وسى ورايدا, بۇگىن ايماقتا «قاراسورا-2021» جەدەل-پروفيلاكتيكالىق ءىس-شاراسى باستالدى. اتالعان شارا اعىمداعى جىلعى 1 ماۋسىم مەن 31 قازان ارالىعىندا وتكىزىلەدى.
جامبىل وبلىستىق پوليتسيا دەپارتامەنتىنىڭ باستىعى, گەنەرال-مايور جانات سۇلەيمەنوۆتىڭ ايتۋىنشا, جەدەل الدىن الۋ ءىس-شاراسى باستالعانعا دەيىن بىرنەشە كۇن بۇرىن وسىنداي كەڭ اۋقىمدى ءىس-شاراعا دايىندىق ماسەلەلەرى بويىنشا شۋ اۋدانىندا كەڭەس وتكەن. كەڭەستە العا قويىلعان مىندەتتەر انىقتالىپ, جەدەل ءىس-قيمىلداردى ۇيىمداستىرۋ بويىنشا نۇسقاۋلار بەرىلگەن. سونىمەن قاتار, جۇمىسقا بارلىق ۆەدومستۆولىق قۇرىلىمدار جۇمىلدىرىلعان. «جىل سايىن پوليتسەيلەر جامبىل وبلىسىنىڭ قۇمدى ايماقتارىنان باسقا وڭىرلەرگە جابايى قاراسورانى شىعارۋ ارنالارىن جابۋ بويىنشا وپەراتسيالار جۇرگىزەدى», دەپ اتاپ ءوتتى گەنەرال-مايور جانات سۇلەيمەنوۆ.
وتكەن جىلى «قاراسورا-2020» جەدەل-الدىن الۋ ءىس-شاراسىنىڭ قورىتىندىسى بويىنشا 574 ەسىرتكى قۇقىق بۇزۋشىلىعى انىقتالعان. ونىڭ ىشىندە 139 دەرەك ەسىرتكى قىلمىسى, 435 دەرەك قىلمىستىق تەرىس قىلىق تىركەلگەن. ەسىرتكى قىلمىستارىنىڭ ىشىندە ەسىرتكىنى وتكىزۋدىڭ 73 دەرەگى, 38 دەرەك ونى اسا ءىرى مولشەردە ساقتاۋ, 3 دەرەك ەسىرتكى كونترابانداسى جانە 25 قۇرامىندا ەسىرتكى بار وسىمدىكتەردى ءوسىرۋ دەرەگى انىقتالعان. زاڭسىز اينالىمنان 2 توننا 867 كەلى ءتۇرلى ەسىرتكى قۇرالدارى تاركىلەنگەن.
ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى مەن جەرگىلىكتى اتقارۋشى بيلىكتىڭ وكىلدەرى بىرلەسىپ, ەسىرتكىنى ورتەۋ, شابۋ, جەردى اۋدارۋ, سونداي-اق ۋلى حيميكاتتاردى قولدانۋ جولىمەن جويۋ شارالارىن تۇراقتى نەگىزدە جۇزەگە اسىرۋدا. سونىمەن قاتار ءوڭىردىڭ باس پوليتسەيى ەسىرتكى بيزنەسىنە قارسى كۇرەس – الدىن الۋ, اقپاراتتىق الاڭعا مونيتورينگ جۇرگىزۋ, گراففيتي-جازبالاردى جويۋ سەكىلدى تاعى بىرنەشە باعىتتا جۇرگىزىلەتىنىن اتاپ ءوتتى.
