تۇلكىباس اۋداندىق پوليتسيا بولىمىنە بىرنەشە جەرگىلىكتى تۇرعىن ارىزدانىپ, نەسيەلەرىن وتەپ بولعاننان كەيىن دە قايتادان قارىز بولىپ شىققاندارىن ايتقان. اتالعان جايتتى پوليتسيا قىزمەتكەرلەرى بىردەن قر قىلمىستىق كودەكسىنىڭ 190-بابى (الاياقتىق) بويىنشا سدتبت-عا تىركەگەن.
تۇلكىباس اپب-ءنىڭ قىزمەتكەرلەرى جەدەل ىزدەستىرۋ ءىس-شارالارىن جۇرگىزىپ, ناتيجەسىندە كۇدىكتى رەتىندە شىمكەنت قالاسىنىڭ تۇرعىنىن جانە بۇرىنعى بانك قىزمەتكەرىن ۇستاعان. جەدەل شارالاردى اتقارعان پوليتسيا قىزمەتكەرلەرى قىلمىستىق ءىستى تولىعىمەن اشىپ, كىنالىنى قۇرىقتاۋ ءۇشىن ەكى اي بويى ءىس-شارالاردى جوعارى دەڭگەيدە اتقارادى.
سوتقا دەيىنگى تەرگەپ-تەكسەرۋ بارىسىندا تۇلكىباس اپب-ءنىڭ تەرگەۋشىسى كۇدىكتىنىڭ 2018-2019 جىلدار ارالىعىندا اۋدانداعى بەلگىلى ءبىر بانكتىڭ فيليالىندا مەنەدجەر بولىپ قىزمەت اتقارىپ, نەسيە الۋعا كەلگەن تۇرعىندارعا نەسيە راسىمدەۋ كەزىندە الاياقتىق جاساعانىن انىقتادى. ياعني كۇدىكتى جىگىت زاڭ اياسىندا نەسيە الۋ ءۇشىن تۇزىلەتىن ءبىر كەلىسىمشارتتىڭ ورنىنا ەكەۋىن قولدان جاساپ, بىرىندە تۇرعىنعا ارنالعان سومانى, ال ەكىنشىسىندە تۇرعىننىڭ الاتىن نەسيەسىنىڭ ۇستىنەن وزىنە كەرەكتى قارجىنى قوسىپ كورسەتىپ, ءوزىنىڭ ايلاسىن ىسكە اسىرعان.
بۇل جايتتى تۇرعىندار نەسيەلەرىن تولەپ بىتكەن ساتتە بىلگەن. سەبەبى بانكتەن نەسيەنىڭ ءالى جابىلماعاندىعى تۋرالى حابارلاما كەلگەن. پوليتسەيلەردىڭ قىراعىلىعىنىڭ ارقاسىندا الاياقتىق جاساعان بانك قىزمەتكەرىنىڭ جالپى 11 تۇرعىندى وسىلاي الداعانى, شىعىن كولەمى سەگىز ميلليون تەڭگەگە جۋىق سومانى قۇراعانى راستالدى.
وسىلايشا قىلمىستىق ءىس اۋداندىق سوتقا جولدانىپ, سوت ۇكىمىمەن 30 جاستاعى ەر ازامات ءۇش جىل ءۇش ايعا باس بوستاندىعىنان ايىرىلدى.