وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, ماۋسىمنىڭ 7-16 كۇندەرى ارالىعىندا اقمولا وبلىسى پوليتسيا دەپارتامەنتىنىڭ كوشى-قون قىزمەتىنىڭ بولىمشەلەرى وبلىس اۋماعىندا شەتەلدىك ازاماتتار جاساعان قۇقىق بۇزۋشىلىقتاردىڭ الدىن الۋ, ولاردىڭ قىزمەتىن قۇجاتتاندىرۋ جانە قر-دا بولۋ ەرەجەلەرىن ورەسكەل بۇزۋشىلاردى ەلدەن شىعارىپ جىبەرۋ ءۇشىن «كەلىمسەك» جەدەل-الدىن الۋ شاراسىن وتكىزۋدە.
اكتسيا بارىسىندا بازارلاردى, قۇرىلىس وبەكتىلەرىن, قوناقۇيلەردى, ساياجاي كەنتتەرىن, جاتاقحانالاردى جانە ونەركاسىپتىك كاسىپورىنداردى تەكسەرۋ بويىنشا بەلگىلى ءبىر ءىس-شارالار كەشەنى جۇزەگە اسىرىلدى.
«جەدەل الدىن الۋ ءىس-شاراسىنىڭ ءۇش كۇنىندە ءتورت شەتەلدىك كوشى-قون زاڭناماسىن بۇزعانى ءۇشىن اكىمشىلىك جاۋاپكەرشىلىككە تارتىلدى, ولاردىڭ ىشىنەن ءبىر شەتەلدىك سوت شەشىمىمەن قازاقستان رەسپۋبليكاسى اۋماعىنان شىعارىلدى. بۇدان باسقا, وزبەكستان رەسپۋبليكاسىنىڭ ازاماتىنىڭ قر قك 392 بابى بويىنشا قر مەملەكەتتىك شەكاراسىن قاساقانا زاڭسىز كەسىپ وتكەنى انىقتالدى», دەپ اتاپ ءوتتى ۆەدومستۆودان.
قر-دا شەتەلدىك جۇمىس كۇشىن پايدالانۋ ەرەجەلەرىن بۇزعانى ءۇشىن ءوڭىردىڭ 23 تۇرعىنى اكىمشىلىك جاۋاپقا تارتىلدى. شاقىرىلعان شەتەلدىكتەر قر حالىقتىڭ كوشى-قونى سالاسىنداعى زاڭناماسىن بۇزعانى ءۇشىن قر اقبتك-ءنىڭ 518 بابى بويىنشا قابىلداۋشى تاراپتارعا قاتىستى 75 اكىمشىلىك حاتتاما تولتىرىلدى. بۇدان باسقا, ءتيىستى قۇجاتتارسىز وبلىس ورتالىعىنىڭ اۋماعىندا بولعان 14 شەتەلدىك كوكشەتاۋ قالاسى پوليتسيا باسقارماسىنىڭ قابىلداۋ-ورنالاستىرۋ ورنىنا قاماۋعا الىندى.
