سەنبىدە ۇكىمەت باسشىسى بۇعان دەيىن ءسوز بايلاسقان قالىڭدىعى كەرري سايموندسپەن نەكەسىن قيدى. ماڭىزدى وقيعاعا بوريس دجونسوننىڭ وتباسى مەن جاقىن دوستارى عانا كۋا بولدى. جيىندا باس-اياعى 30 عانا ادام بولعان. دەگەنمەن بۇل جاڭالىق بريتانيا ءباسپاسوزىنىڭ نازارىنان تىس قالمادى.
بۇعان دەيىنگى جاڭالىقتارعا سۇيەنسەك, نەكە قيۋ ءراسىمى 30 ماۋسىمعا جوسپارلانعان.
ساياساتكەردىڭ ارىپتەستەرى الەۋمەتتىك جەلىلەردە قۇتتىقتاپ, جىلى لەبىزدەرىن ارنادى. ماسەلەن, العاشقىلاردىڭ ءبىرى بولىپ سولتۇستىك يرلانديانىڭ ءبىرىنشى ءمينيسترى ارلەن فوستەر Twitter جەلىسىندەگى پاراقشاسىندا قۇتتىقتاپ, جاس جۇبايلارعا باقىت تىلەدى.
ءىس-شاراعا بىرنەشە شىركەۋ قىزمەتكەرى قاتىستى. نەگىزگى ءبولىمى دەنيەل حامفرەيس اكەيدىڭ باسشىلىعىمەن ءوتتى. The Sun باسىلىمى «داۋنين ءستريتتىڭ», ياعني پارلامەنت پەن سارايدىڭ بۇل وقيعادان حابارى بولماعانىن جازادى. دەگەنمەن ەكى قۇرىلىم دا بۇعان قاتىستى ەش تۇسىنىكتەمە بەرمەدى.
ۋەستمينستر شىركەۋىنە كەلگەندەردەن شىركەۋدى جەرگىلىكتى ۋاقىت بويىنشا 13:30-دا بوساتۋىن وتىنگەن. ءبىر جارىم ساعاتتان كەيىن وقيعا ورنىنا ۇكىمەت باسشىسى مەن اق كويلەك كيگەن قالىڭدىعى كەلدى. شىركەۋدە ءان ايتقان مۋزىكانتتار كەشكى 10-دا عيماراتتان شىققانى فوتوعا تۇسىرىلگەن.
بوريس دجونسون مەن كەرري سايموندس تۋرالى مەديادا 2019 جىلى حابارلار شىعا باستادى. ولار 2020 جىلى ءسوز بايلاسقانىن رەسمي تۇردە حابارلادى.
كەرري سايموندس كونسەرۆاتيۆتى پارتيادا جۇمىس ىستەگەن. لوندوننىڭ 33 جاستاعى تۋماسى – ۋورۋيك ۋنيۆەرسيتەتىنىڭ تۇلەگى. ونىڭ اكەسى – مەتتيۋ سايموندس The Independent باسىلىمىنىڭ نەگىزىن قۇرۋشىلاردىڭ ءبىرى. كەرري سايموندس ءوزىن ەكوبەلسەندى رەتىندە تانىستىرادى.
