ادەبي ورتاداعى وسىنداي كەشتەردىڭ ءوتۋ داعدىسى سوناۋ جىلداردان بەرى قاتىپ, سەمىپ, بۇگىندە تەك ۇلكەن بۋىننىڭ كوزكورگەن «شىعارماشىلىق» جيىنىنا اينالعان-دى. بايقاساق, كەيىنگى ۋاقىتتا وسى ءبىر ايسبەرگ مۇزى اقىرىنداپ ەرىپ, جاڭا تولقىننىڭ, جاڭا كوكتەمنىڭ لەبى بىلىنەتىندەي. ونىڭ ءبىر دالەلى – Burshaq شىعارماشىلىق بىرلەستىگى ۇيىمداستىرعان پوەزيا كەشى. ايتا كەتەيىك, بۇل اتالعان بىرلەستىكتىڭ العاشقى جيىنى. القيسسا.
OzgeEpic ونەر كەڭىستىگىندە وتكەن ادەبي باسقوسۋعا قازاق پوەزياسىنىڭ جاڭا بۋىن وكىلدەرى – باۋىرجان مايتاي, اسلان قۋانىش ۇلى, سالتانات قايىربەك, جۇلدىز مولداعالي, ايجارىق سۇلتانقوجا, اقجان امانجول, اسەل كارىباي قاتىستى.
جاڭادان قۇرىلعان Burshaq شىعارماشىلىق بىرلەستىگى ونەردىڭ, ونىڭ ىشىندە ادەبيەتتىڭ بىرنەشە باعىتى بويىنشا جۇمىس ىستەيدى. ماسەلەن, Burshaq Poetry پوەزيالىق كەشتەردى ۇيىمداستىرىپ, جاس اقىنداردى وقىرمان قاۋىمعا ناسيحاتتاۋدى كوزدەيدى. سونداي-اق Youtube پلاتفورماسىندا ولاردىڭ شىعارماشىلىعىن كوپشىلىككە تانىستىرىپ, وقىرمان مەن اۆتور اراسىندا كوپىر بولۋدى ماقسات تۇتىپ وتىر. ال العاشقى كەشكە كەلگەن كورەرمەننىڭ قاراسى كوپ بولىپتى. بۇل تۋرالى ۇيىمداستىرۋشىلار: «كەشتەن كەيىن تۇسىنگەنىمىز – اقىن مەن وقىرمان عانا كەزدەسەتىن الاڭ بىزدە جوعالىپ بارادى ەكەن. ويتكەنى جيىن-كەشتەردىڭ كوبىندە ۇزىن-سونار اڭگىمە مەن ماداق-ماراپات ايتىلىپ, كوپشىلىكتىڭ ءىشىن پىستىرادى», دەيدى.
شىعارماشىلىق كەڭىستىكتىڭ پوەزيادان باسقا دا باعىتتارىنا توقتالساق, ماسەلەن, Burshaq Prose پروزالىق كەشتەردى ۇيىمداستىرىپ, جازىپ جۇرگەن جاس پروزايكتەردى تانىستىرماق. قازىر الداعى ۋاقىتتا وتەتىن پروزالىق كەشكە دايىندىق جۇمىستارى ءجۇرىپ جاتىر. بىرلەستىك مۇشەلەرىنىڭ سوزىنشە, ول كەشكە دوسحان جىلقىباي, بەرىكبول باتان مەن تەمىرلان قىلىشبەك قاتىسادى.
ال Burshaq Drama دراماتۋرگيا جانرى بويىنشا جۇمىس اتقارادى. تەاتر رەجيسسەرلەرى, اكتەرلەر مەن دراماتۋرگتەردى ءوزارا بايلانىستىرۋدى كوزدەگەن بۇل باعىتتىڭ اياسىندا وقىلىمدار, قويىلىمدار بولادى دەپ جوسپارلانۋدا.
Burshaq Screenwriters ستسەناري جازۋمەن, ونى پروداكشندەرگە ۇسىنۋمەن اينالىسادى.
Burshaq Publishers – وسى بىرلەستىكتىڭ جەكە باسپاسى. كوركەم ادەبيەتتى شىعارۋمەن قاتار, تاپسىرىسپەن دە جۇمىس جاسايدى. باسپا ءىسى تۋرالى جاس جازۋشى, Burshaq شىعارماشىلىق بىرلەستىگىنىڭ مۇشەسى اليشەر راحات: «باسپانىڭ باس رەداكتورى – اقىن ايجارىق سۇلتانقوجا. قازىرگى ۋاقىتتا العاشقى كىتاپتىڭ ءىشى-سىرتىن وڭدەۋمەن اينالىسۋدا. ماقساتىمىز – قازاق تىلىندەگى زاماناۋي كوركەم ادەبيەتتى كوبەيتۋ, ءارى وقىرمانعا جەتكىزۋدىڭ وڭتايلى جولدارىن ىزدەستىرۋ, كىتاپ نارىعىن قالىپتاستىرۋ, سونداي-اق تالانتتى اقىن-جازۋشىلاردىڭ شىعارماشىلىعىن حالىققا كەڭىنەن ناسيحاتتاۋ», دەيدى.
Burshaq Event – اۆتورلىق, شىعارماشىلىق كەشتەردى, ادەبي كەزدەسۋلەردى ۇيىمداستىرۋمەن اينالىساتىن باعىت. ياعني مۇندا ادەبيەت, تەاتر, كينو الەمىندەگى تۇلعالارمەن كەزدەسۋ كەشتەرى وتەدى.
Burshaq Comics كەڭىستىگىندە قازاق تىلىندە كوميكس جانرىنداعى شىعارمالار جازۋمەن اينالىسادى. الەمدە مانگا, مانحۆا, كوميكس, فەنتەزي, ليترپگ سەكىلدى جانرلار قارىشتاپ دامىپ جاتقانىن ايتقان بىرلەستىك مۇشەسى اليشەر راحات: «ال بىزدە سوڭعى ءبىر-ەكى جىلدا وسى جانردا ءبىردى-ەكىلى كىتاپ شىققانى بولماسا, بۇل باعىت يگەرىلمەي جاتىر. مەكتەپ جاسىنداعى وقۋشىلاردىڭ باسىم بولىگى ورىسشاعا اۋدارىلعان كوميكس, انيمەلەردى كورىپ ءجۇر. ولاردىڭ بۇل سۇرانىسىن قاناعاتتاندىرۋ ءۇشىن, ولار ءوز تىلىندە قىزىقتى, زاماناۋي شىعارما وقۋ ءۇشىن كوميكس جانرىندا ەڭبەك ەتۋدى ويعا الدىق. قازىرگى كەزدە بىرلەستىگىمىزدىڭ نەگىزىن قالاۋشىلاردىڭ ءبىرى, جاس سۋرەتشى, ديزاينەر ديانا ماكسيموۆا بۇل جانردىڭ قىر-سىرىن مەڭگەرىپ, ۇيرەنىپ جاتىر», دەپ اتاپ ءوتتى.
Burshaq Lab باعىتىندا قازاق تىلىنەن اعىلشىن, ورىس تىلدەرىنە نەمەسە شەت تىلدەن قازاقشاعا ءتارجىمالاۋ جوسپارلانسا, «Burshaq Podcast» – قازاق ادەبيەتى كلاسسيكتەرىنىڭ شىعارمالارىن تالقىلاپ, پىكىر الماسىپ, پودكاست كۇيىندە Youtube جەلىسىندە جاريالايدى. ەسكە سالساق, بۇل جوبانىڭ ەكىنشى ەپيزودى جارىق كوردى, الداعى ۋاقىتتا ءار جۇما سايىن ۇسىنىلماق.
Burshaq Social – Burshaq Live شىعارماشىلىق بىرلەستىگىنىڭ youtube ارناسىنداعى ۆيدەو-كونتەنتتەر. وندا شەتەلدىك زاماناۋي كىتاپتار جايلى, قوعامداعى ماڭىزدى, وزەكتى تاقىرىپتار تۋرالى بەينەماتەريالدار, ادەبيەتشىلەرمەن سۇحبات, پوەزيا, پروزا كەشتەرىنىڭ, كەزدەسۋلەردىڭ بەينەجازباسى جانە ت.ب. جوبالار قامتىلادى.
ايتا كەتەيىك, بۇل جۇمىستاردىڭ بارلىعى ۇيىمداستىرۋشى قىز-جىگىتتەردىڭ ءوز كۇشتەرى مەن قاراجاتتارىنا ىستەلىپ جاتقان جوبا. بىرلەستىك مۇشەسى اليشەر راحاتتىڭ ايتۋىنشا, ولاردىڭ بۇل ويلارىنا قازىرگى ادەبيەتتەگى ۇنسىزدىك, مەڭىرەۋ تىنىشتىق اسەر ەتكەن. «ەگەر قازىرگى ساتتەن باستاپ اۋديتوريا قالىپتاستىرىپ, قازاقستاندىقتاردىڭ قازاق تىلىندەگى كوركەم ادەبيەتكە نازارىن بۇرماساق, بولاشاقتا ەلىمىزدەگى ادەبي-مادەني, رۋحاني جاعداي بۇگىنگىدەن دە ۋشىعۋى مۇمكىن. ەشكىم بىزگە كىتاپ نارىعىن جاساپ بەرمەيتىنىنە, جۋىق ارادا ەشبىر باسپا اۆتورمەن كاسىبي جۇمىس جاسامايتىنىنا, ۇلكەن ادەبي اگەنتتىكتەر اشىلمايتىنىنا كوزىمىز جەتتى دەسەم بولادى», دەيدى ول.
سونىمەن, Burshaq شىعارماشىلىق بىرلەستىگىنىڭ نەگىزىن قالاۋشى بەس تالانتتى جاسپەن تانىسا كەتسەك: بەرىكبول باتان («ولىكتەردىڭ ۋىسىندا ەريدى» رومانىنىڭ اۆتورى), اقىن اقجان امانجول, سۋرەتشى, ديزاينەر ديانا ماكسيموۆا, ايجارىق سۇلتانقوجا («تەلەگرامما قابىلداپ الىڭىزشى» ولەڭدەر جيناعىنىڭ اۆتورى), اليشەر راحات («ماحابباتىم – constant» اڭگىمەلەر جيناعىنىڭ اۆتورى). ال Burshaq Lab-تىڭ (بولىمشە) جەتەكشىسى, اۋدارماشى ايكەرىم اسقار.
ادەبي ورتاداعى وسىنداي تىڭ جوبالار مەن يگى باستامالاردىڭ ومىرىمىزگە ەنىپ, جولعا قويىلىپ كەلە جاتقانىنا ءھام يدەيا اۆتورلارىنىڭ ەشكىمنەن ەشتەڭە كۇتپەي, باتىل قادامعا بارىپ, ءوز مۇمكىندىكتەرىنشە جاقسى دۇنيە جاساۋعا تالپىنىستارىنا بەك قۋانىشتىمىز. ويعا العان جوبالارى جالعاسىن تاۋىپ, ادەبيەتسۇيەر وقىرماننىڭ كوڭىلىنەن شىعارىنا سەنەيىك. Burshaq اقىندارىنىڭ ولەڭىن تىڭدايىق, جازۋشىلارىنىڭ اڭگىمەسىن ەستيىك. تالقىلايىق, سىن ايتايىق. مۇنداي ادەبي بىرلەستىكتەردىڭ بىرەۋ ەمەس, بىرنەشەسى پايدا بولىپ, ارقايسىسى ءتۇرلى باعىتتا, ءتۇرلى تالعاممەن جۇمىس جۇرگىزسە, قوعامدا ءبىر وزگەرىستىڭ بولارى انىق.
P.S. Burshaq ساحناسىن ەلوردالىق وقىرمان دا اسىعا كۇتەتىنىن حابارلايمىز.
