وتكەن دەمالىس كۇندەرى نۇر-سۇلتاننىڭ بارلىق اۋدانىندا كارانتين تالاپتارى بۇزىلعانى انىقتالدى.
ماسەلەن, وتكەن تاۋلىكتە, ياعني 6 ماۋسىمدا مونيتورينگتىك توپتار 10 مەكەمەنى اكىمشىلىك جاۋاپكەرشىلىككە تارتتى.
الماتى اۋدانى ناجىمەدەنوۆ كوشەسى, 14 مەكەنجايىنداعى «پاناەحالي» بارىندا كارانتين بۇزىلعانى انىقتالدى. سول سياقتى بايقوڭىر اۋدانىندا كەنەسارى كوشەسى, 65 مەكەنجايىندا ورنالاسقان «س كايفوم» لاۋندج بارى سانەپيدەميولوگيالىق نورمالاردى بۇزا وتىرىپ جۇمىس ىستەگەن.
ال ەسىل اۋدانىندا بىردەن 7 ويىن-ساۋىق مەكەمەسى كارانتين رەجيمىن بۇزدى. سارىارقا اۋدانىندا Respawn كومپيۋتەرلىك كلۋبى باس سانيتارلىق دارىگەردىڭ قاۋلىسىنا قاراماستان ساعات 23:00-دەن كەيىن جۇمىس ىستەدى.
جينالعان ماتەريالدار ءتيىستى شارالار قابىلداۋ ءۇشىن اۋداندىق سانيتارلىق-ەپيدەميولوگيالىق باقىلاۋ باسقارماسىنا تاپسىرىلدى.
ەستەرىڭىزگە سالا كەتەيىك, نۇر-سۇلتان ەپيدەميولوگيالىق جاعدايدى باعالاۋ ماتريتساسى بويىنشا «قىزىل» ايماققا ەنگەنىنە ءۇشىنشى اي بولدى. قالاداعى ەپيدەميولوگيالىق جاعداي تۇراقسىز بولىپ قالۋدا. سوندىقتان ەلوردا تۇرعىندارى مەن قوناقتارى, كاسىپكەرلىك نىساندارى كوروناۆيرۋستىق ينفەكتسيانىڭ ودان ءارى تارالۋىن بولدىرماس ءۇشىن سانيتارلىق نورمالار مەن كارانتين تالاپتارىن قاتاڭ ساقتاۋى ءتيىس.
