جارىستى قىزدار باستادى. وكىنىشكە قاراي, زەرە بەكتاسقىزى ءوزىنىڭ تۇساۋكەسەر كەزدەسۋىندە نيدەرلاندتىق حيلدە ياگەرگە ەسە جىبەردى. نەگىزى بۇل باسەكەدە بالۋاندار بىردە-ءبىر ءادىس جاساي العان جوق. بىراق تورەشى زەرەگە قاتارىنان ءۇش ەسكەرتۋ جاساپ, سونىڭ سالدارىنان ول جارىس جولىنان شىعىپ قالدى.
ءمولدىر نارىنوۆا العاشقى اينالىمدا بوس بولدى. ەكىنشى كەزەڭدە تيمۋ باربارامەن بەلدەستى. پورتۋگاليا سپورتشىسىنىڭ الەم چەمپيوناتى مەن ەۋروپا ويىندارىنىڭ كۇمىس جانە قۇرلىق بىرىنشىلىگىنىڭ قولا جۇلدەگەرى دەگەن اتاقتارى بار. بۇل تارتىس پيرەنەي تۇبەگى تۇلەگىنىڭ پايداسىنا شەشىلدى.
ەرلەر سايىسىن يسلام بوزباەۆ وتە قارقىندى باستادى. العاشقى اينالىمدا ول مىسىرلىق حاتەم ابد ءال-احەردىڭ اياعىن كوكتەن كەلتىردى. ودان كەيىن يۋري پەتردىڭ تاس-تالقانىن شىعاردى. ءۇشىنشى كەزەڭدە الەم چەمپيوناتىنىڭ كۇمىس جۇلدەگەرى, پانامەريكا ويىندارىنىڭ جەڭىمپازى, پانامەريكانىڭ ءتورت دۇركىن چەمپيونى يۆان فەليپە سيلۆامەن كۇرەستى. باسەكەنىڭ العاشقى مينۋتىندا بوزباەۆ ۆازاري ءادىسىن ءساتتى جاسادى. سول باسىمدىعىن قازاق دزيۋدوشىسى سوڭعى سەكۋندتتارعا دەيىن ۇستاپ تۇردى. ەندى ول وزبەكستاندىق داۆلات بابونوۆپەن كۇش سىناسادى.
ەرسۇلتان مۇزافاروۆ ماجارستاندىق پەتەر سافاريگە سان سوقتىرسا, كەلەسى كەزدەسۋدە يتاليالىق نيكولاس مانگالدان ۇتىلىپ قالدى.
