18 مامىردا 4 500 توننا ۇننىڭ العاشقى پارتياسى 75 تەمىر جول ۆاگونىمەن تاسىمالداندى. ونىڭ 30-ى بىشكەككە جەتكىزىلسە, قالعاندارى ەلدىڭ باسقا وڭىرلەرىنە جىبەرىلدى.
قىرعىزستاننىڭ اۋىل, ورمان جانە سۋ شارۋاشىلىعى ءمينيسترىنىڭ ورىنباسارى ازامات مۋكاشەۆتىڭ ايتۋىنشا: «قازىرگى كەزدە مينيسترلەر كابينەتى دەنساۋلىق ساقتاۋ مينيسترلىگىمەن بىرلەسىپ ۇندى حالىققا, ونىڭ ىشىندە اسىرەسە الەۋمەتتىك جاعىنان ناشار قامتىلعان ادامدارعا تاراتۋ ماسەلەسىن پىسىقتاپ جاتىر. مەنىڭ ويىمشا, قازىرگى جاعدايدا قازاقستان رەسپۋبليكاسىنىڭ تاراپىنان ۇلكەن كومەك بولىپ وتىر».
قىرعىز تاراپىنىڭ اقپاراتىنا قاراعاندا, گۋمانيتارلىق كومەكتىڭ ءبىرىنشى پارتياسى مەملەكەتتىك ماتەريالدىق رەزەرۆ مەكەمەسىنىڭ قىرعىزستاننىڭ قارا-بالتا, بالىقشى قالالارىنا, ياعني سولتۇستىگىندەگى قويمالارىنا ءبولىندى. ۇننىڭ قالعان بولىگى ەلدىڭ وڭتۇستىگىندەگى وش پەن دجالال-ابادقا تاسىمالدانادى.
«گۋمانيتارلىق كومەك اتاۋلى تۇردە جەتكىزىلىپ وتىر, سوندىقتان اتالعان ۇن بۇل وبلىس ورتالىقتارىندا, وسى ونىمگە ءزارۋ تۇپكى الۋشىلار اراسىندا تاراتىلماق. الەۋمەتتىك قولداۋمەن قامتىلعان ادامدارعا تەگىن بەرىلەدى», دەپ اتاپ ءوتتى ا. مۋكاشەۆ.
وسى ورايدا قىرعىز تاراپى قازاقستان ۇكىمەتىنە جانە ءتيىستى مەملەكەتتىك ورگاندارىنا گۋمانيتارلىق كومەكتى جەدەل جەتكىزگەنى ءۇشىن ايرىقشا العىسىن ءبىلدىردى.
ەسكە سالساق, گۋمانيتارلىق كومەك ماسەلەسى قازاقستان پرەزيدەنتى ق. توقاەۆ پەن قىرعىزستان پرەزيدەنتى س. جاپاروۆتىڭ 2021 جىلدىڭ 1 مامىرىندا تەلەفون ارقىلى سۇحباتتا قاراستىرىلعان بولاتىن.
قازاقستاننىڭ قىرعىزستانداعى ەلشىسى ءراپىل جوشىباەۆ قازاقستاننان وتكەن جىلى ىندەت باستالعان كەزدە-اق گۋمانيتارلىق كومەك شەڭبەرىندە 5 000 توننا وتاندىق ۇن ءونىمى قىرعىزستانعا جىبەرىلگەنىن اتاپ ءوتتى.
«2020 جىلى كۇزدە ۇكىمەتتىڭ شەشىمىمەن ەلىمىزدە جاسالعان 400 دانا ءپورتاتيۆتى جەلدەتۋ اپپاراتى, 2 ميلليون بەتپەردە جىبەرىلدى. بۇعان قىرعىز حالقى ريزاشىلىعىن ءبىلدىرىپ جاتىر. ءبىز قيىن كەزدە ارقاشان كومەكتەسەمىز دەگەن ويدامىن», دەدى ول.
گۋمانيتارلىق جۇكتىڭ قالعان بولىگى مامىردىڭ اياعىنا دەيىن جەتكىزىلەدى.
وعان قوسا, ونىمدىلىگى جوعارى كۇزدىك بيدايدىڭ 1 مىڭ تونناسىن جەتكىزۋ ماسەلەسى شەشىلۋدە. بۇل كومەك تەك حالىقتىڭ ناشار قامتىلعان بولىگىنە عانا ەمەس, قىرعىزستاننىڭ فەرمەرلەرىنە دە بەرىلىپ, ولار ءوز ەگىستىك القاپتارىنا ساپالى تۇقىم ەگەتىن بولادى.
