ءىس-شارا ەتنوسارالىق جانە كونفەسسياارالىق كەلىسىمنىڭ قازاقستاندىق مودەلىنە ارنالعان. نۇر-سۇلتان مەن وسلو قالالارىن جالعاعان ونلاين سەمينارعا سامي پارلامەنتىنىڭ بۇرىنعى باس ديرەكتورى رۋنە فەلحەيم, نۇرسۇلتان نازارباەۆ قورى جانىنداعى الەمدىك ەكونوميكا جانە ساياسات ينستيتۋتىنىڭ ديرەكتورى ەرجان سالتىباەۆ, كونفەسسياارالىق جانە وركەنيەتارالىق ديالوگتى دامىتۋ جونىندەگى ن.نازارباەۆ ورتالىعىنىڭ باسقارما توراعاسى بولات سارسەنباەۆ, سونداي-اق وسلو قالاسىنداعى ەۆرەي قاۋىمداستىعىنىڭ جەتەكشىسى جانە راسيزمگە قارسى كۇرەس ورتالىعى باسشىسىنىڭ بۇرىنعى ورىنباسارى ەرۆين كوەن قاتىستى. ەقىۇ-نىڭ از ۇلتتار ىستەرى جونىندەگى جوعارعى كوميسسارى قايرات ءابدىراحمانوۆ تا گااگادان تىكەلەي بايلانىسقا شىعىپ, پىكىر الىستى.
ءىس-شارانىڭ مودەراتورى – بۇرىنعى شەتەلدىك ءتىلشى, «TV2» جاڭالىقتار ءبولىمىنىڭ باسشىسى, نورۆەگيالىق جۋرناليست توماس حەنشەن بولدى. سەمينارعا قاتىسۋشىلار 30 جىلدىق مەجەدەگى قازاقستاننىڭ تابىستارىن تىزبەلەدى. تاۋەلسىزدىك جىلدارى ەكونوميكالىق جەتىستىكتەرمەن قاتار, ەلدىڭ كوپەتنوستى جانە كوپكونفەسسيالى قوعامدى نىعايتۋداعى ءرولى ەرەكشە اتالدى.
سەميناردىڭ اشىلۋىندا قايرات ءابدىراحمانوۆ بۇگىنگى الەمدە تۇراقتىلىقتىڭ باستى فاكتورىنىڭ ءبىرى رەتىندە تولەرانتتىلىقتىڭ ماڭىزىن باسا ايتتى. سول سەبەپتى كوپۇلتتى قازىرگى قازاقستاننىڭ ايتۋلى جەتىستىگىنىڭ وزەگى رەتىندە بەيبىتشىلىكتى ساقتاۋ اتالدى.
قازاقستاندىق ديپلوماتتىڭ ويىن ەرجان سالتىباەۆ ساباقتادى. ونىڭ ايتۋىنشا, ەلباسى نۇرسۇلتان نازارباەۆتىڭ ساليقالى ساياساتىن جۇزەگە اسىرۋدىڭ ارقاسىندا ءبىرىنشى ورىنعا تۇراقتىلىق پەن حالىقتىڭ بىرلىگى قويىلعان مەملەكەتتىڭ دامۋى قامتاماسىز ەتىلدى.
ەرۆين كوەن ءوز كەزەگىندە اۋديتورياعا نورۆەگياداعى ۇلتتىق ازشىلىق قۇقىقتارىنىڭ دامۋ تاريحىنا جانە بۇگىندە الەۋمەتتىك قورعاۋ تەڭدىك پەن تەڭ قۇقىقتىق سىندى قۇندىلىقتارمەن تىعىز بايلانىستى قازىرگى زامانعى نورۆەگيالىق قوعامنىڭ قالىپتاسۋ ۇدەرىسىنە قىسقاشا شولۋ ۇسىندى.
نورۆەگيا جانە الەمنىڭ وزگە ەلدەرى قازاقستاننان نە ۇيرەنۋگە بولاتىنى جايلى پىكىرلەسۋ كەزىندە نورۆەگ قوعامداستىعىنىڭ جەتەكشىسى: ء«اردايىم سان ءتۇرلى قوعام يدەياسىن ىلگەرىلەتۋگە ەرەكشە ءمان بەرگەن قازاقستان باسشىلىعىنىڭ بولاشاققا دەگەن كوزقاراسى ەل ءۇشىن باستى قۇندىلىققا اينالدى, ويتكەنى ءدال وسى ارتۇرلىلىك قوعام ءال-اۋقاتىنىڭ ارتۋى مەن وركەندەۋىنە ىقپال ەتەدى», دەپ جاۋاپ بەردى.
نورۆەگيانىڭ سامي پارلامەنتىن ون جىلدان استام ۋاقىت بويى باسقارعان رۋنە فەلحەيم مەملەكەتتىك ورگاندار مەن سامي پارلامەنتى اراسىنداعى ءوزارا ءىس-قيمىل مەن كونسۋلتاتسيالار ءراسىمىنىڭ دامۋىنا توقتالدى. بۇل رەتتە ول حالىقتىڭ ەتنوستىق ەرەكشەلىكتەرىنە قاراماستان, كوپۇلتتى قازاقستاندا تەڭ مۇمكىندىكتەردىڭ بەرىلۋى وزگەگە ۇلگى ەكەنىن باسا ايتتى.
بولات سارسەنباەۆ ءوز سوزىندە قازاقستاننىڭ كونفەسسياارالىق تاجىريبەسى مەن ەلىمىزدىڭ مادەنيەت, ءدىن جانە وركەنيەتتەر ديالوگىن دامىتۋ جونىندەگى كۇش-جىگەرى قازىرگى الەمنىڭ جاھاندىق سىن-قاتەرلەرىنە قارسى شەشىم تابۋدا ايرىقشا ماڭىزدى ەكەنىن جەتكىزدى.
سەمينار سوڭىندا قاتىسۋشىلار قازاقستان تاۋەلسىزدىگىنىڭ 30 جىلدىعىمەن قۇتتىقتاۋ ءبىلدىرىپ, ەلىمىزگە تۇراقتى دامۋ مەن بەيبىتشىلىك تىلەدى.
