دۋالدى وقىتۋ باعدارلاماسىن ەنگىزگەن وقۋ ورىندارىنىڭ ءبىرى – الماتى ءسان جانە ديزاين كوللەدجى. بۇل كوللەدج 74 جىل بويى تىگىن ءوندىرىسى جانە كيىم ۇلگىلەۋ, شاشتاراز ونەرى جانە ساندىك كوسمەتيكا, تاماقتاندىرۋدى ۇيىمداستىرۋ ماماندىقتارى بويىنشا بىلىكتىلىگى جوعارى ماماندار دايارلاپ كەلەدى.
اتالعان وقىتۋ تەحنولوگياسى ءبىزدىڭ كوللەدجدە 2014 جىلدان باستاپ قولدانىلا باستادى. العاشىندا تىگىنشىلەردىڭ ءبىر توبىنان باستادىق, بۇگىنگى تاڭدا ءبىز دۋالدى تۇردە تىگىنشى, اسپاز, كونديتەر ماماندىقتارى بويىنشا وقىتۋ دايىندىعىن جۇرگىزۋدەمىز.
دۋالدى وقىتۋ بازالىق كاسىپورىنداردا وندىرىستىك وقىتۋ ۋاقىتىنىڭ 60% كولەمىندە قاراستىرىلادى. وقىتۋ ناتيجەسىندە ستۋدەنتتەر جۇمىس بەرۋشىلەردىڭ تالاپتارىنا تەز بەيىمدەلىپ, كوللەدج تۇلەكتەرىنىڭ جۇمىسقا ورنالاسۋ كورسەتكىشى ارتادى.
كوللەدج 2021 جىلى «جاس مامان» باعدارلاماسىنا قازاقستاننىڭ 180 كوللەدجىنىڭ ءبىرى بولىپ ەندى. وقۋ ورنىنىڭ 2021-2026 جىلدارعا ارنالعان ستراتەگيالىق دامۋ جوسپارىن جانە حالىقارالىق تالاپتارعا سايكەس كادرلار دايارلاۋ ءۇشىن شەتەلدىك سالالىق ورتالىقتاردىڭ تالاپتارىنا سايكەستىكتى باعالاۋ راسىمدەرىنەن ءوتۋدىڭ جول كارتاسىن ازىرلەي وتىرىپ, تىگىن شەبەرحانالارىن جابدىقتاۋ ءۇشىن مەملەكەتتىك ساتىپ الۋ قاتىسۋدا.
«جاس مامان» جوباسى بويىنشا ساتىپ الۋ تىزىمىندە بار جابدىق نارىقتىڭ سوڭعى ۇردىستەرىنە جانە زاماناۋي تىگىن ءوندىرىسىنىڭ بارلىق تالاپتارىنا سايكەس كەلەدى. وسىنداي جابدىقتاردا جۇمىس ىستەۋگە وقىتاتىن ماماندىقتىڭ ءوزى بۇگىنگى تاڭدا سۇرانىسقا يە.
جاڭا جابدىقتار تاياۋ 3-5 جىلدا سۇرانىسقا يە بولاتىن بىلىكتى كادرلاردى دايارلاۋ ىسىنە كەڭىنەن جول اشتى. تسيفرلى تىگىن ماشينالارىنىڭ پايدا بولۋى بالاباقشا جاسىنان باستاپ تىگىن تەحنولوگيالارىن ۇيرەتۋگە مۇمكىندىك تۋعىزىپ, بالدىرعانداردىڭ قىزىعۋشىلىعىن وياتىپ, تىگىنشىلىك ماماندىعىنا ەرەكشە نازار اۋدارتادى. ال ءبىز ايتىپ وتىرعان دۋالدى وقىتۋدىڭ نەگىزگى ءمانى – ءبىلىم الۋشىعا مەڭگەرەتىن كاسىبىنىڭ تەوريالىق ءبىلىمىن, بىلىك پەن داعدىسىن تىكەلەي ءوندىرىس ورنىندا مەڭگەرتۋ.
گۇلزيرا ۇياباەۆا,
الماتى ءسان جانە ديزاين كوللەدجى ديرەكتورىنىڭ
وقۋ ءىسى جونىندەگى ورىنباسارى
