وقيعا ورنىنا جەتكەن جەدەل تەرگەۋ توبى كوز جۇمعان ايەلدىڭ دەنەسىنە 23 پىشاق جاراقاتى تۇسكەنىن انىقتاپ وتىر. تەرگەۋ توبىنىڭ بولجامىنشا, ايەل اجال تىرناعىنان قۇتىلماق بولىپ جان دارمەن ارپالىسقا ءتۇسىپ, شاماسى جەتكەنشە قارسىلىق كورسەتكەنگە ۇقسايدى. ويتكەنى قولدارىندا پىشاق ءىزى قالعان.
پوليتسيانىڭ باستاپقى جەدەل تەرگەۋ شارالارى ناتيجەسىندە ايەلدىڭ بۇرىن اۋىر قىلمىس جاساعانى ءۇشىن سوتتالعان كورشىسىنىڭ قولىنان مەرت بولعانى انىقتالدى. ءتارتىپ ساقشىلارى 40-تان استام اۋىل تۇرعىنىنان جاۋاپ العان. ولاردىڭ ءبىرى پوليتسيا سۇراپ وتىرعان ادامعا ۇقسايتىن بىرەۋدىڭ ورمانعا قاراي كەتىپ بارا جاتقانىن كورگەنىن ايتقان.
وسىلايشا, وبلىستا دەرەۋ «ۇستاۋ» شاراسى جاريالانىپ, كوپ كەشىكپەي اۋىلدان 40 شاقىرىم ۇزاپ ۇلگەرگەن كۇدىكتى كوزگە ىلىگەدى. پوليتسەيلەردى بايقاپ قالعان ەر ادام سول ماڭايداعى ومارتانىڭ قاسىندا تۇرعان ۆاگونعا قاراي قاشا جونەلگەن.
«ۇستاۋ بارىسىندا ول قاتتى قارسىلىق كورسەتىپ, پوليتسەيلەردىڭ بىرىنە پىشاق جاراقاتىن سالدى. ۇستاۋ توبى وعان قارۋىن تاستاپ, ءوز ەركىمەن پوليتسياعا بەرىلۋىن سۇرادى. ودان كەيىن جوعارىعا قاراي ەسكەرتۋ وعى اتىلدى. الايدا كۇدىكتى مۇنىڭ بىرىنە قۇلاق اسپاي, ءتارتىپ ساقشىلارىنا پىشاق سىلتەي باستادى. ادام ومىرىنە ءتونىپ تۇرعان قاۋىپ پەن سول ماڭداعى ازاماتتاردىڭ قاۋىپسىزدىگى ەسكەرىلىپ, ۇستاۋ كەزىندە تابەلدىك قارۋدان وق اتۋعا تۋرا كەلدى. ەر ادام العان جاراقاتىنان كوز جۇمدى. قازىر تابەلدى قارۋ قولدانۋدىڭ قانشالىقتى زاڭدى بولعانى تەكسەرىلىپ جاتىر», دەپ مالىمدەدى وبلىستىق پد-نىڭ ءباسپاسوز قىزمەتى.
سونداي-اق پوليتسيا قر قىلمىستىق كودەكسىنىڭ 99-بابىندا كورسەتىلگەن كىسى ءولتىرۋ قىلمىسى بويىنشا سوتقا دەيىنگى تەرگەۋ شارالارىن باستادى. كۇدىكتىنىڭ قولىنان كوز جۇمعان ايەلدىڭ ارتىندا 3 جاسار جانە 10 ايلىق ەكى بالاسى جەتىم قالدى.
