ونىڭ بارىسىندا 10-عا جۋىق تەگىن كونتسەرت بەرىلەدى. بۇل قويىلىمداردى ەلوردا تۇرعىندارى مەن قوناقتارى مامبەتوۆ كوشەسىندەگى «اففاري» بيزنەس ورتالىعىنىڭ الدى مەن ورتالىق قالالىق ساياباقتاعى امفيتەاتر ساحناسىندا وتكىزەدى. سول سياقتى مۇندا شەتەلدىك ارتىستەر دە ونەر كورسەتەدى دەپ جوسپارلانىپ وتىر7
«شىعارماشىلىق ۇجىمىمىز العاش رەت اشىق الاڭدا ونەر كورسەتكەلى تۇرعان جوق. جىل سايىن دج. ۆەرديدىڭ «ايدا» وپەراسى سىندى عالامات سپەكتاكلدەردى اشىق اسپان استىندا ورىنداپ ءجۇرمىز. وسىنداي جوبالار اعارتۋشىلىق سيپاتتا جاسالىپ, قازاقستاندىقتاردى اسقاق ونەرگە تارتۋعا باعدارلانعان. جانعا جايلى ءارى مەرەكەلىك كوڭىل-كۇي سىيلايمىز دەگەن سەنىمدەمىز. بىرقاتار توسىنسىي ازىرلەدىك. مۇندا يتاليا, شۆەيتساريا, جاپونيا, رەسەي مەن چەحيادان كەلگەن شەتەلدىك ارتىستەر ونەر كورسەتەدى», دەدى «استانا وپەرا» تەاترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى عالىم احمەدياروۆ.
كونتسەرتتەردىڭ باعدارلاماسى ەرەسەكتەرگە دە, بالالار اۋديتورياسىنا دا قىزىقتى بولاتىنداي ەتىپ ويلاستىرىلعان. جاس كورەرمەندەردى 13 جانە 19 ماۋسىم كۇندەرى ساعات 12:00-دە اففاري ساحناسىندا وتەتىن «بالالار سىيعا تارتقان ونەر» اتتى كونتسەرت كۇتۋدە.
ال 13 ماۋسىم ساعات 20:00-دە اففاري ساحناسىندا وتەتىن «ۆوكالدىق مۋزىكا جاۋھارلارى» كونتسەرتى جەكسەنبىلىك كەشتىڭ رومانتيكالىق اسەرىن ارتتىرا تۇسپەك.
سونىمەن قاتار ابزال ءمۇحيتديننىڭ كورەرمەننىڭ كوڭىلىنەن شىققان «جىلدىڭ سەگىز مەزگىلى» (ا.ۆيۆالدي, ا.پياتستسوللا) اۆتورلىق كونتسەرتى 12-13 ماۋسىم ساعات 20:00-دە ورتالىق قالالىق ساياباقتاعى امفيتەاتردا وتەدى.
ال اپتا سوڭىندا 26 جانە 27 ماۋسىم كۇندەرى ساعات 20:00-دە ورتالىق قالالىق ساياباقتاعى امفيتەاتردا قالا تۇرعىندارىنىڭ نازارىنا وپەرا-گالا ۇسىنىلماق.
«استانا وپەرانىڭ» بىرەگەي جوباسى – «PICCOLO» تەاترى 5 شىلدە كۇنى ساعات 20:00-دە قالالىق ساياباقتا ءوز رەپەرتۋارىنىڭ ءىنجۋ-مارجانى – گاەتانو دونيتسەتتيدىڭ «دون پاسكۋالە» ەكى ءبولىمدى دراما-بۋففاسىن ۇسىنادى.
ەلوردا كۇنىندە, ياعني 6 شىلدەدە ورتالىق قالالىق ساياباقتاعى امفيتەاتر ساحناسىندا مەرەكەلىك گالا-كونتسەرت وتەدى, وندا «استانا وپەرا» تەاترىنىڭ جەتەكشى وپەرا سوليستەرى, حور ارتىستەرى مەن سيمفونيالىق وركەسترىنىڭ ورىنداۋىندا قازاقستاندىق اۆتورلار مەن باتىس ەۋروپالىق كلاسسيك كومپوزيتورلاردىڭ تانىمال وپەرالىق اريالارى مەن دۋەتتەرى, اسپاپتىق ءارى حورعا ارنالعان شىعارمالارى شىرقالادى.
