قارۋلى كۇشتەردە جەكە قۇرامنىڭ 80 پايىزدان استامى ەكپە الدى

اتالعان كەڭەستە مەرەكەلىك كۇندەردىڭ وتكىزىلۋى تۋرالى باياندالدى. بۇل كۇندەرى قىراعىلىق پەن جاۋىنگەرلىك ازىرلىكتى قولداۋ، كەزەكشى كۇشتەردىڭ ۇزدىكسىز قىزمەت اتقارۋى قامتاماسىز ەتىلىپ، سونداي-اق ۇلى وتان سوعىسىنىڭ ارداگەرلەرى مەن تىل ەڭبەككەرلەرىنە قۇرمەت كورسەتۋ جونىندەگى شارالار ۇيىمداستىرىلدى.

بيىل 1 ماۋسىمدا باستالاتىن جازعى وقۋ-جاتتىعۋ كەزەڭىنە دايىندىق ماسەلەلەرى قارالدى. بۇل رەتتە اسكەرلەردە كوماندالىق قۇرام نۇسقاۋ بەرۋ-ادىستەمەلىك ساباقتارىن، سونداي-اق تەحنيكانى، وقۋ-جاتتىعۋ ماتەريالدىق بازاسىن دايىنداۋ مەن پوليگونداردى وق-دارىلەر قالدىقتارىنان تازارتۋدى ۇيىمداستىردى.

گەنەرال-لەيتەنانت نۇرلان ەرمەكباەۆ اسكەري نىسانداردىڭ ديۆەرسياعا قارسى قاۋىپسىزدىگىنىڭ جاي-كۇيىنە نازار اۋداردى. وسى ماقساتتا ول كۇزەت پەن بەينەباقىلاۋ تەحنيكالىق قۇرالدارىنىڭ تۇراقتى جۇمىس ىستەۋىن، بوگەتتەردىڭ جارامدىلىعىن قامتاماسىز ەتۋدى تاپسىردى. جابدىق ىستەن شىققان جاعدايدا كوماندا بويىنشا دەرەۋ بايانداۋعا جانە اقاۋلىقتاردى جويۋ جونىندە شارالار قابىلداۋعا، ال وبەكتىلەردىڭ قاۋىپسىزدىگىن قامتاماسىز ەتۋ ءۇشىن قارۋلى ۇتقىر توپتار مەن كەزەكشى كۇشتەردى تەز ارادا جۇمىلدىرۋعا ءتيىس.

بۇدان وزگە، لاۋازىمدى تۇلعالارعا جەكە اۆتوكولىكتەردى اسكەري نىساندار اۋماعىنا كىرگىزۋگە تىيىم سالۋ تۋرالى باسشىلىق بۇيرىقتارى مەن نۇسقاۋلىقتارىنىڭ تالاپتارى ەسكەرتىلدى. بۇل ەرەجە مارتەبەسىنە، لاۋازىمدىق جاعدايىنا جانە قانداي دا ءبىر قۇرىلىمدارعا تيەسىلىگىنە قاراماستان، مەملەكەتتىك ورگانداردىڭ ءبىرىنشى باسشىلارى مەن قورعانىس ءمينيسترىنىڭ وزىنە دە قاتىستى.

بۇل ءتارتىپتى قامتاماسىز ەتۋگە، ديۆەرسياعا قارسى قورعانىس جانە جەكە تۇلعالاردىڭ زاڭعا قارسى ارەكەتتەرىن الۋعا قاجەت.

قورعانىس ۆەدومستۆوسىنىڭ باسشىسى قارۋلى كۇشتەردىڭ قاجەتتىلىكتەرى ءۇشىن ىسكە اسىرىلاتىن مەملەكەتتىك ساتىپ الۋدى وتكىزۋگە جەكە توقتالدى. بۇرىن جاۋاپسىز ءونىم بەرۋشىلەر دەپ تانىلعان سۋبەكتىلەردىڭ كونكۋرستارعا ء«وتىنىش بەرۋ» جاعدايلارى ءجيى كەزدەسەتىنى اتاپ ءوتىلدى. اسىرەسە ارميانى قارۋ-جاراقپەن جابدىقتاۋ جانە اسكەري ينفراقۇرىلىم وبەكتىلەرىن پايدالانۋدى قامتاماسىز ەتۋ سياقتى ماڭىزدى سالالاردا بۇعان جول بەرۋگە بولمايدى. اتالعان ماسەلەنى، قورعانىس ءمينيسترى اسكەري تەحنيكانى ساتىپ الۋدى ۇيىمداستىرۋ جونىندەگى ۋاكىلەتتى ورگان بولىپ تابىلاتىن يندۋستريا جانە ينفراقۇرىلىمدىق دامۋ مينيسترلىگىمەن جان-جاقتى پىسىقتاۋدى تاپسىردى.

باس اسكەري-مەديتسينالىق باسقارمانىڭ باستىعى COVID-19 ىندەتىن جۇقتىرعاندار سانىنىڭ ازايىپ كەلە جاتقانىن اتاپ ءوتتى. ماسەلەن، الدىڭعى كەزەڭمەن سالىستىرعاندا وتكەن اپتادا سىرقاتتانۋ 39 پايىزعا تومەندەگەنى بايقالدى. مۇنداي كورسەتكىش جەكە قۇرامدى ۆاكتسيناتسيالاۋدىڭ ناتيجەسىمەن بايلانىستى. 11 مامىرداعى جاعدايى بويىنشا اسكەري قىزمەتشىلەر مەن ازاماتتىق پەرسونال وكىلدەرىنىڭ 80%-دان استامى كوروناۆيرۋسقا قارسى ەكپە الدى. ونىڭ ۇستىنە، قالعان 20 پايىزى – قازىرگى ۋاقىتتا دەمالىستا، ۇزاق ءىسساپاردا جۇرگەندەر، سونداي-اق مەديتسينالىق قارسى كورسەتىلىمدەرى بار ادامدار.