«اۋرۋ باتپانداپ كىرىپ, مىسقالداپ شىعادى», دەگەندەي, كەز كەلگەن دەرتتىڭ داۋاسى وڭاي تابىلا قويمايدى. ال كوروناۆيرۋس ىندەتىنىڭ قاۋىپتىلىگى كۇن سايىن ايتىلۋدا. ونىمەن جاپسارلاسىپ كەلە جاتقان پنەۆمونيا دەگەن اۋرۋ تاعى بار. الايدا كوپتەگەن ازامات ىندەتتى جەڭىپ شىقتى. ماسەلەن, تالاس اۋدانى ءۇشارال اۋىلىنىڭ 68 جاستاعى تۇرعىنىنىڭ دەنە قىزۋى ءۇش كۇننەن بەرى تۇسپەي, تىنىس الۋى قيىنداعان سوڭ, ناۋقاس جەدەل جاردەم كولىگىمەن ورتالىق اۋرۋحاناعا جەتكىزىلەدى. ونى تەكسەرۋ بارىسىندا كومپيۋتەرلىك توموگرافيا وكپەنىڭ 50 پايىزى زاقىمدانعانىن انىقتاپ, وعان ەكىجاقتى پوليسەگمەنتارلى پنەۆمونيا دياگنوزىن قويادى. ال وبلىستىق دەنساۋلىق ساقتاۋ باسقارماسىنىڭ مالىمەتىنشە, پاتسيەنتتە ستەنوكارديا, بۇيرەكتىڭ باسىم زاقىمدانۋىمەن ارتەريالىق گيپەرتەنزيا جانە قان اينالىمىنىڭ بۇزىلۋى سياقتى ىلەسپە اۋرۋلار بولعان ەكەن. ناۋقاس شۇعىل تۇردە جانساقتاۋ بولىمىنە جاتقىزىلىپ, قوسىمشا رەسپيراتورلىق قولداۋ كورسەتىلگەن. اراعا بەس كۇن سالىپ جاعدايى جاقسارعان سوڭ, ارنايى ورتاق بولمەگە اۋىستىرىلعان. دارىگەرلەردىڭ كومەگىنىڭ ناتيجەسىندە ول 15 كۇننىڭ ىشىندە سىرقاتىنان تولىق ايىعىپ شىقتى. «مەن بارلىق مەديتسينا قىزمەتكەرىنە العىس ايتامىن. وبلىس ورتالىعىنا بارماي-اق, اۋداندىق اۋرۋحانادا قاجەتتى ەم-دوم الىپ, وتباسىما امان-ەسەن ورالدىم. اق حالاتتى ابزال جاندارعا باقىت, دەنساۋلىق جانە وسى پاندەميامەن كۇرەستە شىدامدىلىق تىلەيمىن», دەيدى ول. دارىگەرلەر دە ءاربىر تۇرعىن ءۇشىن بارىنشا قاجەتتى شارالار جاسايتىنىن ايتۋدا. «ادامنىڭ اۋرۋدان جازىلۋى ونىڭ ىشكى جاعدايىنا, ونىڭ ءومىر سۇرۋگە, وتباسىنا, جاقىندارىنا ورالۋعا دەگەن نيەتىنە تىكەلەي بايلانىستى بولادى. بۇل كىسى ءبىزدىڭ ستاتسيونارىمىزداعى ومىرگە قۇشتار ناۋقاستاردىڭ ءبىرى بولعان. سوندىقتان دا ول كوروناۆيرۋس ىندەتىن جەڭدى», دەيدى ەمدەۋشى دارىگەر تولقىن جاڭاباي.
تاراز قالاسىنىڭ 60 جاستاعى تۇرعىنى دا قاۋىپتى ىندەتتى جەڭىپ وتىر. اۋەلى ول اۋىر حالدە قالالىق كوپبەيىندى اۋرۋحانانىڭ جۇقپالى اۋرۋلار بولىمىنە كەلىپ تۇسەدى. تۋىستارىنىڭ ايتۋىنشا, ناۋقاس تۇماۋ بەلگىلەرىنە ۇقساس اۋرۋدى ءوز بەتىنشە ەمدەۋگە تىرىسقان. بىراق دەرتى ودان سايىن اسقىنىپ, تىنىسى تارىلىپ, ەنتىگە بەرگەن سوڭ, شۇعىل تۇردە قالالىق كوپبەيىندى اۋرۋحاناعا كەلەدى. مۇندا كەلۋشىنىڭ قان تالداۋلارى تەكسەرىلىپ, كومپيۋتەرلىك توموگرافياعا ءتۇسىرىلىپ بولعان سوڭ, وكپەنىڭ 100 پايىز زاقىمدانعانى انىقتالادى. ءسويتىپ ناۋقاس جانساقتاۋ بولىمىنە جاتقىزىلادى. زاقىمدالعان وكپەنى قالىپقا كەلتىرەتىن ەم-شارالار 60 كۇنگە سوزىلىپتى. دارىگەرلەردىڭ تاباندى ەڭبەگىنىڭ ناتيجەسىندە بۇل ناۋقاس تا ىندەتتى جەڭىپ شىعادى. «مەن ءوز-وزىمە كەلە الماي, تىنىس الۋ اپپاراتىندا جاتتىم. ماعان قايتا ءومىر سىيلاعان اق حالاتتى ابزال جاندارعا مىڭ العىس. كوروناۆيرۋس ىندەتىنەن قورعانۋ ءۇشىن ادامدارعا ۆاكتسينا سالدىرتىپ, وزىنە كۇتىم جاساۋ كەرەكتىگىن ايتقىم كەلەدى. دەنساۋلىققا ارتىق قاۋىپ ءتوندىرۋدىڭ قاجەتى جوق», دەيدى ول. بۇگىندە ناۋقاس تولىق ساۋىعىپ, ۇيىنە شىعارىلدى.
جۋىردا تاراز قالالىق كوپبەيىندى اۋرۋحاناسى جۇقپالى اۋرۋلار قۇرىلىمىنىڭ جانساقتاۋ بولىمىنە مويىنقۇم اۋدانىنىڭ تۇرعىنى كەلىپ تۇسەدى. 28 جاستاعى جۇكتى ايەل وبلىس ورتالىعىنا وتە اۋىر جاعدايدا سانيتارلىق اۆياتسيا جەلىسى ارقىلى جەتكىزىلگەن. كومپيۋتەرلىك توموگرافيا مەن تالداۋ-ساراپتاۋ قورىتىندىلارى بويىنشا وعان كوروناۆيرۋس جانە اۋىر دارەجەلى وكپەنىڭ 88 پايىز زاقىمدانۋىمەن ەكىجاقتى ۆيرۋستىق پنەۆمونيا دياگنوزى قويىلادى. الايدا جەرگىلىكتى مەديتسينا قىزمەتكەرلەرى ءبىر ايدان اسا ۋاقىت بويى رەانيماتسيا بولىمىندە ناۋقاستىڭ ءومىرى مەن بالانىڭ ءومىرى ءۇشىن كۇرەسكەن. «ومىرىنە قاۋىپ تونگەن انا بۇگىندە كەسار تىلىگى ارقىلى امان-ەسەن تۇڭعىشىن بوساندى. نارەستەنىڭ سالماعى 3400 گرامم. شاقالاقتان سىناما الىندى, ناتيجەسى ءسابيدىڭ كوروناۆيرۋس جۇقتىرماعانىن كورسەتتى. بىراق بوسانعاننان كەيىن ناۋقاستىڭ جاعدايى ناشارلاپ كەتتى. ساتۋراتسياسى تومەن, تەمپەراتۋراسى جوعارى, وزدىگىنەن دەم الا المايدى, ينتوكسيكاتسيا سيندرومى وزگەرىسسىز قالدى. بىرنەشە رەت كونسيليۋمدار جۇرگىزىلدى. ناتيجەسىندە, ەكستراكورپورالدى مەمبرانالىق وكسيگەناتسيا اپپاراتىنا قوسىلدى», دەيدى اتالعان اۋرۋحانانىڭ بوسانۋ بولىمشەسىنىڭ مەڭگەرۋشىسى قىمبات ابدرايموۆا.
قۋانىشقا وراي, ىندەتتى جەڭگەن انا دەنى ساۋ ۇل بالانى دۇنيەگە اكەلدى. دارىگەرلەر مەن مەدبيكەلەر انا مەن بالانى قاتاڭ باقىلۋعا الىپ, ەمدەپ, ەرەكشە كۇتىم جاساعان. ناتيجەسىندە, ولار كوپ ۇزاماي رەانيماتسيادان بەيىندى بولىمشەگە اۋىستىرىلماق. ء«بىز جاڭا بوسانعان اناعا جاقىنىمىزداي الاڭدادىق. ول كىسىنىڭ جۇبايىنىڭ دا بىزگە تولىق سەنىم ارتىپ, جاقسىلىقتان ۇمىتتەنگەنى بىزگە كۇش بەردى», دەيدى ەمدەۋشى دارىگەر-ينفەكتسيونيست ەلەنا پاك. توتەنشە رەجىمدە جۇمىس ىستەۋگە داعدىلانعان اۋرۋحانانىڭ بىلىكتى ماماندارى ءسويتىپ بىردەن ەكى ادامنىڭ ءومىرىن ساقتاپ قالدى. «مەنىڭ اۋىر حالىمە قاراماستان, انا بولۋ باقىتىن سىيلاعان وسى اۋرۋحانانىڭ ۇجىمىنا العىسىمدى بىلدىرەمىن. سىزدەر شىنىمەن مىقتى ەكەنسىزدەر. ادال ەڭبەكتەرىڭىزدى كوردىم. كورسەتىلگەن كومەكتەرىڭىز ءۇشىن مىڭ العىس», دەيدى جاڭا بوسانعان انا. ايتا كەتەيىك, جىل باسىنان بەرى اۋرۋحاناعا كوروناۆيرۋس ىندەتىن جۇقتىرعان 197 جۇكتى ايەل جانە 37 بوسانعان ايەل كەلىپ تۇسكەن. 72 جۇكتى جانە بوسانعان ايەل جانساقتاۋ بولىمىندە ەمدەلىپ شىقسا, بۇل مەكەمەدە 52 ايەل دەنى ساۋ بالالاردى دۇنيەگە اكەلگەن.
پسيحولوگتەر قاۋىپتى ىندەتكە شالدىققان ادامنىڭ ودان ۇرەيلەنبەي, قورىقپاي, تەك قانا ونى جەڭىپ شىعاتىنىنا سەنىمدى بولۋى كەرەكتىگىن ايتادى. دەگەنمەن دە دەرتتىڭ اتى – دەرت. ومىرىنە قاۋىپ ءتوندىرىپ تۇرعان ىندەتتەن كىم قورىقپاسىن. الايدا «اۋىرىپ ەم ىزدەگەنشە, اۋىرمايتىن جول ىزدە» دەگەندەي, اۋرۋ كەلمەس بۇرىن بارىنشا ساقتىق تالاپتارىن ساقتاپ, ءوز-ءوزىمىزدى باقىلاۋعا العان ءجون.
