سوندا سەنىمگە سەرت بەرە تۇرىپ, پرەزيدەنت قاسىم-جومارت كەمەل ۇلى قايمانا حالقىمەن بىرگە ۇكىلى ۇمىتپەن پاراسات بيىگىنەن ۇلتتىڭ جاڭا بولمىسىن قالىپتاستىرۋعا نەگىز بولاتىن سونى باعدارلاماسىن جاريا ەتتى.
ول «ساباقتاستىق. ورلەۋ. ادىلدىك» ەدى. ءدال وسى اسىل مۇرات, ىزگى قاعيدات بويىنشا وتكەن ەكى جىلداعى ەلىمىزدىڭ قول جەتكىزگەن قوماقتى تابىستارىن باعالاپ, سارالاۋعا بولادى. شىن مانىندە, ەلباسىنىڭ ەل ءۇشىن نەبىر توسىن سىننان سۇرىنبەي وتكەن تەكتى تۇلعانى تاڭداۋىن جانە قازاقستان حالقىنىڭ جوعارى سەنىمى تولىعىمەن اقتالعانىن ۋاقىت دالەلدەپ وتىر.
ارينە, وتكەن ەكى جىل ەلىمىز ءۇشىن وڭاي بولعان جوق. ارىس, قورداي جانە ماقتاارالداعى قايعىلى وقيعالار, بۇكىل الەمدى شارپىعان سOVID-19 پاندەمياسى جانە سونىڭ سالدارىنان تۋىنداعان ەكونوميكالىق داعدارىس. وسىنداي كۇرمەۋى قيىن كۇردەلى كەزەڭگە قاراماستان, پرەزيدەنت بايسالدى قالپىمەن باياندى باستامالاردى جۇزەگە اسىردى. ۇلتتىق كەڭەس قۇرىلىپ, ەل ءۇشىن وزەكتى ماسەلەلەر قولعا الىندى, پرەزيدەنتتىك كادرلىق رەزەرۆ جاساقتالدى, مۇعالىمدەر مەن دارىگەرلەردىڭ جاعدايىن جاقسارتۋ بويىنشا شارالار قابىلداندى. پرەزيدەنتتىڭ كادرلىق شەشىمدەرى مەريتوكراتيا قاعيداتىنىڭ كورنەكى ۇلگىسى بولدى. دەموكراتيالىق پروتسەستەردىڭ دامۋىن جەدەلدەتۋگە جانە قازاقستاننىڭ ساياسي جۇيەسىن رەفورمالاۋعا باعىتتالعان بىرقاتار زاڭعا وزگەرىستەر مەن تولىقتىرۋلار ەنگىزىلدى. بۇل رەتتە, سايلاۋ تۋرالى جانە جەر جونىندەگى داۋلى ماسەلەگە نۇكتە قويعان تاعدىرشەشتى زاڭداردى ايرىقشا اتاۋعا بولادى. وسىلاي «حالىق ۇنىنە قۇلاق اساتىن مەملەكەت» تۇجىرىمداماسى ناقتى جۇزەگە اسا باستادى.
پاندەميانىڭ ناعىز قىسىپ تۇرعان شاعىندا داعدارىس جاعدايىنا قاراماستان, جاڭا اۋرۋحانالاردىڭ قۇرىلىسىن قامتاماسىز ەتتى. حالىقتىڭ از قامتىلعان توپتارىن قولداۋ شارالارى شۇعىل جۇزەگە اسىرىلدى, وسىلايشا مەملەكەت ءوز ازاماتتارىن قيىندىقتا قالدىرمايتىنىن كورسەتتى. سونداي-اق ازاماتتارعا وزدەرىنىڭ زەينەتاقى جيناقتارىن جىلجىمايتىن م ۇلىك ساتىپ الۋ نەمەسە ەمدەلۋ اقىسىن تولەۋ ءۇشىن پايدالانۋعا مۇمكىندىك بەرۋ تۋرالى شەشىم مەملەكەتتىڭ ادامداردىڭ ءال-اۋقاتىنا قامقورلىقپەن قارايتىنىنىڭ, حالىق ءۇشىن داعدارىستىڭ سالدارىن بارىنشا جەڭىلدەتۋگە ۇمتىلىسىنىڭ ايقىن كورىنىسى بولدى. الەمدەگى جاعداي بارشاعا بەلگىلى جانە ءبىزدىڭ سالىستىرۋعا تۇرارلىق جاقتارىمىز بار.
گۋمانيتارلىق سالادا دا ماڭىزدى باستامالار ءساتتى جۇزەگە اسىرىلدى. ۇلىق ۇلىستىڭ 750 جىلدىعىن, ابايدىڭ 175 جىلدىق مەرەيتويىن, سونداي-اق ءال-ءفارابيدىڭ 1150 جىلدىق مەرەيتويىن جوعارى دەڭگەيدە اتاپ وتتىك. بۇل تويلار ۇلتتىڭ جاڭا بولمىسىن قالىپتاستىرۋ ماقساتىندا, ىسىراپتان ادا, داڭعازادان اۋلاق, رۋحاني كەمەلدەنۋ باعىتىندا, قۇندىلىقتاردى جاڭعىرتۋ رايىندا ۇيىمداستىرىلدى. ەل بيلىگى جوعارىدا اتالعان باستامالاردى اۋىر ەكونوميكالىق جاعدايلارعا قاراماستان جۇزەگە اسىردى. جالپى, پرەزيدەنتتىڭ ادەبيەتكە, ونەرگە, شىعارماشىلىقتىڭ دامۋىنا كوڭىل بولەتىنى نازارعا الدىمەن ىلىنەدى, ونسىز ۇلتتىڭ رۋحاني دامۋى مۇمكىن ەمەس ەكەنى انىق.
ءتۇرلى بولجامدارعا قاراماستان, سىرتقى ساياساتتا دا ىرگەتاسىن ەلباسى قالاعان كوپۆەكتورلى باعىتتىڭ ساباقتاستىعى ساقتالدى. قازاقستان ءوزىنىڭ ستراتەگيالىق سەرىكتەستەرىمەن, اۋەلى ءوزىنىڭ ۇلتتىق مۇددەلەرىن ەسكەرە وتىرىپ, سىندارلى ىنتىماقتاستىقتى دامىتۋدى جالعاستىرۋدا. قازاقستاننىڭ حالىقارالىق بەدەلى ۇدايى ءوسىپ كەلەدى. بۇل ورايدا 2021 جىلدىڭ 31 ناۋرىزىندا وتكەن تۇركى كەڭەسى مەملەكەتتەرى باسشىلارىنىڭ ءسامميتىن اتاپ وتكەن ءجون. ەلباسىنىڭ باستاماسىمەن تاريحي تۇركىستان قالاسىن تۇركى الەمىنىڭ رۋحاني استاناسى دەپ جاريالاۋ ەلىمىزدىڭ حالىقارالىق بەدەلىن ودان ءارى نىعايتۋعا باعىتتالعان ماڭىزدى قادام بولدى. ق.توقاەۆتىڭ ەاەو ەلدەرىنىڭ كوشباسشىلارىنا ۇندەۋى ەۋرازيالىق ىنتىماقتاستىقتىڭ تاياۋداعى بەس جىلعا ارنالعان نەگىزگى باعىتتارىن ايقىنداپ بەردى.
ەلدىڭ بىرلىگىن ساقتاپ, ىزگىلىك پەن رۋحاني ۇندەستىككە سەرپىن بەرۋ قاسىم-جومارت توقاەۆ پرەزيدەنتتىگىنىڭ ەكى جىلىنداعى ەڭ باستى جەتىستىك دەپ سانايمىز. اسپاي, ساسپاي, «اقىرىن ءجۇرىپ انىق باسقان», سەنىمگە سەرت بەرگەن, بايىپتى بايلاممەن, بەرىك ۇستانىممەن بولاشاققا باتىل بەت تۇزەگەن پرەزيدەنتتىڭ ەلباسى جولىن جاراسىممەن جالعاستىرىپ, ساتىمەن ساباقتاستىرىپ, «ساياسي جاڭعىرۋدىڭ قازاقستاندىق مودەلىن» سىمباتتاي تۇسكەنى بايقالادى. تاياۋدا ەلباسى ن.ءا.نازارباەۆتىڭ قازاقستان حالقى اسسامبلەياسى توراعاسىنىڭ وكىلەتتىگىن ق.توقاەۆقا تاپسىرۋى دا وسى ۇيلەسىم مەن ۇندەستىكتىڭ ۇزدىك ۇلگىسى ىسپەتتى. سوندىقتان ساباقتاستىق سالتاناتىمەن ۇلتتى ۇيىستىرا تۇسكەن ۇلاعاتتى جول ەلدىڭ جارقىن بولاشاققا دەگەن سەنىمىن دە ەسەلەي تۇسەدى.
