلەردەگى ەپيدەميولوگيالىق احۋالدى باياندادى. جەكە قۇرامعا ەكپە ەگۋ باستالۋىمەن جاعداي تۇراقتاندى. كوروناۆيرۋس ينفەكتسياسىن جۇقتىرۋدىڭ ىلۋدە ءبىر بايقالۋى ەلىمىزدىڭ ءتۇرلى ايماقتارىنان كەلگەن ساربازدارمەن بايلانىستى.

جوسپارعا سايكەس 15 ماۋسىمنان باستاپ مەرزىمدى قىزمەتتەگى اسكەري قىزمەتشىلەردى زاپاسقا شىعارۋ باستالادى. ءداستۇر بويىنشا، كوكتەمدە ساربازدار ءساۋىر-مامىر ايلارىندا بورىشتارىن وتەۋدەن بوساتىلدى. 2020 جىلى پاندەميا كەزىندە اسكەرگە شاقىرۋدىڭ كەيىنگە قالدىرىلۋىنا وراي جاۋىنگەرلەر زاپاسقا كەشتەۋ شىعارىلۋدا. وسىلايشا، بارلىق «مەرزىمدى قىزمەتتەگىلەر» قولدانىستاعى زاڭنامادا بەلگىلەنگەندەي ءدال 12 اي قىزمەت ەتەدى جانە قىزمەت ەتۋ مەرزىمى اياقتالعاننان كەيىن ءوز وڭىرلەرىنە جىبەرىلەدى. اسكەري وقىتىلعان رەزەرۆ رەتىندە ولار جەرگىلىكتى اسكەري باسقارۋ ورگاندارىنا ەسەپكە الىنادى.

سوڭعى جاڭالىقتار

شىعىس «قىزىل» ايماقتا

ايماقتار • كەشە

تسيفرلى تەڭگە جوباسى تالقىلاندى

ەكونوميكا • 23 شىلدە، 2021

اقپاراتتىق حابارلاما

ەگەمەن قازاقستان • 23 شىلدە، 2021

ۇقساس جاڭالىقتار