وسىعان وراي وبلىس اكىمى گۇلشارا ابدىقالىقوۆا ارال, قازالى اۋداندارىنا ساپارلاپ, بىرقاتار ەلدىمەكەندەردى ارالادى. ايماق باسشىسى الدىمەن ارال اۋدانىنداعى ساركولدىڭ ماسەلەسىنە نازار اۋداردى. وسى اۋماقتاعى ءىرى سۋ ايدىندارى لاي كول, ساركول, قامباش كولدەرى جاعالاۋلارىنان جىراقتاپ, جيەگى بالشىققا اينالعان. ەڭ قيىنى, سۋ ىشۋگە بارعان اياقتى مال ۇيىققا باتىپ, كول جاعاسىندا ولەكسە كوبەيىپتى. قۋاڭشىلىق سالدارىنان جايىلىم اياسىنىڭ تارىلعانى دا ەلدەگىلەردى تىعىرىققا تىرەپ وتىر. اۋىلداعىلاردى كوكتەمدە شىققان كوكتىڭ جاز تۋماي كۇيىپ كەتكەنى دە الاڭداتادى. ورىسكە ايداعان مالىنىڭ يىستەنگەن كول سۋىن ىشە الماي قاتالاپ, كۇننەن كۇنگە كۇيى تايىپ بارا جاتقانى دا اۋىلداعىلار ءۇشىن از ۋايىم ەمەس.
امانوتكەل اۋىلدىق وكرۋگى اكىمى اپپاراتى ەرىكتى جاستاردان ارنايى توپ جاساقتاپتى. ولاردىڭ مىندەتى مالدىڭ ۇيىققا باتىپ قالماۋىن قاداعالاۋ. تارتىلعان كول مەن تاۋقىمەت تارتقان ەلدىڭ جاعدايىن كوزبەن كورگەن گۇلشارا ابدىقالىقوۆا سىرداريا ارناسىنىڭ ءتۇسىپ كەتۋى كوپتەگەن سالاعا قيىندىق تۋدىرىپ جاتقانىن ايتىپ, ماسەلەنى شەشۋ باعىتىندا اتقارىلىپ جاتقان شارالارعا توقتالدى.
– بۇل پروبلەما اۋىلشارۋاشىلىق سالاسىنا ايتارلىقتاي قيىندىق كەلتىرىپ وتىرعانىن كورىپ وتىرسىزدار. وسى ماسەلەگە بايلانىستى جۋىردا وبلىسىمىزعا ساپارمەن كەلگەن ەكولوگيا, گەولوگيا جانە تابيعي رەسۋرستار ۆيتسە-ءمينيسترى سەرىك قوجانيازوۆ ترانسشەكارالىق وزەندەگى ماسەلەگە قاتىستى مەملەكەتارالىق كەلىسىمدەردىڭ جاسالىپ جاتقاندىعىن ايتتى. ءبىز دە جيىندا مينيسترلىككە ۇسىنىسىمىزدى جەتكىزدىك. سوندىقتان سۋ تاپشىلىعى پروبلەماسى الداعى ۋاقىتتا شەشىمىن تابادى دەپ ۇمىتتەنەمىز, – دەدى گۇلشارا ابدىقالىقوۆا.
امانوتكەل اۋىلدىق وكرۋگىندەگى جاعدايمەن تانىسقاننان كەيىن ايماق باسشىسى ورىنباسارى باقىت جاحانوۆقا ماسەلەنى كۇن تارتىبىنە شىعارۋدى جۇكتەپ, اۋدان اكىمى سەرىك سەرماعانبەتوۆكە وبلىستىق ەكولوگيا دەپارتامەنتى, باسقا دا قۇزىرلى ورگاندارمەن بىرلەسىپ ماسەلەنىڭ وڭتايلى شەشىلۋ جولدارىن قاراۋدى تاپسىردى.
وبلىس اكىمى ارال اۋدانىنان كەيىن قازالى اۋدانى ءجالاڭتوس باتىر اۋىلىنداعى ەگىس القابىن كوردى. اۋىلمەن اتتاس سەرىكتەستىك بيىل 1560 گەكتار جەرگە ءدان سەپكەن. ونىڭ 700 گەكتارى – كۇرىش, 150 گەكتارى – جازدىق بيداي. توپىراق قۇنارىن ارتتىرۋ ماقساتىندا شارۋاشىلىق جوڭىشقا دا ەگەدى.
وبلىس اكىمى اۋدان باسشىلىعى مەن سالا ماماندارىنا شارۋاشىلىقتارعا سۋدى كەزەكپەن بەرۋدى ۇيىمداستىرۋدى تاپسىردى.
قىزىلوردا وبلىسى
